ಅಕ್ರಮ ಸಂಬಂಧದ ಶಂಕೆ: ಕೊಲೆ ಮಾಡಿ ಅತ್ಯಾಚಾರದ ಕಥೆ ಸೃಷ್ಟಿಸಿದ ಪತಿ ಸಿಕ್ಕಿಬಿದ್ದಿದ್ದು ಹೇಗೆ?

ಹೋಷಿಯಾರ್‌ಪುರ (ಪಂಜಾಬ್): ಪಂಜಾಬ್‌ನ ಹೋಷಿಯಾರ್‌ಪುರ ಜಿಲ್ಲೆಯಲ್ಲಿ ಅಮಾನವೀಯ ಘಟನೆಯೊಂದು ನಡೆದಿದ್ದು, ಹೆಂಡತಿಯ ಮೇಲೆ ಅಕ್ರಮ ಸಂಬಂಧ ಶಂಕಿಸಿದ್ದ ಪತಿಯೊಬ್ಬ ಆಕೆಯನ್ನು ಕತ್ತು ಹಿಸುಕಿ ಕೊಲೆ ಮಾಡಿದ್ದಾನೆ. ಅಲ್ಲದೆ, ತನ್ನ ಕೃತ್ಯವನ್ನು ಅತ್ಯಾಚಾರ ಮತ್ತು ಕೊಲೆ ಪ್ರಕರಣದಂತೆ ತಿರುಚಲು ಯತ್ನಿಸಿ, ಮೃತದೇಹದ ಬಟ್ಟೆಗಳನ್ನು ಕಳಚಿ ಕಬ್ಬಿನ ಗದ್ದೆಯಲ್ಲಿ ಎಸೆದಿದ್ದ ಆರೋಪಿಯನ್ನು ಮುಕೇರಿಯನ್ ಪೊಲೀಸರು ಬಂಧಿಸಿದ್ದಾರೆ.

ಮೃತರನ್ನು ರುಬಿನಾ ಖಾತುನ್ ಎಂದು ಗುರುತಿಸಲಾಗಿದ್ದು, ಆರೋಪಿ ಪತಿ ಜಾಹದುರ್ ಇಸ್ಲಾಂ ಪಶ್ಚಿಮ ಬಂಗಾಳದ ಮಾಲ್ದಾ ಜಿಲ್ಲೆಯ ಮೂಲದವನಾಗಿದ್ದಾನೆ. ಈ ದಂಪತಿ ಪಂಜಾಬ್‌ನ ಮುಕೇರಿಯನ್ ಪ್ರದೇಶದ ಮದಿನ್‌ಪುರ ಗ್ರಾಮದಲ್ಲಿ ವಾಸವಿದ್ದು, ಒಳಚರಂಡಿ ಸ್ವಚ್ಛಗೊಳಿಸುವ ಕೆಲಸ ಮಾಡುತ್ತಿದ್ದರು. ಪತ್ನಿಯ ನಡತೆಯ ಮೇಲೆ ಅನುಮಾನಪಟ್ಟಿದ್ದ ಪತಿ ಜಗಳವಾಡುತ್ತಿದ್ದನು. ಕೆಲವು ದಿನಗಳ ಹಿಂದೆ ಕೆಲಸ ಮುಗಿಸಿ ಮರಳಿ ಬರುವಾಗ ರುಬಿನಾಳನ್ನು ಕಬ್ಬಿನ ಗದ್ದೆಗೆ ಕರೆದೊಯ್ದು ಟವೆಲ್‌ನಿಂದ (ಗಮ್ಛಾ) ಕತ್ತು ಹಿಸುಕಿ ಬರ್ಬರವಾಗಿ ಹತ್ಯೆ ಮಾಡಿದ್ದಾನೆ.

ಕೊಲೆ ಮುಚ್ಚಿಹಾಕಲು ಯತ್ನ: ಪತ್ನಿಯನ್ನು ಕೊಂದ ಬಳಿಕ ಪ್ರಕರಣದ ದಿಕ್ಕು ತಪ್ಪಿಸಲು ಹಾಗೂ ಲೈಂಗಿಕ ದೌರ್ಜನ್ಯದಂತೆ ಬಿಂಬಿಸಲು ಆರೋಪಿ ಆಕೆಯ ಬಟ್ಟೆಗಳನ್ನು ಕಳಚಿ ಕಬ್ಬಿನ ಗದ್ದೆಯಲ್ಲಿ ಶವವನ್ನು ಎಸೆದಿದ್ದನು.

ಬಂಧನದ ವಿವರ: ಹೆಂಡತಿ ನಾಪತ್ತೆಯಾಗಿದ್ದಾಳೆ ಎಂದು ಮೈದುನನಿಗೆ ಫೋನ್ ಮಾಡಿ ನಾಟಕವಾಡಿದ್ದ ಆರೋಪಿ. ಬಳಿಕ ಮೃತರ ಸಹೋದರರು ಬಂದು ತೀವ್ರವಾಗಿ ವಿಚಾರಣೆ ನಡೆಸಿದಾಗ ತಾನೇ ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾನೆ.

ಪೊಲೀಸ್ ಕ್ರಮ: ಪ್ರಕರಣ ದಾಖಲಿಸಿಕೊಂಡಿರುವ ಮುಕೇರಿಯನ್ ಪೊಲೀಸರು ಆರೋಪಿ ಜಾಹದುರ್ ಇಸ್ಲಾಂನನ್ನು ಬಂಧಿಸಿದ್ದು, ಭಾರತೀಯ ನ್ಯಾಯ ಸಂಹಿತೆ (BNS) ಕಾಯ್ದೆಯಡಿ ಸೂಕ್ತ ಕಾನೂನು ಕ್ರಮ ಜರುಗಿಸಿದ್ದಾರೆ.