PGಯಲ್ಲಿ ನಡೆಯುತ್ತಿತ್ತು ಹೈಪ್ರೊಫೈಲ್ ಸೆಕ್ಸ್ ರಾಕೆಟ್ ದಂಧೆ: ಅಪ್ರಾಪ್ತೆ ನೀಡಿದ ಒಂದೇ ಒಂದು ಸುಳಿವು ಬಯಲು ಮಾಡಿತು ಬೃಹತ್ ಜಾಲ, ಕಿಂಗ್‌ಪಿನ್ ಸಾಹಿಲ್ ದಂಪತಿ ಅರೆಸ್ಟ್!

ಗುರುಗ್ರಾಮ (ಹರಿಯಾಣ): ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ ಗುರುಗ್ರಾಮ ಪೊಲೀಸರು ಮತ್ತು ಹರಿಯಾಣ ರಾಜ್ಯ ಮಹಿಳಾ ಆಯೋಗದ ಜಂಟಿ ತಂಡವು, ಸೆಕ್ಟರ್ 38ರಲ್ಲಿರುವ ‘ಪೇಯಿಂಗ್ ಗೆಸ್ಟ್’ (PG) ಒಂದರಲ್ಲಿ ನಡೆಯುತ್ತಿದ್ದ ಬೃಹತ್ ವೇಶ್ಯಾವಾಟಿಕೆ ದಂಧೆಯನ್ನು ಭೇದಿಸಿದೆ. ಈ ಕಾರ್ಯಾಚರಣೆಯಲ್ಲಿ 13 ಪುರುಷರು ಹಾಗೂ 8 ಮಹಿಳೆಯರು ಸೇರಿ ಒಟ್ಟು 21 ಜನರನ್ನು ವಶಕ್ಕೆ ಪಡೆಯಲಾಗಿದೆ. ಬಂಧಿತರಲ್ಲಿ ಕೆಲ ವಿದೇಶಿ ಪ್ರಜೆಗಳೂ ಸೇರಿದ್ದಾರೆ.

ಪರಾರಿಯಾಗಿದ್ದ ಕಿಂಗ್‌ಪಿನ್ ದಂಪತಿ 

ಈ ಜಾಲದ ಪ್ರಮುಖ ಸೂತ್ರಧಾರ ಜಾರ್ಸಾ ನಿವಾಸಿ ಸಾಹಿಲ್ ಹಾಗೂ ಆತನ ಹೆಂಡತಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಶನಿವಾರದಂದು ಪೊಲೀಸರ ರಕ್ಷಣೆಗೆ ಸಿಕ್ಕ ಮೈನರ್ ಬಾಲಕಿಯೊಬ್ಬಳು ನೀಡಿದ ಶಾಕಿಂಗ್ ಮಾಹಿತಿಯ ಆಧಾರದ ಮೇಲೆ ಈ ಸರಣಿ ದಾಳಿ ನಡೆದಿದೆ. ಬಾಲಕಿಯನ್ನು ಜಾರ್ಸಾದ ಆವರಣದಲ್ಲಿ ಬಲವಂತವಾಗಿ ಬಂಧನದಲ್ಲಿಟ್ಟು ಈ ದಂಧೆಗೆ ತಳ್ಳಲಾಗಿತ್ತು ಎಂದು ತಿಳಿದುಬಂದಿದೆ.

ಆನ್‌ಲೈನ್, ವಾಟ್ಸಾಪ್ ಮೂಲಕ ನೆಟ್‌ವರ್ಕ್:

ಆರೋಪಿ ಸಾಹಿಲ್ ವೆಬ್‌ಸೈಟ್‌ಗಳು, ವಾಟ್ಸಾಪ್ ಗ್ರೂಪ್‌ಗಳು ಹಾಗೂ ಸುಮಾರು 10 ರಿಂದ 12 ಜನರ ನೆಟ್‌ವರ್ಕ್ ಬಳಸಿ ಗ್ರಾಹಕರನ್ನು ಸೆಳೆಯುತ್ತಿದ್ದ. ಈ ದಾಳಿಗೂ ಮುನ್ನವೇ ಸಫೈರ್ 90 ಮಾಲ್‌ನಲ್ಲಿದ್ದ ಹಲವಾರು ಸ್ಪಾ (Spa) ಸೆಂಟರ್‌ಗಳ ಮೇಲೂ ದಾಳಿ ನಡೆಸಲಾಗಿತ್ತು.

ಪ್ರಕರಣ ಸಂಬಂಧ ಸಾದರ್ ಪೊಲೀಸ್ ठाಣೆಯಲ್ಲಿ ‘ಅನೈತಿಕ ಸಂಚಾರ ತಡೆ ಕಾಯ್ದೆ’ (ITPA) ಹಾಗೂ ‘ವಿದೇಶಿಯರ ಕಾಯ್ದೆ’ಯಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಸ್ಥಳದಲ್ಲಿದ್ದ ಸಿಸಿಟಿವಿ ದೃಶ್ಯಾವಳಿಗಳು, ಮೊಬೈಲ್ ಫೋನ್‌ಗಳು ಮತ್ತು ದಾಖಲೆಗಳನ್ನು ವಶಕ್ಕೆ ಪಡೆದು ತನಿಖೆ ಚುರುಕುಗೊಳಿಸಲಾಗಿದೆ.

ರಾಜಧಾನಿ ದೆಹಲಿಯ ಸನಿಹದಲ್ಲಿರುವ ಗುರುಗ್ರಾಮದ ಪ್ರಶಾಂತ ಪ್ರದೇಶ ಸೆಕ್ಟರ್ 38. ದಿನನಿತ್ಯ ಉದ್ಯೋಗಿಗಳು ಮತ್ತು ವಿದ್ಯಾರ್ಥಿಗಳು ಓಡಾಡುವ ಪಿಜಿ ಮನೆಗಳ ಸಾಲಿನಲ್ಲಿ ಗಿಜಿಗುಡುವ ಒಂದು ಕಟ್ಟಡವಿತ್ತು. ಆದರೆ ಆ ಕಟ್ಟಡದ ಒಳಗಡೆ ನಡೆಯುತ್ತಿದ್ದದ್ದು ಸದ್ದಿಲ್ಲದ ಕರಾಳ ದಂಧೆ.

ಶುಕ್ರವಾರ ರಾತ್ರಿ ಪೊಲೀಸರು ಸಫೈರ್ 90 ಮಾಲ್‌ನ ಸ್ಪಾ ಸೆಂಟರ್‌ಗಳ ಮೇಲೆ ದಾಳಿ ನಡೆಸಿದ್ದಾಗ ಸಿಕ್ಕಿದ ಬಾಲಕಿಯೊಬ್ಬಳ ಹೇಳಿಕೆ ಈ ಪ್ರಕರಣಕ್ಕೆ ದೊಡ್ಡ ತಿರುವು ನೀಡಿತು. “ನನ್ನನ್ನು ಬಲವಂತವಾಗಿ ಬಂದಿಸಿಟ್ಟು ಈ ದಂಧೆಗೆ ಎಳೆದಿದ್ದಾರೆ” ಎಂದು ಆಕೆ ಕಣ್ಣೀರಿಡುತ್ತಾ ನೀಡಿದ ಸುಳಿವು, ಪೊಲೀಸರನ್ನು ಸೆಕ್ಟರ್ 38ರ ಪಿಜಿಯತ್ತ ಕರೆದೊಯ್ಯಿತು.

ಹರಿಯಾಣ ಮಹಿಳಾ ಆಯೋಗದ ಅಧ್ಯಕ್ಷೆ ಉಷಾ ಪ್ರಿಯದರ್ಶಿನಿ ಮತ್ತು ಎಸಿಪಿ ಅಭಿಲಕ್ಷ್ ಜೋಶಿ ನೇತೃತ್ವದ ತಂಡ ಶನಿವಾರ ತಡರಾತ್ರಿ ದಾಳಿ ನಡೆಸಿದಾಗ ಅಲ್ಲಿನ ದೃಶ್ಯ ಕಂಡು ಅಧಿಕಾರಿಗಳೇ ಬೆಚ್ಚಿಬಿದ್ದರು. ವಿದೇಶಿ ಯುವತಿಯರು ಸೇರಿದಂತೆ ಹಲವರು ಸಿಕ್ಕಿಬಿದ್ದರು. ವಾಟ್ಸಾಪ್, ವೆಬ್‌ಸೈಟ್ ಹಾಗೂ ಪಿಜಿಗಳನ್ನು ಅಡ್ಡೆ ಮಾಡಿಕೊಂಡು ದೇಶಾದ್ಯಂತ ಜಾಲ ವಿಸ್ತರಿಸಿದ್ದ ಸಾಹಿಲ್ ದಂಪತಿ ಈಗ ಕಂಬಿ ಎಣಿಸುತ್ತಿದ್ದಾರೆ.