ಭೋಪಾಲ್‌ನಲ್ಲಿ ರೂ. 500 ಸಾಲ ನೀಡದ್ದಕ್ಕೆ 60 ವರ್ಷದ ವೃದ್ಧೆಯ ಭೀಕರ ಹತ್ಯೆ: ಚಿನ್ನದ ಒಡವೆ, ಹಲ್ಲುಗಳೊಂದಿಗೆ ಪರಾರಿಯಾದ ಮಹಿಳೆ ಅರೆಸ್ಟ್

ಭೋಪಾಲ್:ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ಕೇವಲ 500 ರೂಪಾಯಿ ಸಾಲ ನೀಡಲು ನಿರಾಕರಿಸಿದನೆಂಬ ಕಾರಣಕ್ಕೆ ವೃದ್ಧೆಯೊಬ್ಬರನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿರುವ ಘಟನೆ ತೀವ್ರ ಸಂಚಲನ ಮೂಡಿಸಿದೆ.

ರೇಖಾ ಅಲಿಯಾಸ್ ರೀಟಾ (45) ಎಂಬಾಕೆಯೇ ಈ ಬರ್ಬರ ಕೃತ್ಯವೆಸಗಿದ ಆರೋಪಿಯಾಗಿದ್ದು, ಹತ್ಯೆ ಬಳಿಕ ವೃದ್ಧೆಯ ಮೈಮೇಲಿದ್ದ ಚಿನ್ನದ ಆಭರಣಗಳು, ನಗದು ಹಾಗೂ ಬಾಯಿಯಲ್ಲಿದ್ದ ಚಿನ್ನದ ಕೃತಕ ಹಲ್ಲುಗಳನ್ನು ಕಿತ್ತುಕೊಂಡು ಪರಾರಿಯಾಗಿದ್ದಾಳೆ.

ನವೆಂಬರ್ 6ರಂದು ಹಮಿದಿಯಾ ಆಸ್ಪತ್ರೆಯಿಂದ ವೃದ್ಧೆ ಕಾಲ್ರಿ ದೇವಿ (60) ಅವರ ಅನುಮಾನಾಸ್ಪದ ಸಾವು ಸಂಭವಿಸಿರುವುದಾಗಿ ಪೊಲೀಸರಿಗೆ ಮಾಹಿತಿ ಲಭ್ಯವಾಗಿತ್ತು. ಮರಣೋತ್ತರ ಪರೀಕ್ಷೆಯಲ್ಲಿ ಉಸಿರುಗಟ್ಟಿಸಿ ಕೊಲೆ ಮಾಡಿರುವುದು ದೃಢಪಟ್ಟ ಹಿನ್ನೆಲೆಯಲ್ಲಿ ವಿಶೇಷ ತನಿಖಾ ತಂಡ (SIT) ರಚಿಸಿ ತನಿಖೆ ಕೈಗೊಂಡ ಪೊಲೀಸರು, ಆರೋಪಿ ರೇಖಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಈಕೆಗೆ ಈಗಾಗಲೇ ಅಪರಾಧ ಹಿನ್ನೆಲೆಯಿದ್ದು, ಅಪ್ರಾಪ್ತ ಬಾಲಕಿಯ ಅಪಹರಣ ಹಾಗೂ ಲೈಂಗಿಕ ದೌರ್ಜನ್ಯದಂತಹ ಗಂಭೀರ ಪ್ರಕರಣಗಳೂ ಈಕೆಯ ಮೇಲಿವೆ ಎಂದು ಪೊಲೀಸ್ ತನಿಖೆಯಿಂದ ತಿಳಿದುಬಂದಿದೆ.

500 ರೂ. ಗಾಗಿ ಕೊಲೆ: ರೂ. 500 ಸಾಲ ಕೇಳಲು ನೆರೆಮನೆಯ ಕಾಲ್ರಿ ದೇವಿ ಮನೆಗೆ ತೆರಳಿದ್ದ ರೇಖಾ, ಹಣ ನೀಡಲು ನಿರಾಕರಿಸಿದ್ದಕ್ಕೆ ಆಕೆಯ ಮೇಲೆ ಹಲ್ಲೆ ನಡೆಸಿ ಉಸಿರುಗಟ್ಟಿಸಿ ಕೊಂದಿದ್ದಾಳೆ.

ಚಿನ್ನದ ಹಲ್ಲುಗಳ ಕಳವು: ವೃದ್ಧೆಯನ್ನು ಕೊಲೆ ಮಾಡಿದ ಬಳಿಕ ಆಕೆಯ ಮೈಮೇಲಿನ ಒಡವೆ, ನಗದು ಹಾಗೂ ಬಾಯಿಯಲ್ಲಿದ್ದ ಚಿನ್ನದ ಕೃತಕ ಹಲ್ಲುಗಳನ್ನು ಕಸಿದುಕೊಂಡು ಆರೋಪಿ ಪರಾರಿಯಾಗಿದ್ದಳು.

ಕ್ರಿಮಿನಲ್ ಹಿನ್ನೆಲೆ: ಬಂಧಿತ ಆರೋಪಿ ರೇಖಾಳ ವಿರುದ್ಧ ಈ ಹಿಂದೆ ಅಪಹರಣ, ಲೈಂಗಿಕ ದೌರ್ಜನ್ಯ ಹಾಗೂ ಜೀವ ಬೆದರಿಕೆ ಹಾಕಿದ ಪ್ರಕರಣಗಳು ದಾಖಲಾಗಿವೆ.

ಎಸ್‌ಐಟಿ ತನಿಖೆ ಹಾಗೂ ಬಂಧನ: ಪ್ರಕರಣದ ಗಂಭೀರತೆ ಪರಿಗಣಿಸಿ ರಚಿಸಲಾದ ಎಸ್‌ಐಟಿ ತಂಡವು ತಾಂತ್ರಿಕ ಸಾಕ್ಷ್ಯಗಳ ಆಧಾರದ ಮೇಲೆ ಆರೋಪಿಯನ್ನು ಬಂಧಿಸಿ, ಆಕೆಯ ಬಟ್ಟೆ ಹಾಗೂ ಮೊಬೈಲ್ ವಶಪಡಿಸಿಕೊಂಡಿದೆ.

ಸಣ್ಣ ಮೊತ್ತದ ಹಣಕ್ಕಾಗಿ ನಡೆದ ಈ ಕೃತ್ಯ ಸ್ಥಳೀಯರಲ್ಲಿ ತೀವ್ರ ಆತಂಕ ಹಾಗೂ ಆಘಾತವನ್ನುಂಟುಮಾಡಿದೆ.