ರಸಗುಲ್ಲಾ ಎಂದು ಭಾವಿಸಿ ನಾಡಬಾಂಬ್ ಕಚ್ಚಿದ ಯುವಕ: ಬಾಯಲ್ಲೇ ಸ್ಫೋಟಗೊಂಡು ದಾರುಣ ಸಾವು!

ದಿಂಡೋರಿ (ಮಧ್ಯಪ್ರದೇಶ): ದೀಪಾವಳಿ ಹಬ್ಬದ ಸಂಭ್ರಮದ ನಡುವೆ ಮಧ್ಯಪ್ರದೇಶದ ದಿಂಡೋರಿ ಜಿಲ್ಲೆಯಲ್ಲಿ ಅತ್ಯಂತ ಭೀಕರ ಹಾಗೂ ವಿಚಿತ್ರ ಘಟನೆಯೊಂದು ನಡೆದಿದೆ. ರಸಗುಲ್ಲಾ ಎಂದು ಭಾವಿಸಿ ನಾಡಬಾಂಬ್ ಅನ್ನು ಬಾಯಿಗೆ ಹಾಕಿಕೊಂಡು ಕಚ್ಚಿದ 35 ವರ್ಷದ ಯುವಕನೊಬ್ಬ, ಅದು ಬಾಯಲ್ಲೇ ಸ್ಫೋಟಗೊಂಡ ಪರಿಣಾಮ ದಾರುಣವಾಗಿ ಮೃತಪಟ್ಟಿದ್ದಾನೆ. ಮೃತರನ್ನು ಪಡರಿಯಾ ಛಾಂಟಾ ಗ್ರಾಮದ ನಿವಾಸಿ ರಾಜೇಂದ್ರ ಬರೌಟಿಯಾ ಎಂದು ಗುರುತಿಸಲಾಗಿದೆ.

ಮಂಗಳವಾರ ರಾತ್ರಿ 8 ಗಂಟೆಯ ಸುಮಾರಿಗೆ ರಾಜೇಂದ್ರ ಅವರು ತಮ್ಮ ಮನೆಯ ಅಂಗಳದಲ್ಲಿ ಬೆಂಕಿ ಕಾಯಿಸುತ್ತಾ ಕುಳಿತಿದ್ದರು. ಈ ವೇಳೆ ಅಲ್ಲಿಗೆ ಬಂದ ಅದೇ ಗ್ರಾಮದ ಪರಿಚಯಸ್ಥ ರಾಮಭಗತ್ ಬರೌಟಿಯಾ ಎಂಬಾತ, ಮಾತನಾಡುತ್ತಾ ತಮಾಷೆ ಮಾಡುವ ಭರದಲ್ಲಿ ರಾಜೇಂದ್ರ ಅವರಿಗೆ ರಸಗುಲ್ಲಾ ರೂಪದಲ್ಲಿದ್ದ ವಸ್ತುವೊಂದನ್ನು ತಿನ್ನಲು ನೀಡಿದ್ದಾನೆ. ಸಿಹಿತಿಂಡಿ ಎಂದು ನಂಬಿದ ರಾಜೇಂದ್ರ ಅದನ್ನು ಬಾಯಿಗೆ ಹಾಕಿಕೊಂಡು ಕಚ್ಚಿದ ತಕ್ಷಣ ಭಾರಿ ಶಬ್ದದೊಂದಿಗೆ ಸ್ಫೋಟಗೊಂಡಿದೆ. ಸ್ಫೋಟದ ತೀವ್ರತೆಗೆ ಅವರ ಬಾಯಿ ಮತ್ತು ದವಡೆ ಸಂಪೂರ್ಣವಾಗಿ ಛಿದ್ರಗೊಂಡಿದ್ದು, ತಕ್ಷಣವೇ ಅವರನ್ನು ದಿಂಡೋರಿ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ.

ಸ್ಫೋಟಕದ ಸ್ವರೂಪ: ಗ್ರಾಮೀಣ ಮತ್ತು ಬುಡಕಟ್ಟು ಪ್ರದೇಶಗಳಲ್ಲಿ ಕಾಡುಹಂದಿಗಳನ್ನು ಬೇಟೆಯಾಡಲು ಬಳಸುವ ನಾಡಬಾಂಬ್ (Pig-killer bomb) ಇದಾಗಿದೆ. ಹಿಟ್ಟಿನ ಉಂಡೆಯೊಳಗೆ ಪಟಾಕಿ ಅಥವಾ ಕಲ್ಲು ಕ್ವಾರಿಗಳಲ್ಲಿ ಬಳಸುವ ಸಿಡಿಮದ್ದನ್ನು ತುಂಬಿ ಇದನ್ನು ತಯಾರಿಸಲಾಗುತ್ತದೆ.

ರಸಗುಲ್ಲಾದಂತೆ ಗೋಚರ: ಗುಂಡಾಕಾರದಲ್ಲಿದ್ದ ಈ ನಾಡಬಾಂಬ್ ನೋಡಲು ಥೇಟ್ ರಸಗುಲ್ಲಾದಂತೆಯೇ ಕಾಣುತ್ತಿದ್ದ ಕಾರಣ ಮೃತ ರಾಜೇಂದ್ರ ಮೋಸಹೋಗಿದ್ದಾರೆ.

ಪೊಲೀಸ್ ಕ್ರಮ: ಆರೋಪಿ ರಾಮಭಗತ್ ಬರೌಟಿಯಾ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 105 (ಕೊಲೆಯಲ್ಲದ ನರಹತ್ಯೆ) ಮತ್ತು ಸ್ಫೋಟಕ ವಸ್ತುಗಳ ಕಾಯ್ದೆಯ ಸೆಕ್ಷನ್ 3 ಹಾಗೂ 4ರ ಅಡಿಯಲ್ಲಿ ದಿಂಡೋರಿ ಕೊಟ್ವಾಲಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.