ರಸ್ತೆಯಲ್ಲಿ ಬಿದ್ದಿದ್ದ ಗರ್ಭಿಣಿ: ಒಂದು ಕ್ಷಣವೂ ವಿಳಂಬ ಮಾಡದೇ ಮಹಿಳಾ ಪೊಲೀಸ್ ಮಾಡಿದ ಆ ಕೆಲಸಕ್ಕೆ ದೇಶಾದ್ಯಂತ ಪ್ರಶಂಸೆಗಳ ಮಹಾಪೂರ!

ಉಜ್ಜಯಿನಿ (ಮಧ್ಯಪ್ರದೇಶ): ಸಾಮಾನ್ಯವಾಗಿ ಪೋಲಿಸರ ಕಾರ್ಯವೈಖರಿ ಮತ್ತು ಕರ್ತವ್ಯದ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಹಲವಾರು ನಕಾರಾತ್ಮಕ ಚರ್ಚೆಗಳು ನಡೆಯುತ್ತಿರುತ್ತವೆ. ಆದರೆ ಖಾಕಿ ಸಮವಸ್ತ್ರದ ಹಿಂದೆ ಅತ್ಯಂತ ಸ್ಪಂದಿಸುವ ಮತ್ತು ಮಿಡಿಯುವ ಕರುಣೆಯ ಹೃದಯವೂ ಇದೆ ಎಂಬುದಕ್ಕೆ ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ನಡೆದ ಈ ಘಟನೆಯೇ ಸಾಕ್ಷಿಯಾಗಿದೆ.

ಕರ್ತವ್ಯನಿರತರಾಗಿದ್ದ ಪೊಲೀಸ್ ಕಾನ್ಸ್‌ಟೇಬಲ್ ಮೊಸಿನ್ ಮನ್ಸೂರಿ ಅವರು ಸಮಯಪ್ರಜ್ಞೆ ಮೆರೆದು, ರಸ್ತೆಯಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದ ಗರ್ಭಿಣಿ ಮಹಿಳೆಯೊಬ್ಬರಿಗೆ ಚಲಿಸುತ್ತಿದ್ದ ವಾಹನದಲ್ಲೇ ನಿರಂತರವಾಗಿ ಸಿಪಿಆರ್ ನೀಡುವ ಮೂಲಕ ತಾಯಿ ಮತ್ತು ಆಕೆಯ ಹೊಟ್ಟೆಯಲ್ಲಿದ್ದ ಮಗುವಿಗೆ ಮರುಜೀವ ನೀಡಿದ್ದಾರೆ.

ಘಟನೆಯ ವಿವರ:

ಉಜ್ಜಯಿನಿಯ ರಸ್ತೆಯೊಂದರಲ್ಲಿ ಗರ್ಭಿಣಿ ಮಹಿಳೆಯೊಬ್ಬರು ಇದ್ದಕ್ಕಿದ್ದಂತೆ ಪ್ರಜ್ಞಾಹೀನರಾಗಿ ಕುಸಿದುಬಿದ್ದಿದ್ದರು. ಇದನ್ನು ತಕ್ಷಣವೇ ಗಮನಿಸಿದ ಕಾನ್ಸ್‌ಟೇಬಲ್ ಮೊಸಿನ್ ಮನ್ಸೂರಿ ಮತ್ತು ಅವರ ಎಫ್‌ಆರ್‌ವಿ (FRV) ತಂಡವು ಯಾವುದೇ ವಿಳಂಬ ಮಾಡದೆ ಆಕೆಯನ್ನು ಚಿಕಿತ್ಸೆಗೆ ಆಸ್ಪತ್ರೆಗೆ ಕರೆದೊಯ್ಯಲು ವ್ಯವಸ್ಥೆ ಮಾಡಿದರು. ಆಸ್ಪತ್ರೆಗೆ ತಲುಪುವಷ್ಟರಲ್ಲಿ ಸಮಯ ವ್ಯರ್ಥವಾಗಬಾರದು ಎಂಬ ಉದ್ದೇಶದಿಂದ, ಚಲಿಸುತ್ತಿದ್ದ ವಾಹನದ ಒಳಗಡೆಯೇ ಪೊಲೀಸ್ ಕಾನ್ಸ್‌ಟೇಬಲ್ ನಿರಂತರವಾಗಿ ಕೃತಕ ಉಸಿರಾಟ ಹಾಗೂ ಎದೆ ಒತ್ತಡ ನೀಡುತ್ತಾ ಸಾಗಿದರು.

ಸರಿಯಾದ ಸಮಯಕ್ಕೆ ನೀಡಿದ ಈ ಪ್ರಥಮ ಚಿಕಿತ್ಸೆಯಿಂದಾಗಿ ಮಹಿಳೆಗೆ ಪ್ರಜ್ಞೆ ಮರಳಿದ್ದು, ಆಸ್ಪತ್ರೆ ತಲುಪಿದ ಬಳಿಕ ತಾಯಿ ಮತ್ತು ಮಗು ಇಬ್ಬರೂ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ವೈದ್ಯರ ಪ್ರಕಾರ ರಕ್ತದಲ್ಲಿ ಸಕ್ಕರೆ ಪ್ರಮಾಣ (Blood Sugar) ತೀವ್ರವಾಗಿ ಕುಸಿದಿದ್ದರಿಂದ ಮಹಿಳೆ ಪ್ರಜ್ಞೆ ತಪ್ಪಿದ್ದರು.

ಸಾರ್ವಜನಿಕರ ಹರ್ಷ ಮತ್ತು ಸಲ್ಯೂಟ್:

ಯಾವುದೇ ವಿಐಪಿ ಭದ್ರತಾ ಕರ್ತವ್ಯಕ್ಕಿಂತಲೂ ಇಂತಹ ಮಾನವೀಯ ಸೇವೆಯೇ ಶ್ರೇಷ್ಠವಾದದ್ದು ಎಂದು ನೆಟ್ಟಿಗರು ಹಾಗೂ ಸಾರ್ವಜನಿಕರು ಬಣ್ಣಿಸಿದ್ದಾರೆ. ಈ ‘ರಿಯಲ್ ಹೀರೋ’ ಅಧಿಕಾರಿಯ ನಿಸ್ವಾರ್ಥ ಕಾಳಜಿಗೆ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದು, ಪೊಲೀಸ್ ಇಲಾಖೆಯ ಉನ್ನತಾಧಿಕಾರಿಗಳು ಸಹ ಕಾರ್ಯವೈಖರಿಯನ್ನು ಶ್ಲಾಘಿಸಿ ನಗದು ಬಹುಮಾನ ಘೋಷಿಸಿದ್ದಾರೆ.