ಆಸ್ಪತ್ರೆಗೆ ಬಂದಿದ್ದ ಯುವತಿ ಮೇಲೆ ಲೈಂಗಿಕ ದೌರ್ಜನ್ಯ: ವೈದ್ಯಕೀಯ ತಪಾಸಣೆ ನೆಪದಲ್ಲಿ ಚೇಷ್ಟೆ ಮಾಡಿದ್ದ ವೈದ್ಯನ ಬಂಧನ!

ಅಹಮದಾಬಾದ್: ವೈದ್ಯಕೀಯ ತಪಾಸಣೆ ನೆಪದಲ್ಲಿ ಯುವತಿ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ಆರೋಪದ ಮೇಲೆ ಗುಜರಾತ್‌ನ ಅಹಮದಾಬಾದ್‌ನಲ್ಲಿ ವೈದ್ಯನೊಬ್ಬನನ್ನು ವಸ್ತ್ರಾಪುರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತ ಆರೋಪಿಯನ್ನು ಮೆಮ್‌ನಗರದಲ್ಲಿರುವ ‘ಅಹಮದಾಬಾದ್ ಗ್ಯಾಸ್ಟ್ರೋ ಮತ್ತು ಲಿವರ್ ಆಸ್ಪತ್ರೆ’ಯ ವೈದ್ಯ ಡಾ. ವ್ರಜ್ ಸತೀಶ್‌ಕುಮಾರ್ ಪಟೇಲ್ (ಥಲ್ತೇಜ್ ನಿವಾಸಿ) ಎಂದು ಗುರುತಿಸಲಾಗಿದೆ.

ಘಟನೆಯ ವಿವರ:

ವಸ್ತ್ರಾಪುರ ಪ್ರದೇಶದಲ್ಲಿ ವಾಸಿಸುತ್ತಿರುವ 25 ವರ್ಷದ ಯುವತಿಯೊಬ್ಬರು ತೀವ್ರ ಹೊಟ್ಟೆಯ ಹುಣ್ಣು (ಗ್ಯಾಸ್ಟ್ರಿಕ್ ಅಲ್ಸರ್) ಸಮಸ್ಯೆಯಿಂದ ಬಳಲುತ್ತಿದ್ದರು. ಆರಂಭದಲ್ಲಿ ಆಸ್ಪತ್ರೆಗೆ ಭೇಟಿ ನೀಡಿದ್ದಾಗ ಡಾ. ವ್ರಜ್ ಪಟೇಲ್ ತಪಾಸಣೆ ನಡೆಸಿ, ಸೋನೋಗ್ರಫಿ ಮಾಡಿ ಔಷಧಗಳನ್ನು ನೀಡಿದ್ದರು. ಆದರೆ ಔಷಧ ಸೇವಿಸಿದರೂ ಆರೋಗ್ಯ ಸುಧಾರಿಸದ ಹಿನ್ನೆಲೆಯಲ್ಲಿ ಅಕ್ಟೋಬರ್ 1 ರಂದು ಕುಟುಂಬಸ್ಥರೊಂದಿಗೆ ಬಂದಿದ್ದ ಯುವತಿಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು.

ಅಂದು ರಾತ್ರಿ ಸುಮಾರು 8 ಗಂಟೆಗೆ, ತಪಾಸಣೆ ನೆಪದಲ್ಲಿ ಕೊಠಡಿಗೆ ಕರೆದ ವೈದ್ಯ, ಮಹಿಳಾ ಸಿಬ್ಬಂದಿ ಯಾರೂ ಇಲ್ಲದ ಸಮಯದಲ್ಲಿ ಗ್ಲೌಸ್ ಧರಿಸದೇ ಆಕೆಯ ಎದೆಭಾಗದ ತಪಾಸಣೆ ನಡೆಸಿ ಕಿರುಕುಳ ನೀಡಿದ್ದಾನೆ.

ಮರುದಿನ ಅಂದರೆ ಅಕ್ಟೋಬರ್ 2 ರಂದು ಸಂಜೆ 6:30ರ ಸುಮಾರಿಗೆ ಆರೋಪಿ ವೈದ್ಯ ಯುವತಿಯನ್ನು ಆಸ್ಪತ್ರೆಯ ರೂಮ್ ನಂಬರ್ 5ಕ್ಕೆ ಕರೆದೊಯ್ದು ಒಳಗಿನಿಂದ ಬಾಗಿಲು ಹಾಕಿಕೊಂಡಿದ್ದಾನೆ. ತಪಾಸಣೆ ನಡೆಸಬೇಕೆಂದು ಹೇಳಿ, ಮಹಿಳಾ ಸಿಬ್ಬಂದಿಯ ಗೈರುಹಾಜರಿಯಲ್ಲಿ ಆಕೆಯ ಒಳ ಉಡುಪುಗಳನ್ನು ತೆಗೆಸಿ, ಅಸಭ್ಯವಾಗಿ ಸ್ಪರ್ಶಿಸಿದ್ದಾನೆ. ಅಲ್ಲದೆ, ಗ್ಲೌಸ್ ಧರಿಸದೆ ಯುವತಿಯ ಖಾಸಗಿ ಅಂಗಗಳಿಗೆ ಬೆರಳಿಟ್ಟು ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಪೊಲೀಸ್ ದೂರು ಮತ್ತು ಬಂಧನ:

ವೈದ್ಯನ ವಿಕೃತಿಯಿಂದ ಆಘಾತಕ್ಕೊಳಗಾದ ಯುವತಿ ತಕ್ಷಣವೇ ಕುಟುಂಬದವರಿಗೆ ವಿಷಯ ತಿಳಿಸಿದ್ದಾರೆ. ಕುಟುಂಬಸ್ಥರ ನೆರವಿನಿಂದ ವಸ್ತ್ರಾಪುರ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ.

ದೂರಿನ ಆಧಾರದ ಮೇಲೆ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 64(1) ( ಅತ್ಯಾಚಾರ) ಹಾಗೂ ಸೆಕ್ಷನ್ 74 (ಮಹಿಳೆಯ ಮಾನಭಂಗ ಅಥವಾ ಉಡುಪು ತೆಗೆಯುವ ಉದ್ದೇಶದಿಂದ ಹಲ್ಲೆ) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಅಕ್ಟೋಬರ್ 4 ರಂದು ಆರೋಪಿ ವೈದ್ಯ ವ್ರಜ್ ಪಟೇಲ್‌ನನ್ನು ಬಂಧಿಸಿದ ಪೊಲೀಸರು, ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ನ್ಯಾಯಾಲಯ ಆತನನ್ನು ಸೆಂಟ್ರಲ್ ಜೈಲಿಗೆ ಕಳುಹಿಸಿದೆ. ವಸ್ತ್ರಾಪುರ ಠಾಣೆ ಪೊಲೀಸರು ಘಟನೆಗೆ ಸಂಬಂಧಿಸಿದಂತೆ ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.