ಐಐಟಿ, ಐಐಎಂ ತೊರೆದು ಯುಪಿಎಸ್‌ಸಿ ಸಾಧನೆ ಮಾಡಿದ್ದ ಹಿರಿಯ ಐಎಎಸ್ ಅಧಿಕಾರಿ ದಿವ್ಯಾ ಮಿತ್ತಲ್ ರಾಜೀನಾಮೆ!

ಉತ್ತರ ಪ್ರದೇಶ: ದೇಶದ ಅತ್ಯಂತ ಯಶಸ್ವಿ ಹಾಗೂ ಜನಪ್ರಿಯ ಐಎಎಸ್ ಅಧಿಕಾರಿಗಳಲ್ಲಿ ಒಬ್ಬರಾದ ದಿವ್ಯಾ ಮಿತ್ತಲ್ ಅವರು ತಮ್ಮ 13 ವರ್ಷಗಳ ಸುದೀರ್ಘ ಸೇವೆಯ ಬಳಿಕ ಭಾರತೀಯ ಆಡಳಿತ ಸೇವೆಯಿಂದ (IAS) ಸ್ವಯಂಪ್ರೇರಿತರಾಗಿ ರಾಜೀನಾಮೆ ನೀಡಿರುವುದು ದೇಶಾದ್ಯಂತ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.

ಸಾಮಾನ್ಯ ಕುಟುಂಬದಿಂದ ಬಂದು, ಜಾಗತಿಕ ಮಟ್ಟದ ಉದ್ಯೋಗವನ್ನು ತೊರೆದು, ದೇಶದ ಸೇವೆಗೆ ತಮ್ಮನ್ನು ಅರ್ಪಿಸಿಕೊಂಡಿದ್ದ ಇವರ ಈ ಹಾದಿ ಹಲವರಿಗೆ ಸ್ಫೂರ್ತಿದಾಯಕವಾಗಿದೆ.

ಸಾಮಾನ್ಯ ಹಿನ್ನೆಲೆಯಿಂದ ದಿಢೀರ್ ಸಾಧನೆ: ಶಿಕ್ಷಣ ಮತ್ತು ವಿದೇಶಿ ಉದ್ಯೋಗ

ಉತ್ತರ ಪ್ರದೇಶ ಕೇಡರ್‌ನ 2013ರ ಬ್ಯಾಚ್‌ನ ಐಎಎಸ್ ಅಧಿಕಾರಿಯಾಗಿರುವ ದಿವ್ಯಾ ಮಿತ್ತಲ್ ಅವರ ವಿದ್ಯಾಭ್ಯಾಸ ಅತ್ಯಂತ ಉನ್ನತ ಮಟ್ಟದ್ದು.

ಐಐಟಿ ದೆಹಲಿ (IIT Delhi): ಇಂಜಿನಿಯರಿಂಗ್ ಫಿಸಿಕ್ಸ್‌ನಲ್ಲಿ ಬಿ.ಟೆಕ್ ಪೂರೈಸಿದ ಇವರು, ಶೇ. 9.07ರಷ್ಟು ಸಿಜಿಪಿಎ (CGPA) ಗಳಿಸಿ ತಮ್ಮ ವಿಭಾಗದಲ್ಲಿ ಎರಡನೇ Rank ಪಡೆದಿದ್ದರು.

ಐಐಎಂ ಬೆಂಗಳೂರು (IIM Bangalore): ಪ್ರತಿಷ್ಠಿತ ಐಐಎಂ ಬೆಂಗಳೂರಿನಲ್ಲಿ ಎಂಬಿಎ ಪದವಿ ಪಡೆದು, ತಮ್ಮ ಬ್ಯಾಚ್‌ನ ಟಾಪ್ ಶೇ. 5ರಷ್ಟು ವಿದ್ಯಾರ್ಥಿಗಳಲ್ಲಿ ಒಬ್ಬರಾಗಿ ಹೊರಹೊಮ್ಮಿದರು.

ಲಂಡನ್‌ನಲ್ಲಿ ಉದ್ಯೋಗ: ವಿದ್ಯಾಭ್ಯಾಸದ ಬಳಿಕ ಲಂಡನ್‌ನಲ್ಲಿ ಜೆಪಿ ಮಾರ್ಗನ್ (JP Morgan) ಸಂಸ್ಥೆಯಲ್ಲಿ ಅಸೋಸಿಯೇಟ್ ಆಗಿ ಕೈತುಂಬ ಸಂಬಳದ ಉದ್ಯೋಗದಲ್ಲಿದ್ದರು.

ಲಂಡನ್‌ನಲ್ಲಿ ಐಷರಾಮಿ ಜೀವನ ಹಾಗೂ ದೊಡ್ಡ ಮೊತ್ತದ ವೇತನವಿದ್ದರೂ, ತಾಯ್ನಾಡಿನ ಮಣ್ಣಿನ ಋಣ ತೀರಿಸಬೇಕೆಂಬ ಹಂಬಲ ಅವರನ್ನು ಭಾರತಕ್ಕೆ ವಾಪಸ್ ಕರೆತಂದಿತು. ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ತೇರ್ಗಡೆಗೊಂಡು ಮೊದಲು ಐಪಿಎಸ್ (IPS) ಹಾಗೂ ನಂತರ ಐಎಎಸ್ ಅಧಿಕಾರಿಯಾದರು.

ಆಡಳಿತಾತ್ಮಕ ಸಾಧನೆಗಳು ಮತ್ತು ಜನಪರ ಕಾಳಜಿ

ತಮ್ಮ 13 ವರ್ಷಗಳ ಕಾಲಾವಧಿಯಲ್ಲಿ ಉತ್ತರ ಪ್ರದೇಶ ಸರ್ಕಾರದ ವಿವಿಧ ಪ್ರಮುಖ ಜವಾಬ್ದಾರಿಗಳನ್ನು ದಿವ್ಯಾ ಮಿತ್ತಲ್ ನಿರ್ವಹಿಸಿದ್ದಾರೆ:

ನೀತಿ ಆಯೋಗ: ಕೇಂದ್ರ ಸರ್ಕಾರದ ನೀತಿ ಆಯೋಗದಲ್ಲಿ ಸಹಾಯಕ ಕಾರ್ಯದರ್ಶಿಯಾಗಿ ಸೇವೆ.

ಪ್ರಮುಖ ಹುದ್ದೆಗಳು: ಬರೇಲಿ ಅಭಿವೃದ್ಧಿ ಪ್ರಾಧಿಕಾರದ ಉಪಾಧ್ಯಕ್ಷೆಯಾಗಿ, ಹಾಗೂ ಮೀರತ್ ಮತ್ತು ದೇವರಿಯಾ ಜಿಲ್ಲೆಗಳಲ್ಲಿ ಜಿಲ್ಲಾಧಿಕಾರಿಯಾಗಿ (DM) ಯಶಸ್ವಿಯಾಗಿ ಕಾರ್ಯನಿರ್ವಹಿಸಿದರು.

ಐತಿಹಾಸಿಕ ಕೆಲಸ: ಮಿರ್ಜಾಪುರ ಜಿಲ್ಲೆಯಲ್ಲಿ ಡಿಸಿಯಾಗಿದ್ದಾಗ, ಸ್ವಾತಂತ್ರ್ಯ ಕಂಡು 75 ವರ್ಷಗಳಾದರೂ ನೀರಿಲ್ಲದ ಲಹರಿಯಾ ದಹ್ ಎಂಬ ಗುಡ್ಡಗಾಡು ಗ್ರಾಮಕ್ಕೆ ಪೈಪ್‌ಲೈನ್ ಮೂಲಕ ಮೊದಲ ಬಾರಿಗೆ ಕುಡಿಯುವ ನೀರು ತಲುಪಿಸಿ ಭಾರಿ ಪ್ರಶಂಸೆಗೆ ಪಾತ್ರರಾಗಿದ್ದರು.

ಭಾವನಾತ್ಮಕ ವಿದಾಯದ ಸಂದೇಶ

ತಮ್ಮ ರಾಜೀನಾಮೆ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ಅವರು, “ಇಂದು ನಾನು ನನ್ನ 13 ವರ್ಷಗಳ ಅವಿಸ್ಮರಣೀಯಯಾತ್ರೆಗೆ ಸ್ವಯಂಪ್ರೇರಿತರಾಗಿ ವಿರಾಮ ನೀಡಿ ಐಎಎಸ್‌ನಿಂದ ರಾಜೀನಾಮೆ ನೀಡಿದ್ದೇನೆ” ಎಂದು ತಿಳಿಸಿದ್ದಾರೆ.

“ಲಂಡನ್‌ನಲ್ಲಿ ಎಲ್ಲವೂ ಸಿಕ್ಕರೂ ದೇಶದಲ್ಲಿ ಇಲ್ಲದಿರುವ ಕೊರತೆ ಕಾಡುತ್ತಿತ್ತು. ನನ್ನ ವಿದೇಶಿ ಉದ್ಯೋಗವನ್ನು ತೊರೆದು ಬಂದದ್ದು ದೇಶದ ಋಣ ತೀರಿಸಲು. ಅಧಿಕಾರ ಶಾಶ್ವತವಲ್ಲ, ಆದರೆ ಜನರ ಕಣ್ಣೀರು ಒರೆಸಿ ಅವರ ಮುಖದಲ್ಲಿ ಮಂದಹಾಸ ಮೂಡಿಸಿದ ಆ ಕ್ಷಣಗಳೇ ನನ್ನ ಜೀವನದ ನಿಜವಾದ ಗಳಿಕೆ,” ಎಂದು ಭಾವುಕರಾಗಿ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.

ಸದ್ಯ ತಮ್ಮ ರಾಜೀನಾಮೆಯ ಹಿಂದಿನ ಮುಂದಿನ ಹೆಜ್ಜೆಗಳ ಬಗ್ಗೆ ಸ್ಪಷ್ಟಪಡಿಸದಿದ್ದರೂ, ದೇಶ ಮತ್ತು ಜನಸಾಮಾನ್ಯರ ಸೇವೆಯ ಮೇಲಿನ ತಮ್ಮ ಕನಸು ಎಂದಿಗೂ ಮರೆಯಾಗುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.