ಲಿಂಗ ಪರಿವರ್ತನೆ ಶಸ್ತ್ರಚಿಕಿತ್ಸೆಗೆ ತಾಯಿ ವಿರೋಧ: ಲಕ್ನೋದಲ್ಲಿ ತಾಯಿಯನ್ನೇ ರೆಂಚ್‌ನಿಂದ ಹೊಡೆದು ಕೊಂದ 17 ವರ್ಷದ ಮಗ!

YogarajUpdated 3 hours Ago1 Mins read14

ಲಕ್ನೋ: ತನ್ನ ಲಿಂಗ ಬದಲಾವಣೆ ಶಸ್ತ್ರಚಿಕಿತ್ಸೆಗೆ ತಾಯಿ ವಿರೋಧ ವ್ಯಕ್ತಪಡಿಸಿದ ಕಾರಣಕ್ಕೆ, 17 ವರ್ಷದ ಅಪ್ರಾಪ್ತ ಮಗನೊಬ್ಬ ತನ್ನ ತಾಯಿಯನ್ನೇ ರೆಂಚ್‌ನಿಂದ ತಲೆಗೆ ಹೊಡೆದು ಭೀಕರವಾಗಿ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಲಕ್ನೋದ ನಾಕಾ ಹಿಂದೋಲಾ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಘಟನೆಯ ವಿವರ:

ಆರೋಪಿ ಅಪ್ರಾಪ್ತ ಬಾಲಕನು ತನ್ನನ್ನು ಮಹಿಳೆ ಎಂದು ಗುರುತಿಸಿಕೊಂಡಿದ್ದನು. ಆದರೆ, ಆತನ ಕುಟುಂಬಸ್ಥರು ಇದನ್ನು ಒಪ್ಪಿಕೊಳ್ಳಲು ಕಷ್ಟಪಡುತ್ತಿದ್ದರು. ಇದಕ್ಕಾಗಿ ಕೌನ್ಸೆಲಿಂಗ್ ಹಾಗೂ ವೈದ್ಯರ ಸಲಹೆಗಳನ್ನು ಕೊಡಿಸಲಾಗುತ್ತಿತ್ತು. ಆದರೆ, ಬಾಲಕನು ಲಿಂಗ ಪರಿವರ್ತನೆ ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳಲು ಪಟ್ಟು ಹಿಡಿದಿದ್ದನು.

ಗುರುವಾರ ಅಪ್ರಾಪ್ತ ಬಾಲಕನು ಮನೆಗೆ ಬಂದಾಗ, ಆತನ ತಾಯಿ ಶಸ್ತ್ರಚಿಕಿತ್ಸೆಯ ಬದಲು ವೈದ್ಯಕೀಯ ಮತ್ತು ಮಾನಸಿಕ ಕೌನ್ಸೆಲಿಂಗ್ ಪಡೆಯುವಂತೆ ಮತ್ತೊಮ್ಮೆ ತಿಳಿಹೇಳಿದ್ದಾರೆ. ಈ ವಿಷಯವಾಗಿ ಇಬ್ಬರ ನಡುವೆ ತೀವ್ರ ಮಾತಿನ ಚಕಮಕಿ ನಡೆದಿದ್ದು, ಕೋಪಗೊಂಡ ಬಾಲಕನು ತಾನು ತಂದಿದ್ದ ರೆಂಚ್‌ನಿಂದ ತಾಯಿಯ ತಲೆಗೆ ಬಲವಾಗಿ ಸಾಲು ಸಾಲು ಏಟುಗಳನ್ನು ನೀಡಿದ್ದಾನೆ. ತೀವ್ರ ರಕ್ತಸ್ರಾವದಿಂದ ತಾಯಿ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.

ಡೈರಿಯಲ್ಲಿ ಕೊಲೆಯ ಸಂಚು – ಚಾಟ್‌ಜಿಪಿಟಿ ಬಳಕೆ:

ಪೋಲಿಸರ ತನಿಖೆಯ ವೇಳೆ ಆಘಾತಕಾರಿ ವಿಷಯಗಳು ಹೊರಬಿದ್ದಿವೆ. ಬಾಲಕನು ಕೊಲೆ ಮಾಡುವ ಮುನ್ನವೇ ತನ್ನ ಡೈರಿಯಲ್ಲಿ ರೆಂಚ್, ಖಾರದ ಪುಡಿ ಮತ್ತು ಬಿಸಿ ನೀರನ್ನು ಬಳಸಿ ದಾಳಿ ಮಾಡಲು ಯೋಜನೆ ರೂಪಿಸಿದ್ದ ಮಾಹಿತಿಯನ್ನು ಪೊಲೀಸರು ಪತ್ತೆ ಮಾಡಿದ್ದಾರೆ. ಅಲ್ಲದೆ, ಕೊಲೆಯ ನಂತರ ಪೊಲೀಸರ ಕ್ರಮಗಳು ಹೇಗಿರುತ್ತವೆ, ಅಪ್ರಾಪ್ತ ಆರೋಪಿಗೆ ಸಿಗುವ ಶಿಕ್ಷೆ ಏನು ಹಾಗೂ ಜೈಲು ನಿಯಮಗಳ ಕುರಿತು ಮಾಹಿತಿ ಪಡೆಯಲು ಆತ ಚಾಟ್‌ಜಿಪಿಟಿ ಬಳಸಿದ್ದ ಎಂದು ನಾಕಾ ಹಿಂದೋಲಾ ಠಾಣೆಯ ಎಸ್‌ಎಚ್‌ಒ ವಿವೇಕ ಕುಮಾರ್ ಚೌಧರಿ ತಿಳಿಸಿದ್ದಾರೆ.

ಆರೋಪಿಯ ಬಂಧನ:

ಕೊಲೆಯ ನಂತರ ಬಾಲಕನೇ ಪೊಲೀಸರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾನೆ. ಸ್ಥಳಕ್ಕೆ ಧಾವಿಸಿದ ನಾಕಾ ಹಿಂದೋಲಾ ಪೊಲೀಸರು ಬಾಲಕನನ್ನು ವಶಕ್ಕೆ ಪಡೆದಿದ್ದು, ಹತ್ಯೆಗೆ ಬಳಸಿದ ರೆಂಚ್ ಹಾಗೂ ಇತರ ಸಾಕ್ಷ್ಯಗಳನ್ನು ವಶಪಡಿಸಿಕೊಂಡಿದ್ದಾರೆ. ಸದ್ಯ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದ್ದು, ಮುಂದಿನ ಕಾನೂನು ಕ್ರಮ ಜರುಗಿಸಲಾಗಿದೆ.