ಬಿಜೆಪಿ ಶಾಸಕಿ ಮೈಥಿಲಿ ಠಾಕೂರ್ ತಂದೆ ವಿರುದ್ಧ ಭೂಮಿ ಕಬಳಿಕೆ ಹಾಗೂ ಸರ್ಕಾರಿ ರಸ್ತೆ ಒತ್ತುವರಿ ಆರೋಪ!

ಬಿಹಾರ: ಬಿಹಾರದ ದರ್ಭಂಗಾ ಜಿಲ್ಲೆಯಲ್ಲಿ ಬಿಜೆಪಿ ಶಾಸಕಿ ಮೈಥಿಲಿ ಠಾಕೂರ್ ಅವರ ತಂದೆ ರಮೇಶ್ ಠಾಕೂರ್ ವಿರುದ್ಧ ಗಂಭೀರ ಆರೋಪವೊಂದು ಕೇಳಿಬಂದಿದೆ. ಹೊಸದಾಗಿ ಖರೀದಿಸಿದ ಜಮೀನಿಗೆ ಬೇಲಿ ಹಾಕುವ ವೇಳೆ ಸರ್ಕಾರಿ ರಸ್ತೆ ಹಾಗೂ 12 ಧೂರ್‌ಗಳಿಗೂ ಅಧಿಕ ಖಾಸಗಿ ಜಮೀನನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ ಎಂದು ಸ್ಥಳೀಯ ಗ್ರಾಮಸ್ಥರು ಆಪಾದಿಸಿದ್ದಾರೆ. ಅಲ್ಲದೆ, ಒತ್ತುವರಿಯನ್ನು ವಿರೋಧಿಸಿದ ಗ್ರಾಮಸ್ಥರಿಗೆ ಸುಳ್ಳು ಮೊಕದ್ದಮೆ ಹೂಡುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದೂ ದೂರು ನೀಡಿದ್ದಾರೆ.

ಸ್ಥಳೀಯ ನಿವಾಸಿ ಗಗನ್ ಕುಮಾರ್ ಮಿಶ್ರಾ ಅವರ ಲಿಖಿತ ದೂರಿನ ಮೇರೆಗೆ ಶುಕ್ರವಾರ ತಾರ್ಧಿಹ್ ವೃತ್ತ ಕಚೇರಿಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ವಿವಾದಿತ ಭೂಮಿಯ ಅಳತೆ ಕಾರ್ಯ ನಡೆಸಿದ್ದಾರೆ. ದರ್ಭಂಗಾ ಉಪ ಭೂಸುಧಾರಣಾ ಅಧಿಕಾರಿ  ಅಜಯ್ ಕುಮಾರ್ ಅವರೂ ಈ ವೇಳೆ ಉಪಸ್ಥಿತರಿದ್ದರು. ಪ್ರಾಥಮಿಕ ಅಳತೆಯಲ್ಲಿ ಸರ್ಕಾರಿ ರಸ್ತೆಯ ಜಾಗ ಒತ್ತುವರಿಯಾಗಿರುವುದು ದೃಢಪಟ್ಟಿದ್ದು, ಅದನ್ನು ತೆರವುಗೊಳಿಸಲು ಆಡಳಿತ ಯಂತ್ರ ಕ್ರಮ ಕೈಗೊಂಡಿದೆ. ಆದರೆ ಖಾಸಗಿ ಭೂವಿವಾದವು ಇನ್ನೂ ಬಗೆಹರಿಯದ ಕಾರಣ, ಸೂಕ್ತ ಕಾನೂನು ಪ್ರಕ್ರಿಯೆಯ ಮೂಲಕ DCLR ಕಚೇರಿಯನ್ನು ಅಥವಾ ಸಿವಿಲ್ ನ್ಯಾಯಾಲಯವನ್ನು ಸಂಪರ್ಕಿಸುವಂತೆ ದೂರುದಾರರಿಗೆ ಸೂಚಿಸಲಾಗಿದೆ.

ಸರ್ಕಾರಿ ರಸ್ತೆ ಒತ್ತುವರಿ ದೃಢ: ಅಧಿಕಾರಿಗಳು ನಡೆಸಿದ ಸ್ಥಳ ಮಹಜರು ಮತ್ತು ಅಳತೆಯಲ್ಲಿ ಸರ್ಕಾರಿ ರಸ್ತೆಯ ಜಾಗ ಒತ್ತುವರಿಯಾಗಿರುವುದು ಸಾಬೀತಾಗಿದ್ದು, ಸಾರ್ವಜನಿಕ ಓಡಾಟಕ್ಕೆ ಅನುಕೂಲ ಕಲ್ಪಿಸಲು ತೆರವು ಕಾರ್ಯ ಆರಂಭಿಸಲಾಗಿದೆ.

ಖಾಸಗಿ ಭೂಮಿ ವಿವಾದ: ಗಗನ್ ಕುಮಾರ್ ಮಿಶ್ರಾ ಎಂಬುವವರ 12 ಧೂರ್‌ಗಳಿಗೂ ಹೆಚ್ಚು ಖಾಸಗಿ ಜಮಿನನ್ನು ಒತ್ತುವರಿ ಮಾಡಲಾಗಿದೆ ಎಂಬ ಆರೋಪವಿದ್ದು, ಈ ಕುರಿತು ಕಾನೂನು ಹೋರಾಟ ಮುಂದುವರಿಸಲು ನಿರ್ಧರಿಸಲಾಗಿದೆ.

ಗ್ರಾಮಸ್ಥರ ಸಂಕಷ್ಟ: ಒತ್ತುವರಿಯಾಗಿರುವ ರಸ್ತೆಯು ಸ್ಮಶಾನ ಭೂಮಿ, ದೇವಸ್ಥಾನ ಹಾಗೂ ಕೃಷಿ ಜಮೀನುಗಳಿಗೆ ತೆರಳಲು ಗ್ರಾಮಸ್ಥರಿಗೆ ಅತ್ಯಂತ ಪ್ರಮುಖ ಸಂಪರ್ಕ ಮಾರ್ಗವಾಗಿದೆ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಬೆದರಿಕೆ ಆರೋಪ: ಪ್ರತಿರೋಧಿಸಿದ ಸ್ಥಳೀಯರಿಗೆ ಸುಳ್ಳು ಕ್ರಿಮಿನಲ್ ಪ್ರಕರಣಗಳ ಮೂಲಕ ಬೆದರಿಕೆ ಹಾಕಲಾಗುತ್ತಿದೆ ಹಾಗೂ ನೆರೆಹೊರೆಯ ಜಮೀನು ಮಾರಾಟ ಮಾಡುವಂತೆ ಒತ್ತಡ ಹೇರಲಾಗುತ್ತಿದೆ ಎಂದು ನಿವಾಸಿಗಳು ದೂರಿದ್ದಾರೆ.

ಮಂಡಲದ ಡಿ.ಸಿ.ಎಲ್.ಆರ್ ಅಜಯ್ ಕುಮಾರ್ ಮಾತನಾಡಿ, ಸರ್ಕಾರಿ ರಸ್ತೆ ಒತ್ತುವರಿ ತೆರವಿಗೆ ಕ್ರಮ ಕೈಗೊಳ್ಳಲಾಗುತ್ತಿದ್ದು, ಖಾಸಗಿ ಭೂಮಿ ವಿವಾದ ಮತ್ತು ಮಧುಬಾನಿ ಜಿಲ್ಲಾ ವ್ಯಾಪ್ತಿಗೆ ಬರುವ ಗಡಿ ಭಾಗದ ವಿಚಾರಗಳನ್ನು ಸೂಕ್ತ ಕಾನೂನು ಪ್ರಕ್ರಿಯೆಯ ಮೂಲಕ ಬಗೆಹರಿಸಲಾಗುವುದು ಎಂದು ತಿಳಿಸಿದ್ದಾರೆ.