ಹಾಸಿಗೆ ಹಿಡಿದ ಪತಿ ಜೀವ ಉಳಿಸಲು ಪ್ರವಾಹ ಲೆಕ್ಕಿಸದೇ ಜೀವ ಪಣಕ್ಕಿಟ್ಟ ಸತಿ: ಜಗತ್ತಿನ ಗಮನ ಸೆಳೆದ ವೃದ್ಧ ದಂಪತಿಯ ಲವ್ ಕಹಾನಿ!

ನೇಪಾಳ: ನುವಾಕೋಟ್ ಜಿಲ್ಲೆಯ ಐತಿಹಾಸಿಕ ತ್ರಿಶೂಲಿ ಬಜಾರ್ ಪ್ರದೇಶದಲ್ಲಿ ಸಂಭವಿಸಿದ ಭೀಕರ ಪ್ರವಾಹ ಮತ್ತು ಭೂಕುಸಿತದ ದುರಂತದ ನಡುವೆ, ವೃದ್ಧ ದಂಪತಿಯೊಬ್ಬರ ಕಥೆ ಇಡೀ ಜಗತ್ತಿನ ಗಮನ ಸೆಳೆದಿದೆ. ಪ್ರಾಕೃತಿಕ ವಿಕೋಪದ ಅಂಚಿನಲ್ಲಿರುವ ಈ ಕಥೆ ಮಾನವ ಸಂಬಂಧಗಳ ಆಳವನ್ನು ಕಣ್ಣಿಗೆ ಕಟ್ಟುತ್ತದೆ. ಹಾಸಿಗೆ ಹಿಡಿದ ಪತಿ ಉಳಿವಿಗೆ ತನ್ನ ಪ್ರಾಣವನ್ನೇ ಪಣಕ್ಕಿಟ್ಟ ಸತಿಯ ಸ್ಟೋರಿ ಇದು.

ಪ್ರವಾಹದ ಭೀಕರತೆ ಮತ್ತು ಮತ್ತೊಂದು ಎಚ್ಚರಿಕೆ

ಆಗಸ್ಟ್ 26ರ ಮುಂಜಾನೆ ಸಂಭವಿಸಿದ ಹಠಾತ್ ಪ್ರವಾಹ ಹಾಗೂ ಮಣ್ಣಿನ ಕುಸಿತದಿಂದಾಗಿ ತ್ರಿಶೂಲಿ ನದಿ ಪಾತ್ರದ ಹಳ್ಳಿಗಳು ಮತ್ತು ಪಟ್ಟಣಗಳು ಸಂಪೂರ್ಣವಾಗಿ ಜಲಾವೃತಗೊಂಡವು. ಕೆಲವೇ ನಿಮಿಷಗಳಲ್ಲಿ ನೂರಾರು ಮನೆಗಳು, ಅಂಗಡಿಗಳು ಮತ್ತು ವಾಹನಗಳು ಮಣ್ಣಿನ ಒಳಗೆ ಸೇರಿಕೊಂಡವು. ರಕ್ಷಣಾ ಕಾರ್ಯಗಳು ಮುಂದುವರಿದಿರುವ ಬೆನ್ನಲ್ಲೇ, ಆಡಳಿತ ಯಂತ್ರವು ಮತ್ತೊಂದು ಪ್ರವಾಹದ ಮುನ್ನೆಚ್ಚರಿಕೆ ನೀಡಿ, ತಕ್ಷಣವೇ ಸ್ಥಳಾಂತರಗೊಳ್ಳುವಂತೆ ಜನರಿಗೆ ಸೂಚಿಸಿತು.

ರಮಾಯಾ ತಮಾಂಗ್ ಅವರ ನಿರ್ಧಾರ

ಮತ್ತೊಮ್ಮೆ ಗಂಡಾಂತರ ಎದುರಾದಾಗ ಊರಿನ ಜನರೆಲ್ಲ ಸುರಕ್ಷಿತ ಸ್ಥಳಗಳತ್ತ ಓಡಿಹೋದರು. ಆದರೆ, ಸುಮಾರು 60 ವರ್ಷ ವಯಸ್ಸಿನ ರಮಾಯಾ ತಮಾಂಗ್  ಎಂಬ ಮಹಿಳೆ ಮಾತ್ರ ತಮ್ಮ ಮನೆಯಲ್ಲೇ ಉಳಿದುಕೊಂಡರು.

ಅವರ ಈ ಸಾಹಸ ಅಥವಾ ನಿರಾಕರಣೆಗೆ ಕಾರಣ ಅವರ ಪತಿ. ಅವರ ಪತಿ ತೀವ್ರ ಅಶಕ್ತರಾಗಿದ್ದು, ಹಾಸಿಗೆ ಹಿಡಿದಿದ್ದಾರೆ ಹಾಗೂ ಸ್ವತಃ ನಡೆದಾಡಲು ಸಂಪೂರ್ಣ ಅಸಾಮರ್ಥರಾಗಿದ್ದಾರೆ. ಪತಿಯನ್ನು ಆಪತ್ಬಾಂಧವ ಸ್ಥಿತಿಯಲ್ಲಿ ಬಿಟ್ಟು  ಹೋಗಲು ಮನಸ್ಸು ಮಾಡದ ರಮಾಯಾ, ತಮ್ಮ ಜೀವದ ಹಂಗನ್ನು ತೊರೆದರು.

“ನಾವು ಜೊತೆಯಾಗಿಯೇ ಬದುಕಿದ್ದೇವೆ, ಈಗ ಒಟ್ಟಿಗೇ ಸಾಯುತ್ತೇವೆ. ನನ್ನ ಪತಿ ನಡೆದಾಡಲು ಆಗುವುದಿಲ್ಲ, ಅವರನ್ನು ಬಿಟ್ಟು ನಾನು ಎಲ್ಲಿಗೆ ಹೋಗಲಿ? ಏನೇ ಆಗಲಿ ನಾನು ಇಲ್ಲೇ ಇರುತ್ತೇನೆ,” ಎಂದು ಅವರು ಕಣ್ಣೀರಿಡುತ್ತಾ ನುಡಿದರು.

ದುರಂತದ ಅಸಲಿ ಸವಾಲುಗಳು

ಮಿಸೆಸ್ ತಮಾಂಗ್ ಅವರ ಈ ಧೈರ್ಯ ಮತ್ತು ಬದ್ಧತೆಯು ಪ್ರಾಕೃತಿಕ ವಿಕೋಪಗಳ ಸಮಯದಲ್ಲಿ ವೃದ್ಧರು, ರೋಗಿಗಳು ಹಾಗೂ ಅಶಕ್ತರು ಎದುರಿಸುವ ಗಂಭೀರ ಪರಿಸ್ಥಿತಿಯನ್ನು ಜಗತ್ತಿಗೆ ತೋರಿಸಿಕೊಟ್ಟಿದೆ. ದೊಡ್ಡ ಮಟ್ಟದ ವಿಪತ್ತುಗಳು ಸಂಭವಿಸಿದಾಗ ಇಂತಹ ಅಸಹಾಯಕ ಜನರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಲು ತುರ್ತು ಮತ್ತು ವಿಶೇಷ ರಕ್ಷಣಾ ವ್ಯವಸ್ಥೆಗಳ ಎಷ್ಟು ಅವಶ್ಯಕತೆ ಇದೆ ಎಂಬುದನ್ನು ಈ ಘಟನೆ ಒತ್ತಿಹೇಳುತ್ತದೆ.