ಡ್ರೈವಿಂಗ್ ಲೈಸೆನ್ಸ್ ವಿಳಾಸ ಬದಲಾವಣೆ ಇನ್ಮುಂದೆ ಉಚಿತ: 30 ದಿನಗಳಲ್ಲಿ ಆರ್‌ಟಿಒ ಸ್ಪಂದಿಸದಿದ್ದರೆ ಸ್ವಯಂಚಾಲಿತ ಅನುಮತಿಗೆ ಕೇಂದ್ರದ ಮಹತ್ವದ ಹೆಜ್ಜೆ!

ನವದೆಹಲಿ: ನಿಮ್ಮ ಚಾಲನಾ ಪರವಾನಗಿಯಲ್ಲಿ (ಡ್ರೈವಿಂಗ್ ಲೈಸೆನ್ಸ್) ವಿಳಾಸ ಬದಲಾವಣೆ ಮಾಡಿಕೊಳ್ಳುವುದು ಶೀಘ್ರದಲ್ಲೇ ಉಚಿತವಾಗುವ ಸಾಧ್ಯತೆಯಿದೆ. ಅಷ್ಟೇ ಅಲ್ಲದೆ, ಪ್ರಾದೇಶಿಕ ಸಾರಿಗೆ ಕಚೇರಿಯು (ಆರ್‌ಟಿಒ) ನಿಮ್ಮ ಅರ್ಜಿಯನ್ನು 30 ದಿನಗಳ ಒಳಗಾಗಿ ಸ್ವೀಕರಿಸದಿದ್ದರೆ ಅಥವಾ ತಿರಸ್ಕರಿಸದಿದ್ದರೆ, ಅದನ್ನು ಸ್ವಯಂಚಾಲಿತವಾಗಿ ಅನುಮೋದಿಸಲಾಗಿದೆ (ಡೀಮ್ಡ್ ಅಪ್ರೂವ್ಡ್) ಎಂದು ಪರಿಗಣಿಸುವ ಹೊಸ ನಿಯಮವನ್ನು ಕೇಂದ್ರ ಸರ್ಕಾರ ಪ್ರಸ್ತಾಪಿಸಿದೆ.

ಕೇಂದ್ರ ಮೋಟಾರು ವಾಹನ ಕಾಯ್ದೆ-1989 ರ ತಿದ್ದುಪಡಿ ಕರಡು ನಿಯಮಗಳಲ್ಲಿ ಈ ಮಹತ್ವದ ಬದಲಾವಣೆಗಳನ್ನು ತರಲಾಗಿದ್ದು, ಲೈಸೆನ್ಸ್ ಸಂಬಂಧಿತ ಸೇವೆಗಳನ್ನು ಸರಳಗೊಳಿಸುವುದು ಮತ್ತು ಅರ್ಜಿಗಳ ವಿಲೇವಾರಿ ಸಮಯವನ್ನು ಕಡಿತಗೊಳಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.

ಉಚಿತ ಸೇವೆಗಳು: ಡ್ರೈವಿಂಗ್ ಲೈಸೆನ್ಸ್‌ನಲ್ಲಿ ಹೆಸರು, ವಿಳಾಸ, ಮೊಬೈಲ್ ಸಂಖ್ಯೆ ಹಾಗೂ ಇಮೇಲ್ ಐಡಿ ಬದಲಾವಣೆಗೆ ಪ್ರಸ್ತುತ ಇರುವ ರೂ. 200 ಶುಲ್ಕವನ್ನು ಸಂಪೂರ್ಣವಾಗಿ ರದ್ದುಗೊಳಿಸಲು ಪ್ರಸ್ತಾಪಿಸಲಾಗಿದೆ.

ಆಧಾರ್ ಆಧಾರಿತ ರಿಯಾಯಿತಿ: ಕರಡು ನಿಯಮ 32 ರ ಅಡಿಯಲ್ಲಿ ಆನ್‌ಲೈನ್ ಆಧಾರ್ ದೃಢೀಕರಣದ ಮೂಲಕ ಪಡೆಯುವ ಸೇವೆಗಳಿಗೆ ಯಾವುದೇ ಶುಲ್ಕ ಇರುವುದಿಲ್ಲ.

ವಾಹನ ಮಾಲೀಕರಿಗೆ ರಿಲೀಫ್: ವಾಹನ ನೋಂದಣಿ ದಾಖಲೆಗಳಲ್ಲಿ ವಿಳಾಸ ಬದಲಾವಣೆಗೆ ಇದ್ದ ಶುಲ್ಕವನ್ನು ರದ್ದುಗೊಳಿಸಲಾಗಿದೆ. ಜೊತೆಗೆ ಎನ್‌ಒಸಿ (NOC) ಸಲ್ಲಿಕೆ ವಿಳಂಬಕ್ಕೆ ವಿಧಿಸುತ್ತಿದ್ದ ತಿಂಗಳಿಗೆ ರೂ. 300 ರಿಂದ ರೂ. 500 ವರೆಗಿನ ದಂಡವನ್ನು ತೆರವುಗೊಳಿಸಲು ನಿರ್ಧರಿಸಲಾಗಿದೆ.

15 ದಿನಗಳ ಕಾಲಮಿತಿ: ನಿಯಮ 16A ಅಡಿಯಲ್ಲಿ ಲೈಸೆನ್ಸ್ ವಿವರ ತಿದ್ದುಪಡಿ ಅರ್ಜಿಗಳನ್ನು ಪರಿಶೀಲಿಸಲು ಆರ್‌ಟಿಒ ಅಧಿಕಾರಿಗಳಿಗೆ 15 ದಿನಗಳ ಕಾಲಾವಕಾಶ ನೀಡಲಾಗುತ್ತದೆ. ಅರ್ಜಿ ತಿರಸ್ಕರಿಸಿದರೆ ಸೂಕ್ತ ವಿವರಣೆಯನ್ನು ಲಿಖಿತ ಅಥವಾ ಎಲೆಕ್ಟ್ರಾನಿಕ್ ರೂಪದಲ್ಲಿ ಅರ್ಜಿದಾರರಿಗೆ ತಿಳಿಸುವುದು ಕಡ್ಡಾಯ.

30 ದಿನಗಳಲ್ಲಿ ಸ್ವಯಂಚಾಲಿತ ಅನುಮೋದನೆ: ವಿಳಾಸ ಬದಲಾವಣೆ ಕೋರಿ ಸಲ್ಲಿಸಿದ ಅರ್ಜಿಯ ಮೇಲೆ ಆರ್‌ಟಿಒ ಅಧಿಕಾರಿಗಳು 30 ದಿನಗಳಲ್ಲಿ ಯಾವುದೇ ಕ್ರಮ ಕೈಗೊಳ್ಳದಿದ್ದರೆ, ಅದು ಸ್ವಯಂಚಾಲಿತವಾಗಿ ಅನುಮೋದನೆಗೊಳ್ಳಲಿದೆ.

ಈ ಹೊಸ ಸೇವೆಗಳಿಗೆ ಅರ್ಜಿ ಸಲ್ಲಿಸಲು ‘ಫಾರಂ 2A’ ಪರಿಚಯಿಸಲಾಗುತ್ತಿದ್ದು, ಸಾರಥಿ (Sarathi) ಪೋರ್ಟಲ್ ಮೂಲಕ ಸುಲಭವಾಗಿ ಆನ್‌ಲೈನ್‌ನಲ್ಲೇ ದಾಖಲೆಗಳನ್ನು ಸಲ್ಲಿಸಿ ವಿದ್ಯುನ್ಮಾನ ಸಹಿ (E-signature) ಮೂಲಕ ಪ್ರಕ್ರಿಯೆ ಪೂರ್ಣಗೊಳಿಸಬಹುದಾಗಿದೆ. ಪ್ರಸ್ತುತ ಈ ನಿಯಮಗಳು ಕರಡು ಪ್ರಸ್ತಾಪಗಳಾಗಿದ್ದು, ಸಾರ್ವಜನಿಕರ ಸಲಹೆ ಮತ್ತು ಆಕ್ಷೇಪಣೆಗಳಿಗೆ 30 ದಿನಗಳ ಕಾಲಾವಕಾಶ ನೀಡಲಾಗಿದೆ.