ಅಡುಗೆ ಮನೆಯಲ್ಲಿ ಬೆಂಕಿ ಹೊತ್ತಿಕೊಂಡಾಗ ಅಪಾಯದಿಂದ ಪಾರು ಮಾಡಿದ ಡೆಲಿವರಿ ಬಾಯ್: ಪ್ರಾಣ ಉಳಿಸುವ ವೈದ್ಯೆಯ ಪ್ರಾಣ ಉಳಿಸಿದ ಯುವಕ!

ಮೊಹಾಲಿ: ಪಂಜಾಬ್‌ನ ಮೊಹಾಲಿಯಲ್ಲಿ ವೈದ್ಯೆಯೊಬ್ಬರ ಅಡುಗೆಮನೆಯಲ್ಲಿ ಆಕಸ್ಮಿಕವಾಗಿ ಬೆಂಕಿ ಕಾಣಿಸಿಕೊಂಡು ಆತಂಕದ ವಾತಾವರಣ ನಿರ್ಮಾಣವಾದಾಗ, ಅದೇ ಸಮಯದಲ್ಲಿ ಪಾರ್ಸೆಲ್ ತಲುಪಿಸಲು ಬಂದ ಡೆಲಿವರಿ ಉದ್ಯೋಗಿಯೊಬ್ಬರು ಸಮಯಪ್ರಜ್ಞೆ ಮೆರೆದು ದೊಡ್ಡ ದುರಂತವನ್ನು ತಪ್ಪಿಸಿದ್ದಾರೆ.

ವೈದ್ಯೆ ಡಾ. ಶಿವಾಂಗಿ ಜೋಶಿ ಅವರ ಮನೆಯಲ್ಲಿ ಈ ಘಟನೆ ನಡೆದಿದ್ದು, ಡೆಲಿವರಿ ಬಾಯ್‌ನ ಈ ಸಾಹಸದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಡಾ. ಶಿವಾಂಗಿ ಜೋಶಿ ಅವರು ತಮ್ಮ ಮನೆಗೆ ಬಂದ ಕೊರಿಯರ್ ಸ್ವೀಕರಿಸಲು ಬಾಗಿಲಿಗೆ ತೆರಳಿದ್ದ ಸಂದರ್ಭದಲ್ಲಿ, ಅಡುಗೆಮನೆಯ ಸ್ಟೌವ್ ಮೇಲಿಟ್ಟಿದ್ದ ಪಾತ್ರೆಯಲ್ಲಿ ಬೆಂಕಿ ಕಾಣಿಸಿಕೊಂಡು ದಟ್ಟ ಹೊಗೆ ಹಬ್ಬಿದೆ. ಇದನ್ನು ಕಂಡು ಬೆಚ್ಚಿಬಿದ್ದ ವೈದ್ಯರಿಗೆ ಏನು ಮಾಡಬೇಕೆಂದು ತಿಳಿಯದಾಗಿದ್ದು, ತಕ್ಷಣವೇ ಅಲ್ಲಿಗೆ ಧಾವಿಸಿದ ಡೆಲಿವರಿ ಉದ್ಯೋಗಿ ಯಾವುದೇ ಯೋಚನೆ ಮಾಡದೆ ಬೆಂಕಿಯನ್ನು ನಂದಿಸಲು ಮುಂದಾಗಿದ್ದಾರೆ. ಅಷ್ಟೇ ಅಲ್ಲದೆ, ಗ್ಯಾಸ್ ಸರಬರಾಜನ್ನು ಸ್ಥಗಿತಗೊಳಿಸುವ ಮೂಲಕ ಭಾರೀ ದೊಡ್ಡ ಅನಾಹುತವನ್ನು ತಪ್ಪಿಸಿದ್ದಾರೆ.

ಸಮಯಪ್ರಜ್ಞೆ ಮತ್ತು ಧೈರ್ಯ: ಆಪತ್ಕಾಲದಲ್ಲಿ ಡೆಲಿವರಿ ಉದ್ಯೋಗಿ ತೋರಿದ ತಕ್ಷಣದ ಪ್ರತಿಕ್ರಿಯೆ ಹಾಗೂ ಸಾಹಸಮಯ ಕಾರ್ಯದಿಂದಾಗಿ ದೊಡ್ಡ ಪ್ರಮಾಣದ ಅಗ್ನಿ ದುರಂತ ತಪ್ಪಿದೆ.

ಮಾನವೀಯತೆ: ವೃತ್ತಿ ಅಥವಾ ಉದ್ಯೋಗ ನೋಡಿ ಜನರನ್ನು ಅಳಿಯಬಾರದು ಎಂಬುದಕ್ಕೆ ಈ ಘಟನೆ ಜೀವಂತ ಸಾಕ್ಷಿಯಾಗಿದೆ ಎಂದು ಡಾ. ಶಿವಾಂಗಿ ಜೋಶಿ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆ: ಈ ಸಿಸಿಟಿವಿ ದೃಶ್ಯಾವಳಿಗಳು ಇಂಟರ್‌ನೆಟ್‌ನಲ್ಲಿ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದುಕೊಂಡಿದ್ದು, ಡೆಲಿವರಿ ಸಿಬ್ಬಂದಿಯ ನಿಸ್ವಾರ್ಥ ಸೇವೆಯನ್ನು ಎಲ್ಲರೂ ಕೊಂಡಾಡುತ್ತಿದ್ದಾರೆ.

ಈ ಅನಿರೀಕ್ಷಿತ ಘಟನೆಯು ಮಾನವೀಯತೆ ಇನ್ನೂ ಜೀವಂತವಾಗಿದೆ ಎಂಬುದನ್ನು ತೋರಿಸಿಕೊಟ್ಟಿದೆ ಎಂದು ಡಾ. ಜೋಶಿ ತಿಳಿಸಿದ್ದಾರೆ. ಕೆಲವರು ಪಾರ್ಸೆಲ್ ತಲುಪಿಸಿದರೆ, ಇನ್ನು ಕೆಲವರು ತೀರಾ ಸಂಕಷ್ಟದ ಸಮಯದಲ್ಲಿ ಆಶಾಕಿರಣವಾಗುತ್ತಾರೆ ಎಂದು ಅವರು ಡೆಲಿವರಿ ಬಾಯ್‌ನ ಕಾರ್ಯವನ್ನು ಸ್ಮರಿಸಿದ್ದಾರೆ.