ದಸರಾ ಆಚರಣೆಯಲ್ಲಿ ಸೀರೆ ಉಟ್ಟು ಎಕೆ-47 ಗನ್‌ನಿಂದ ಗಾಳಿಯಲ್ಲಿ ಗುಂಡು ಹಾರಿಸಿದ ಲೇಡಿ ಸಿಂಗಂ ಅಂಕಿತಾ ಶರ್ಮಾ: ವಿಡಿಯೋ ವೈರಲ್, ನಿವೃತ್ತ ಸೇನಾಧಿಕಾರಿಗಳಿಂದ ತೀವ್ರ ಆಕ್ಷೇಪ!

ರಾಯ್‌ಪುರ / ನವದೆಹಲಿ: ದಸರಾ (ವಿಜಯದಶಮಿ) ಹಬ್ಬದ ಅಂಗವಾಗಿ ಆಯೋಜಿಸಲಾಗಿದ್ದ ‘ಶಸ್ತ್ರಪೂಜೆ’ ಕಾರ್ಯಕ್ರಮದಲ್ಲಿ ಛತ್ತೀಸ್‌ಗಢದ ರಾಜನಂದಗಾಂವ್ ಜಿಲ್ಲೆಯ ಪೊಲೀಸ್ ವರಿಷ್ಠಾಧಿಕಾರಿ ಹಾಗೂ ಐಪಿಎಸ್ ಅಧಿಕಾರಿ ಅಂಕಿತಾ ಶರ್ಮಾ ಅವರು ಎಕೆ-47  ರೈಫಲ್‌ನಿಂದ ಗಾಳಿಯಲ್ಲಿ ಗುಂಡು ಹಾರಿಸಿರುವುದು ತೀವ್ರ ವಿವಾದಕ್ಕೆ ಕಾರಣವಾಗಿದೆ.

ಸೀರೆ ಧರಿಸಿ ಸೇವಾ ಶಸ್ತ್ರಾಸ್ತ್ರದಿಂದ ಗಾಳಿಯಲ್ಲಿ ಫೈರಿಂಗ್ ನಡೆಸುತ್ತಿರುವ ಅವರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಬೆನ್ನಲ್ಲೇ, ನಿವೃತ್ತ ಭಾರತೀಯ ಸೇನಾಧಿಕಾರಿಗಳು ಭದ್ರತಾ ನಿಯಮಗಳ ಉಲ್ಲಂಘನೆ ಮತ್ತು ಜವಾಬ್ದಾರಿಯ ಕುರಿತು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಸೇನಾಧಿಕಾರಿಗಳಿಂದ ತೀವ್ರ ವೀರೋಧ:

ಲೆಫ್ಟಿನೆಂಟ್ ಜನರಲ್ ಕೆ.ಜೆ.ಎಸ್. ಧಿಲ್ಲೋನ್: “ಆಯುಧ ನಿರ್ವಹಣೆಯ ಎಲ್ಲಾ ಮೂಲಭೂತ ಸುರಕ್ಷತಾ ನಿಯಮಗಳನ್ನು ಇಲ್ಲಿ ಗಾಳಿಗೆ ತೂರಲಾಗಿದೆ. ಅಧಿಕೃತವಲ್ಲದ ಉಡುಪಿನಲ್ಲಿ ಸೇವಾ ಶಸ್ತ್ರಾಸ್ತ್ರ ಬಳಸಿ ಗಾಳಿಯಲ್ಲಿ ಗುಂಡು ಹಾರಿಸುವುದು ಜವಾಬ್ದಾರಿಯಿಲ್ಲದ ಅಧಿಕಾರದ ಪ್ರದರ್ಶನ. ಹಿನ್ನೆಲೆಯಲ್ಲಿದ್ದ ಜನರು ಭೀತಿಗೆ ಒಳಗಾಗಿದ್ದು ಸ್ಪಷ್ಟವಾಗಿ ಕಾಣುತ್ತಿದೆ. ಇಂತಹ ಘಟನೆಗಳ ವಿರುದ್ಧ ಶಿಸ್ತು ಕ್ರಮ ಜರುಗಿಸಬೇಕು” ಎಂದು ಎಕ್ಸ್ (X) ನಲ್ಲಿ ಕಿಡಿಕಾರಿದ್ದಾರೆ.

ಲೆಫ್ಟಿನೆಂಟ್ ಕರ್ನಲ್ ಸುಶೀಲ್ ಸಿಂಗ್ ಶೇರಾನ್: “ಅಧಿಕಾರಿಗೆ ಶಸ್ತ್ರಾಸ್ತ್ರ ನಿರ್ವಹಣೆಯ ಅನುಭವ ಇರುವುದು ಹೌದಾದರೂ, ಗಾಳಿಯಲ್ಲಿ ಗುಂಡು ಹಾರಿಸಿ ಮದ್ದುಗುಂಡು ವ್ಯರ್ಥ ಮಾಡುವುದು ಮತ್ತು ಸಾರ್ವಜನಿಕ ಸ್ಥಳದಲ್ಲಿ ಸುರಕ್ಷತಾ ನಿಯಮ ಮೀರುವುದು ಸರಿಯಲ್ಲ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ಲೆಫ್ಟಿನೆಂಟ್ ಕರ್ನಲ್ ಸಂದೀಪ್ ಅಹ್ಲಾವತ್: “ಶಸ್ತ್ರಪೂಜೆ ಎಂಬುದು ಆಯುಧಗಳಿಗೆ ಗೌರವ ಹಾಗೂ ಪೂಜೆ ಸಲ್ಲಿಸುವ ವಿಧಿ, ಪ್ರದರ್ಶನಕ್ಕಾಗಿ ಗಾಳಿಯಲ್ಲಿ ಗುಂಡು ಹಾರಿಸುವುದಲ್ಲ” ಎಂದು ನೆನಪಿಸಿದ್ದಾರೆ.

ಭದ್ರತೆ ಮತ್ತು ಕಾನೂನು ಕಳವಳ:

ಎಕೆ-47 ಗನ್‌ನಿಂದ ಹೊರಬರುವ 7.62mm ಗುಂಡುಗಳು ಸೆಕೆಂಡಿಗೆ ಸುಮಾರು 715 ಮೀಟರ್ ವೇಗದಲ್ಲಿ ಚಲಿಸುತ್ತವೆ. ಗಾಳಿಯಲ್ಲಿ ಹಾರಿಸಿದ ಗುಂಡುಗಳು ಮರಳಿ ಕೆಳಗೆ ಬೀಳುವಾಗ ಸಾರ್ವಜನಿಕರಿಗೆ ಮಾರಕ ಪೆಟ್ಟು ನೀಡುವ ಅಪಾಯವಿರುತ್ತದೆ. ಸಾರ್ವಜನಿಕ ಅಥವಾ ಧಾರ್ಮಿಕ ಸಮಾರಂಭಗಳಲ್ಲಿ ನಿರ್ಲಕ್ಷ್ಯದಿಂದ ಗಾಳಿಯಲ್ಲಿ ಫೈರಿಂಗ್ ನಡೆಸುವುದು ಶಿಕ್ಷಾರ್ಹ ಅಪರಾಧವಾಗಿದ್ದು, 2 ವರ್ಷಗಳವರೆಗೆ ಜೈಲು ಶಿಕ್ಷೆ ಅಥವಾ 1 ಲಕ್ಷ ರೂ. ವರೆಗೆ ದಂಡ ವಿಧಿಸಲು ಅವಕಾಶವಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಲಕ್ಷಾಂತರ ಫಾಲೋವರ್ಸ್‌ಗಳನ್ನು ಹೊಂದಿರುವ ‘ಲೇಡಿ ಸಿಂಗಂ’ ಎಂದೇ ಖ್ಯಾತರಾದ ಅಂಕಿತಾ ಶರ್ಮಾ ಅವರ ಈ ಕೃತ್ಯವು, ಅಧಿಕಾರಿಗಳ ಉತ್ತರದಾಯಿತ್ವ ಮತ್ತು ಸೋಶಿಯಲ್ ಮೀಡಿಯಾ ಪ್ರದರ್ಶನ ಪ್ರವೃತ್ತಿಯ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ದೊಡ್ಡ ಚರ್ಚೆಗೆ ಗ್ರಾಸವಾಗಿದೆ.