ಇನ್‌ಸ್ಟಾಗ್ರಾಮ್ ಪರಿಚಯ, ಹಿಂದೂ ಪದ್ಧತಿಯಂತೆ ಮದುವೆ: ಪತಿ ಮುಸ್ಲಿಂ, ಈಗಾಗಲೇ ಮದುವೆಯಾಗಿದ್ದ ವಿಷಯ ತಿಳಿದ ಯುವತಿಗೆ ಆಘಾತ!

ಸೋನಿಪತ್ (ಹರ್ಯಾಣ): ಸಾಮಾಜಿಕ ಜಾಲತಾಣ ಇನ್‌ಸ್ಟಾಗ್ರಾಮ್ ಮೂಲಕ ಪರಿಚಯವಾಗಿ, ನಿಜವಾದ ಧರ್ಮ ಹಾಗೂ ಮೊದಲ ಮದುವೆಯನ್ನು ಮುಚ್ಚಿಟ್ಟು ಹಿಂದೂ ಆಚಾರ-ವಿಚಾರಗಳಂತೆ ಮದುವೆಯಾಗಿದ್ದ ಪತಿಯ ವಿರುದ್ಧ ಹರ್ಯಾಣದ ಸೋನಿಪತ್ ಮೂಲದ ಮಹಿಳೆಯೊಬ್ಬರು ಗಂಭೀರ ಆರೋಪ ಮಾಡಿ ಪೊಲೀಸರ ಮೆಟ್ಟಿಲೇರಿದ್ದಾರೆ.

ಆರೋಪಿಯನ್ನು ಸೋನಿಪತ್ ನಿವಾಸಿ ಜಾವೇದ್ ಖಾನ್ ಎಂದು ಗುರುತಿಸಲಾಗಿದೆ.

ಇನ್‌ಸ್ಟಾಗ್ರಾಮ್‌ನಲ್ಲಿ ‘ಜಾನಿ’ ಆದ ಜಾವೇದ್ ಖಾನ್:

ಬಾಧಿತ ಮಹಿಳೆಯ ದೂರಿನ ಪ್ರಕಾರ, ಇನ್‌ಸ್ಟಾಗ್ರಾಮ್‌ನಲ್ಲಿ ಆರೋಪಿಯು ತನ್ನ ಹೆಸರನ್ನು ‘ಜಾನಿ’ ಎಂದು ಹಾಗೂ ತಾನು ಹಿಂದೂ ಧರ್ಮಕ್ಕೆ ಸೇರಿದವನೆಂದು ಪರಿಚಯಿಸಿಕೊಂಡಿದ್ದ. ಇಬ್ಬರ ನಡುವಿನ ಸ್ನೇಹ ಕ್ರಮೇಣ ಪ್ರೇಮಕ್ಕೆ ತಿರುಗಿ, ಹಿಂದೂ ಸಂಪ್ರದಾಯದಂತೆ ಮದುವೆಯಾಗಿದ್ದರು. ಬಳಿಕ ಇಬ್ಬರೂ ಗಂಡ-ಹೆಂಡತಿಯಾಗಿ ಒಟ್ಟಿಗೆ ವಾಸಿಸಲು ಪ್ರಾರಂಭಿಸಿದ್ದರು.

ಬ್ಯಾಗ್‌ನಲ್ಲಿದ್ದ ಆಧಾರ್ ಕಾರ್ಡ್‌ನಿಂದ ಸತ್ಯ ಬಯಲಿಗೆ:

ಮದುವೆಯಾಗಿ ಸುಮಾರು ಆರು ತಿಂಗಳ ನಂತರ, ಮಹಿಳೆಗೆ ಪತಿಯ ಬ್ಯಾಗ್‌ನಲ್ಲಿ ಆಧಾರ್ ಕಾರ್ಡ್ ಒಂದರಲ್ಲಿ ‘ಜಾವೇದ್ ಖಾನ್’ ಎಂಬ ಹೆಸರು ಕಂಡುಬಂದಿದೆ. ಪರಿಶೀಲಿಸಿದಾಗ, ತಾನು ಮದುವೆಯಾದ ವ್ಯಕ್ತಿ ಮುಸ್ಲಿಂ ಸಮುದಾಯದವನು ಹಾಗೂ ಆತನಿಗೆ ಈಗಾಗಲೇ 12 ವರ್ಷಗಳ ಹಿಂದೆ ಮದುವೆಯಾಗಿ ಮೂರು ಮಕ್ಕಳಿದ್ದಾರೆ ಎಂಬ ಕಹಿ ಸತ್ಯ ಹೊರಬಿದ್ದಿದೆ.

ಮೊದಲ ಪತ್ನಿಯ ಆಗಮನ ಮತ್ತು ವಾಸಸ್ಥಳ ಬದಲಾವಣೆ:

ಈ ಸತ್ಯ ತಿಳಿಯುತ್ತಿದ್ದಂತೆಯೇ ಜಾವೇದ್ ಖಾನ್‌ನ ಮೊದಲ ಪತ್ನಿ ಇವರು ವಾಸವಿದ್ದ ಮನೆಗೆ ಬಂದು ಗಲಾಟೆ ಮಾಡಿ ಜಾವೇದ್‌ನನ್ನು ತನ್ನೊಂದಿಗೆ ಕರೆದೊಯ್ದಿದ್ದಳು. ಕೆಲವು ದಿನಗಳ ನಂತರ ಹಿಂತಿರುಗಿದ ಜಾವೇದ್, ತಾಯಂದಿರು ಹಾಗೂ ಕುಟುಂಬಸ್ಥರು ಆಕೆಯೊಂದಿಗೆ ವಾಸಿಸದಂತೆ ಒತ್ತಡ ಹೇರುತ್ತಿದ್ದಾರೆ ಎಂದು ತಿಳಿಸಿದ್ದ. ಆದಾಗ್ಯೂ, ಇಬ್ಬರೂ ಒಟ್ಟಿಗೆ ವಾಸಿಸುವುದನ್ನು ಮುಂದುವರಿಸಿ ಉತ್ತರ ಪ್ರದೇಶದ ಬುಧಾನಕ್ಕೆ ತೆರಳಿದ್ದರು. ಅಲ್ಲಿ ಅವರಿಗೆ ಒಂದು ಮಗು ಕೂಡ ಜನಿಸಿತ್ತು. ನಂತರ ಇಬ್ಬರೂ ಮತ್ತೆ ಸೋನಿಪತ್‌ಗೆ ಮರಳಿದ್ದರು.

ಮತಾಂತರಕ್ಕೆ ಒತ್ತಡ, ಕುಟುಂಬ ಸಮೇತ ಪತಿ ನಾಪತ್ತೆ:

ಕಳೆದ ಒಂದು ವಾರದಿಂದ ಜಾವೇದ್ ಖಾನ್ ಹಾಗೂ ಆತನ ಕುಟುಂಬಸ್ಥರು ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದಾರೆ. ಆ ಬಳಿಕ ಮಹಿಳೆ ಸ್ಥಳೀಯ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಜಾವೇದ್ ಖಾನ್ ಹಾಗೂ ಆತನ ಕುಟುಂಬದವರು ತನಗೆ ಮತ್ತು ತನ್ನ ಮಕ್ಕಳಿಗೆ ಇಸ್ಲಾಂ ಧರ್ಮಕ್ಕೆ ಮತಾಂತರವಾಗುವಂತೆ ಒತ್ತಡ ಹೇರುತ್ತಿದ್ದರು, ದೌರ್ಜನ್ಯ, ಹಲ್ಲೆ ಹಾಗೂ ಜೀವ ಬೆದರಿಕೆ ಒಡ್ಡುತ್ತಿದ್ದರು ಎಂದು ದೂರಿನಲ್ಲಿ ಗಂಭೀರ ಆರೋಪ ಮಾಡಿದ್ದಾರೆ.

ಈ ವಿಷಯ ತಿಳಿದ ‘ಹಿಂದೂ ರಕ್ಷಾ ಸೇನಾ’ ಸಂಘಟನೆಯ ಪ್ರತಿನಿಧಿಗಳು ಮಹಿಳೆಗೆ ಬೆಂಬಲವಾಗಿ ನಿಂತು, ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ. ಪ್ರಸ್ತುತ ಸೋನಿಪತ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದು, ತನಿಖೆಯ ಆಧಾರದ ಮೇಲೆ ಮುಂದಿನ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ತಿಳಿಸಿದ್ದಾರೆ.