CBSE ಯು-ಟರ್ನ್: ಆನ್‌ಲೈನ್ ಮಾರ್ಕಿಂಗ್ ಪೋರ್ಟಲ್ ಹ್ಯಾಕ್ ಒಪ್ಪಿಕೊಂಡ ಮಂಡಳಿ, ತಜ್ಞರಿಂದ ಭದ್ರತೆ ಬಲಪಡಿಸಲು ಕ್ರಮ

ಹೊಸ ದೆಹಲಿ: ಆನ್‌ಲೈನ್ ಸ್ಕ್ರೀನ್ ಮಾರ್ಕಿಂಗ್ (OSM) ಪೋರ್ಟಲ್ ಭದ್ರತೆಯ ಕುರಿತಾದ ತೀವ್ರ ವಿವಾದದ ಬೆನ್ನಲ್ಲೇ, ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಷನ್ (CBSE) ಕೊನೆಗೂ ಮೌನ ಮುರಿದಿದ್ದು, ತನ್ನ ಡಿಜಿಟಲ್ ವ್ಯವಸ್ಥೆಯಲ್ಲಿನ ಭದ್ರತಾ ಲೋಪಗಳನ್ನು ಅಧಿಕೃತವಾಗಿ ಒಪ್ಪಿಕೊಂಡಿದೆ.

ಸಾಮಾಜಿಕ ಮಾಧ್ಯಮ ಎಕ್ಸ್ (X) ನಲ್ಲಿ ಈ ಕುರಿತು ಪ್ರಕಟಣೆ ಹೊರಡಿಸಿರುವ ಮಂಡಳಿಯು, ತನ್ನ ಸೇವಾ ಪೂರೈಕೆದಾರ ಸಂಸ್ಥೆಯ ಒಎಸ್‌ಎಂ (OSM) ಪೋರ್ಟಲ್‌ನಲ್ಲಿ ಕಂಡುಬಂದಿರುವ ದೋಷಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವುದಾಗಿ ತಿಳಿಸಿದೆ. ತಜ್ಞರ ತಂಡ ಹಾಗೂ ವಿವಿಧ ಸರ್ಕಾರಿ ಸಂಸ್ಥೆಗಳು ಮತ್ತು ಐಐಟಿ (IIT) ಗಳ ಸೈಬರ್ ಭದ್ರತಾ ತಜ್ಞರು ಕಳೆದ ಕೆಲವು ದಿನಗಳಿಂದ ಈ ಸಿಸ್ಟಮ್‌ನ ಭದ್ರತಾ ಮೂಲಸೌಕರ್ಯವನ್ನು ಬಲಪಡಿಸಲು ಶ್ರಮಿಸುತ್ತಿದ್ದಾರೆ ಎಂದು ಸಿಬಿಎಸ್‌ಇ ಹೇಳಿದೆ.

ಲೋಪಗಳನ್ನು ಬಯಲಿಗೆಳೆದ ಯುವ ಹ್ಯಾಕರ್ಸ್:

ಇತ್ತೀಚೆಗೆ 19 ವರ್ಷದ ಎಥಿಕಲ್ ಹ್ಯಾಕರ್ ನಿಸರ್ಗ ಅಧಿಕಾರಿ ಎಂಬುವವರು ಸಿಬಿಎಸ್‌ಇಯ ಎಡಬ್ಲ್ಯೂಎಸ್ (AWS) ಬಕೆಟ್‌ನಲ್ಲಿ ಸಂಗ್ರಹಿಸಲಾಗಿದ್ದ ಉತ್ತರ ಪತ್ರಿಕೆಗಳು ಮತ್ತು ಪ್ರಶ್ನೆ ಪತ್ರಿಕೆಗಳನ್ನು ಆನ್‌ಲೈನ್‌ನಲ್ಲಿ ಯಾರು ಬೇಕಾದರೂ ಸುಲಭವಾಗಿ ವೀಕ್ಷಿಸಬಹುದಿತ್ತು ಎಂದು ಬಹಿರಂಗಪಡಿಸಿದ್ದರು. ಇದರ ಬೆನ್ನಲ್ಲೇ 17 ವರ್ಷದ ದ್ವಿತೀಯ ಪಿಯುಸಿ (Class 12) ವಿದ್ಯಾರ್ಥಿ ಸಾರ್ಥಕ್ ಸಿದ್ಧಾಂತ್ ಎಂಬಾತ ಸಿಬಿಎಸ್‌ಇಯ ಟೆಂಡರ್ ದಾಖಲೆಗಳನ್ನು ಪರಿಶೀಲಿಸಿ, ಹೈದರಾಬಾದ್ ಮೂಲದ ‘ಕೋಯಂಪ್ಟ್ ಎಡುಟೆಕ್’ (Coempt Eduteck) ಸಂಸ್ಥೆಗೆ ಒಪ್ಪಂದವನ್ನು ನೀಡಲು ಮಂಡಳಿಯು ಭದ್ರತಾ ನಿಯಮಗಳು ಮತ್ತು ಅರ್ಹತಾ ಮಾನದಂಡಗಳನ್ನು ಸಡಿಲಗೊಳಿಸಿದೆ ಎಂದು ಗಂಭೀರ ಆರೋಪ ಮಾಡಿದ್ದನು.

ಪ್ರಸ್ತುತ ಈ ಭದ್ರತಾ ದೋಷಗಳನ್ನು ನಿಯಂತ್ರಣಕ್ಕೆ ತರಲಾಗಿದ್ದು, ಪೋರ್ಟಲ್ ಅನ್ನು ಹೆಚ್ಚು ಸುರಕ್ಷಿತವಾದ ವ್ಯವಸ್ಥೆಗೆ ಸ್ಥಳಾಂತರಿಸಲಾಗುತ್ತಿದೆ ಎಂದು ಸಿಬಿಎಸ್‌ಇ ಸ್ಪಷ್ಟಪಡಿಸಿದೆ. ಅಲ್ಲದೆ, ವ್ಯವಸ್ಥೆಯ ಲೋಪದೋಷಗಳನ್ನು ತಂದುಕೊಟ್ಟ ಎಥಿಕಲ್ ಹ್ಯಾಕರ್‌ಗಳು ಮತ್ತು ಜಾಗರೂಕ ನಾಗರಿಕರಿಗೆ ಮಂಡಳಿಯು ಧನ್ಯವಾದ ಅರ್ಪಿಸಿದೆ.