ನೀವು ಈದ್ ಬೇಕಾದರೂ ಆಚರಿಸಿ, ಪವಿತ್ರ ದೀಪಾವಳಿಯನ್ನ ಈದ್ ಎನ್ನಬೇಡಿ: ಮಲ್ಲಿಕಾರ್ಜುನ ಖರ್ಗೆ ವಿರುದ್ಧ ಸಿ.ಟಿ. ರವಿ ಆಕ್ರೋಶ

ಚಿಕ್ಕಮಗಳೂರು/ಬೆಂಗಳೂರು: ದೀಪಾವಳಿ ಹಬ್ಬದ ಶುಭಾಶಯ ಕೋರುವಾಗ ದೀಪಾವಳಿಯನ್ನು “ಈದ್” ಎಂದು ಹೇಳಿಕೆ ನೀಡಿದ್ದಾರೆ ಎನ್ನಲಾದ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರ ವಿರುದ್ಧ ಬಿಜೆಪಿ ನಾಯಕ ಸಿ.ಟಿ. ರವಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಮುಸ್ಲಿಂ ವೋಟ್ ಬ್ಯಾಂಕ್ ಹಾಗೂ ಓಲೈಕೆ ರಾಜಕಾರಣಕ್ಕಾಗಿ ಕಾಂಗ್ರೆಸ್ ಪಕ್ಷವು ಯಾವ ಹಂತಕ್ಕಾದರೂ ಇಳಿಯಬಲ್ಲದು ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ ಎಂದು ಅವರು ವ್ಯಂಗ್ಯವಾಡಿದ್ದಾರೆ.

ಸಹಸ್ರಮಾನಗಳ ಇತಿಹಾಸವಿರುವ ಹಿಂದೂಗಳ ಪವಿತ್ರ ದೀಪಾವಳಿ ಹಬ್ಬಕ್ಕೆ ಈದ್ ಎಂದು ಕರೆಯುವ ಅಗತ್ಯವೇನಿತ್ತು ಎಂದು ಸಿ.ಟಿ. ರವಿ ಬಹಿರಂಗವಾಗಿ ಪ್ರಶ್ನಿಸಿದ್ದಾರೆ.

ಓಲೈಕೆ ರಾಜಕಾರಣದ ಆರೋಪ: ಮುಸ್ಲಿಂ ಮತಗಳ ಧ್ರುವೀಕರಣಕ್ಕಾಗಿ ಹಾಗೂ ಓಲೈಕೆ ರಾಜಕಾರಣಕ್ಕಾಗಿ ಕಾಂಗ್ರೆಸ್ ನಾಯಕರು ಈ ರೀತಿಯ ಹೇಳಿಕೆಗಳನ್ನು ನೀಡುತ್ತಿದ್ದಾರೆ ಎಂದು ಸಿ.ಟಿ. ರವಿ ಆರೋಪಿಸಿದ್ದಾರೆ.

ಹಬ್ಬಗಳ ಪವಿತ್ರತೆಗೆ ಧಕ್ಕೆ: ನೀವು ಈದ್ ಅಥವಾ ಮೊಹರಂ ಬೇಕಾದರೂ ಆಚರಿಸಿ, ಆದರೆ ಹಿಂದೂಗಳು ಶ್ರದ್ಧಾ ಭಕ್ತಿಗಳಿಂದ ಆಚರಿಸುವ ದೀಪಾವಳಿ ಹಬ್ಬವನ್ನು ಇತರ ಧರ್ಮದ ಆಚರಣೆಗಳೊಂದಿಗೆ ಹೋಲಿಸಬೇಡಿ ಎಂದು ಎಚ್ಚರಿಸಿದ್ದಾರೆ.

ನಮ್ಮ ಹಬ್ಬಗಳನ್ನು ನಮಗೆ ಬಿಟ್ಟುಬಿಡಿ: ನಂಬಿಕೆ ಮತ್ತು ಸಂಪ್ರದಾಯದ ಸಂಕೇತವಾಗಿರುವ ನಮ್ಮ ಹಬ್ಬಗಳನ್ನು ಆಚರಿಸಲು ನಮಗೆ ಬಿಟ್ಟುಬಿಡಿ, ರಾಜಕೀಯಕ್ಕಾಗಿ ಹಬ್ಬಗಳ ಹೆಸರನ್ನು ಬಳಸಬೇಡಿ ಎಂದು ಸಿ.ಟಿ. ರವಿ ಖರ್ಗೆ ವಿರುದ್ಧ ಕಿಡಿಕಾರಿದ್ದಾರೆ.

ಮಲ್ಲಿಕಾರ್ಜುನ ಖರ್ಗೆ ಅವರ ಹೇಳಿಕೆ ಹಾಗೂ ಸಿ.ಟಿ. ರವಿ ಅವರ ಈ ತಿರುಗೇಟು ರಾಜ್ಯ ರಾಜಕೀಯ ಅಂಗಳದಲ್ಲಿ ನಾಯಕರ ನಡುವೆ ಸೋಷಿಯಲ್ ಮೀಡಿಯಾ ಸಮರಕ್ಕೆ ಕಾರಣವಾಗಿದೆ.