ದೆಹಲಿ ಪೊಲೀಸರ ಮಿಂಚಿನ ಕಾರ್ಯಾಚರಣೆ: ಬಾಲಕಿ ಜನ್ಮದಿನದಂದೇ ಗ್ಯಾಂಗ್‌ರೇಪ್ ಎಸಗಿದ್ದ ವಕೀಲ, ವಿದ್ಯಾರ್ಥಿ ಸೇರಿ ಮೂವರು 12 ಗಂಟೆಯಲ್ಲಿ ವಶಕ್ಕೆ!

ನವದೆಹಲಿ: ದೆಹಲಿಯ ಕಲ್ಕಾಜಿ ಪ್ರದೇಶದ ಆಸ್ಥಾ ಕುಂಜ್ ಉದ್ಯಾನವನದಲ್ಲಿ 17 ವರ್ಷದ ಅಪ್ರಾಪ್ತ ಬಾಲಕಿಯ ಮೇಲೆ ಮೂವರು ದುಷ್ಟರು ನಡೆಸಿದ ದೌರ್ಜನ್ಯದ ಘಟನೆ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಬಾಲಕಿಯ ಜನ್ಮದಿನದಂದೇ (ಸೆಪ್ಟೆಂಬರ್ 21) ಈ ದುರಂತ ಸಂಭವಿಸಿದೆ.

ಘಟನೆಯ ಪೂರ್ಣ ವಿವರ:

ಸಂತ್ರಸ್ತೆ ಬಾಲಕಿ ಹಾಗೂ ಆಕೆಯ ಸ್ನೇಹಿತ ಕಲ್ಕಾಜಿ ದೇವಸ್ಥಾನದಲ್ಲಿ ಪ್ರಾರ್ಥನೆ ಸಲ್ಲಿಸಿದ ಬಳಿಕ, ಇಸ್ಕಾನ್ ದೇವಸ್ಥಾನಕ್ಕೆ ತೆರಳುವ ಮುನ್ನ ವಿಶ್ರಮಿಸಲು ಗೇಟ್ ಸಂಖ್ಯೆ 7ರ ಮೂಲಕ ಆಸ್ಥಾ ಕುಂಜ್ ಉದ್ಯಾನವನವನ್ನು ಪ್ರವೇಶಿಸಿದ್ದರು. ಅವರು ಉದ್ಯಾನವನದ ಬೆಂಚ್ ಒಂದರ ಮೇಲೆ ಕುಳಿತಿದ್ದಾಗ ಮೂವರು ವ್ಯಕ್ತಿಗಳು ಹಿಂಬದಿಯಿಂದ ಬಂದು, ಬಾಲಕಿಯ ಸ್ನೇಹಿತನಿಗೆ ಕಪಾಳಮೋಕ್ಷ ಮಾಡಿದ್ದಾರೆ.

ತಾವು “ಪೋಲೀಸರು” ಎಂದು ಹೇಳಿಕೊಂಡ ಆರೋಪಿಗಳು, “ಈ ಸಮಯದಲ್ಲಿ ಇಲ್ಲಿಗೆ ಪ್ರವೇಶವಿಲ್ಲ” ಎಂದು ಬೆದರಿಸಿ ಅವರಿಬ್ಬರ ಮೊಬೈಲ್ ಫೋನ್‌ಗಳನ್ನು ಕಸಿದುಕೊಂಡಿದ್ದಾರೆ. ನಂತರ ‘ಆಸಿಫ್’ ಎಂಬಾತನಿಗೆ ಗನ್ ತೆಗೆಯುವಂತೆ ಸೂಚಿಸಿದ್ದು, ಆತ ಜೀನ್ಸ್ ಜೇಬಿನಿಂದ ಕಪ್ಪು ಬಣ್ಣದ ಗನ್ ಹಾಗೂ ಚಾಕು ತೋರಿಸಿ ಜೀವ ಬೆದರಿಕೆ ಹಾಕಿದ್ದಾನೆ.

ಆರೋಪಿಗಳು ಸ್ನೇಹಿತನನ್ನು ಪ್ರತ್ಯೇಕಿಸಿ, ಬಾಲಕಿಯನ್ನು ಉದ್ಯಾನವನದ ಕತ್ತಲಾದ ಹಾಗೂ ನಿರ್ಜನ ಪ್ರದೇಶಕ್ಕೆ ಎಳೆದೊಯ್ದು ಸರದಿಯಂತೆ ಅತ್ಯಾಚಾರ ಎಸಗಿದ್ದಾರೆ. ಕೃತ್ಯದ ನಂತರ, “ಯಾರಿಗಾದರೂ ವಿಷಯ ತಿಳಿಸಿದರೆ ಕೊಲೆ ಮಾಡುವುದಾಗಿ” ಬೆದರಿಸಿ ಮೊಬೈಲ್ ಹಿಂತಿರುಗಿಸಿ ಸ್ಥಳದಿಂದ ಕಾಲ್ಕಿತ್ತಿದ್ದಾರೆ.

ಆರೋಪಿಗಳ ಬಂಧನ ಹಾಗೂ ಎನ್‌ಕೌಂಟರ್:

ಬಾಲಕಿ ಹೊರಬಂದು ಸ್ನೇಹಿತನಿಗೆ ವಿಷಯ ತಿಳಿಸಿದ ತಕ್ಷಣ, ಆತ ಪೋಲಿಸ್ ಕಂಟ್ರೋಲ್ ರೂಮ್‌ಗೆ ಕರೆ ಮಾಡಿದ್ದಾನೆ. ತನಿಖೆ ಕೈಗೆತ್ತಿಕೊಂಡ ದೆಹಲಿ ಪೊಲೀಸರು 12 ಗಂಟೆಗಳಲ್ಲಿ ಮೂವರು ಆರೋಪಿಗಳನ್ನು ಪತ್ತೆಹಚ್ಚಿದ್ದಾರೆ:

1. ಆಸಿಫ್ (31): ಓಖ್ಲಾ ಮಂಡಿಯ ಈರುಳ್ಳಿ ವ್ಯಾಪಾರಿ. ಈತನನ್ನು ಬಂಧಿಸುವ ವೇಳೆ ಪೊಲೀಸರ ಮೇಲೆ ಗುಂಡು ಹಾರಿಸಲು ಯತ್ನಿಸಿದ್ದು, ಪೊಲೀಸರು ನಡೆಸಿದ ಆತ್ಮರಕ್ಷಣೆಯ ಎನ್‌ಕೌಂಟರ್‌ನಲ್ಲಿ ಆತನ ಕಾಲಿಗೆ ಗುಂಡೇಟು ಬಿದ್ದಿದೆ.

2. ಹೇಮಂತ್ (31): ವಕೀಲ.

3. ಮುಕೇಶ್ (24): ಬಿ.ಎಸ್ಸಿ ಗಣಿತ ಅಂತಿಮ ವರ್ಷದ ವಿದ್ಯಾರ್ಥಿ (ಹೇಮಂತ್‌ನ ಸಹೋದರ).

ಅಮರ್ ಕಾಲೋನಿ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS) ಮತ್ತು ಪೋಕ್ಸೋ (POCSO) ಕಾಯ್ದೆಯಡಿ ಪ್ರಕರಣ ದಾಖಲಾಗಿದ್ದು, ಹೆಚ್ಚಿನ ತನಿಖೆ ಮುಂದುವರಿದಿದೆ.