ಶಬರಿಮಲೆ ಮಂಡಲ ಪೂಜೆಗೂ ಮುನ್ನವೇ ಬಿಕ್ಕಟ್ಟು: ಶಬರಿಮಲೆಯಲ್ಲಿ ‘ಅರವಣ ಪ್ರಸಾದ’ದ ಅಭಾವ ಹಿನ್ನೆಲೆ ಸರ್ಕಾರ ಮತ್ತು ದೇವಸ್ವಂ ಮಂಡಳಿ ನಡುವೆ ಬಿಕ್ಕಟ್ಟು ತಾರಕಕ್ಕೆ!

ತಿರುವನಂತಪುರಂ: ಪ್ರಸಿದ್ಧ ಶಬರಿಮಲೆಯ ಅಯ್ಯಪ್ಪ ಸ್ವಾಮಿ ಸನ್ನಿಧಾನದಲ್ಲಿ ಭಕ್ತರಿಗೆ ನೀಡಲಾಗುವ ‘ಅರವಣ ಪಾಯಸ’ ಪ್ರಸಾದದ ತೀವ್ರ ಅಭಾವ ಎದುರಾಗಿದ್ದು, ಕೇರಳ ಸರ್ಕಾರ ಹಾಗೂ ತಿರುವಾಂಕೂರು ದೇವಸ್ವಂ ಮಂಡಳಿ  ನಡುವೆ ಭಾರೀ ವಾಗ್ವಾದಕ್ಕೆ ಕಾರಣವಾಗಿದೆ. ಪರಿಸ್ಥಿತಿ ವಿಕೋಪಕ್ಕೆ ತಿರುಗುತ್ತಿದ್ದಂತೆ ದೇವಸ್ವಂ ಮಂಡಳಿ ನಿರ್ಧಾರದ ವಿರುದ್ಧ ರಾಜ್ಯ ದೇವಸ್ವಂ ಸಚಿವ ಕೆ. ಮುರಳೀಧರನ್ ಬಹಿರಂಗವಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಸೆಪ್ಟೆಂಬರ್ 16ರಿಂದ ಮಾಸಿಕ ಪೂಜೆಗಾಗಿ ಶಬರಿಮಲೆ ದೇವಾಲಯದ ಬಾಗಿಲು ತೆರೆಯಲಾಗಿತ್ತು. ಆದರೆ ಅರವಣ ಪ್ರಸಾದದ ಕೊರತೆಯಿಂದಾಗಿ ಒಬ್ಬ ಭಕ್ತರಿಗೆ ಕೇವಲ ಒಂದು ಟಿನ್ ಪ್ರಸಾದ ಮಾತ್ರ ನೀಡಲು ಮಂಡಳಿ ನಿರ್ಧರಿಸಿತ್ತು. ಇದರಿಂದ ಆಕ್ರೋಶಗೊಂಡ ಸಾವಿರಾರು ಭಕ್ತರು ಸರದಿಯಲ್ಲಿ ಗಂಟೆಗಟ್ಟಲೆ ಕಾಯಬೇಕಾಯಿತು.

ಮಂಡಳಿಯ ಸ್ಪಷ್ಟನೆ

ಬರುವ ಮಂಡಲಂ-ಮಕರವಿಳಕ್ಕು ಯಾತ್ರಾ ಸಮಯದಲ್ಲಿ ದಿನಕ್ಕೆ 4 ರಿಂದ 4.5 ಲಕ್ಷ ಟಿನ್‌ಗಳಷ್ಟು ಪ್ರಸಾದಕ್ಕೆ ಬೇಡಿಕೆ ಇರುತ್ತದೆ. ಇದನ್ನು ಸರಿದೂಗಿಸಲು ದಿನನಿತ್ಯದ ಉತ್ಪಾದನಾ ಸಾಮರ್ಥ್ಯವನ್ನು 2.5 ಲಕ್ಷದಿಂದ 3.5 ಲಕ್ಷ ಟಿನ್‌ಗೆ ಹೆಚ್ಚಿಸುವ 45 ದಿನಗಳ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗಿದೆ. ಈ ಅಭಿವೃದ್ಧಿ ಕಾಮಗಾರಿಯ ಬಗ್ಗೆ ಕೇರಳ ಹೈಕೋರ್ಟ್‌ಗೆ ಈಗಾಗಲೇ ಮಾಹಿತಿ ನೀಡಲಾಗಿದೆ ಎಂದು ದೇವಸ್ವಂ ಮಂಡಳಿ ಸಮರ್ಥಿಸಿಕೊಂಡಿದೆ.

ಸರ್ಕಾರದ ಕಠಿಣ ನಿಲುವು

ದೇವಸ್ವಂ ಮಂಡಳಿಯ ಈ ನಿರ್ಧಾರವನ್ನು ತೀವ್ರವಾಗಿ ಖಂಡಿಸಿರುವ ಸಚಿವ ಕೆ. ಮುರಳೀಧರನ್, “ದೇವಾಲಯ ಮುಚ್ಚಿದ್ದ ಸಮಯದಲ್ಲಿ ಅಥವಾ ಭಕ್ತರಿಗೆ ಪರ್ಯಾಯ ವ್ಯವಸ್ಥೆ ಮಾಡಿ ಈ ಕಾಮಗಾರಿ ನಡೆಸಬೇಕಿತ್ತು. ಮಾಸಿಕ ಪೂಜೆಗೆ ಬರುವ ಭಕ್ತರಿಗೆ ಪ್ರಸಾದ ಸಿಗದಂತೆ ಮಾಡುವುದು ಸರಿಯಲ್ಲ. ಸರ್ಕಾರವು ಇಂತಹ ಪ್ರಯೋಗಗಳನ್ನು ಸುಮ್ಮನೆ ನೋಡಿಕೊಂಡು ಕುಳಿತುಕೊಳ್ಳಲು ಸಾಧ್ಯವಿಲ್ಲ” ಎಂದು ಕಿಡಿಕಾರಿದ್ದಾರೆ.

ಈ ಕುರಿತು ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಅವರೊಂದಿಗೆ ಸುದೀರ್ಘ ಚರ್ಚೆ ನಡೆಸಿ, ಹೈಕೋರ್ಟ್ ಗಮನಕ್ಕೆ ತರಲಾಗುವುದು ಎಂದು ಸಚಿವರು ತಿಳಿಸಿದ್ದಾರೆ. ಅಲ್ಲದೆ, ಮುಂಬರುವ ಪ್ರಮುಖ ಯಾತ್ರಾ ಋತುವಿನ ಮೇಲ್ವಿಚಾರಣೆಗೆ ಹೈಕೋರ್ಟ್ ಅನುಮತಿಯೊಂದಿಗೆ ‘ವಿಶೇಷ ತಂಡ’ವನ್ನು ನೇಮಿಸುವ ಕುರಿತೂ ಸರ್ಕಾರ ಚಿಂತನೆ ನಡೆಸಿದೆ.