‘ಜೆನ್ ಆಲ್ಫಾ’ ಬಾಲಕನ ರಾಜಕೀಯ ಹೇಳಿಕೆ ವೈರಲ್, ‘ನಾವು ಬಂಧಿಸಿಲ್ಲ’ ಎಂದ ಬಿಹಾರ ಪೋಲಿಸ್!

ಪಾಟ್ನಾ: ಬಿಹಾರ ಲೋಕಸೇವಾ ಆಯೋಗ (BPSC) ಪರೀಕ್ಷೆಗೆ ಸಂಬಂಧಿಸಿದಂತೆ ಉದ್ಯೋಗ ಆಕಾಂಕ್ಷಿಗಳು ನಡೆಸುತ್ತಿರುವ ಪ್ರತಿಭಟನೆಯಲ್ಲಿ 6 ವರ್ಷದ ಬಾಲಕನೊಬ್ಬ ಪಾಲ್ಗೊಂಡು ನೀಡಿದ ರಾಜಕೀಯ ಹೇಳಿಕೆಗಳು ಹಾಗೂ ಆತನನ್ನು ಪೊಲೀಸರು ಕರೆದೊಯ್ದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ವೈರಲ್ ಆಗಿವೆ.

ಘಟನೆಯ ವಿವರ: ಪಾಟ್ನಾದ ಗರ್ಡನಿಬಾಗ್ ಪ್ರದೇಶದಲ್ಲಿ ನಡೆದ ಬಿಪಿಎಸ್‌ಸಿ ಪರೀಕ್ಷಾರ್ಥಿಗಳ ಪ್ರತಿಭಟನೆಯಲ್ಲಿ ಟೀ-ಶರ್ಟ್, ಜೀನ್ಸ್ ಮತ್ತು ಹಣೆ ಮೇಲೆ ತಿಲಕ ಧರಿಸಿದ್ದ ಆರು ವರ್ಷದ ಬಾಲಕ ಆದಿತ್ಯ ಎಲ್ಲರ ಗಮನ ಸೆಳೆದಿದ್ದ. ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ಆತ, “ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ ಅವರು ರಾಜೀನಾಮೆ ನೀಡಬೇಕು ಹಾಗೂ ವಿದ್ಯಾರ್ಥಿಗಳ ಮೇಲೆ ಲಾಠಿಚಾರ್ಜ್ ಆದೇಶಿಸಿದವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು,” ಎಂದು ಆಗ್ರಹಿಸಿದ್ದ. ಅಲ್ಲದೆ, “ನಾನು ದೇಶದ ಭವಿಷ್ಯದ ಬಗ್ಗೆ ಕಾಳಜಿಯುಳ್ಳ ಪ್ರಜೆಯಾಗಿ ನನ್ನ ಹಕ್ಕನ್ನು ಚಲಾಯಿಸುತ್ತಿದ್ದೇನೆ” ಎಂದಿದ್ದ.

ಬಂಧನ ವದಂತಿಗೆ ಸ್ಪಷ್ಟನೆ:

ಘಟನಾ ಸ್ಥಳದಿಂದ ಪೊಲೀಸರು ಬಾಲಕನನ್ನು ಕರೆದೊಯ್ಯುವ ವಿಡಿಯೋ ಹೊರಬೀಳುತ್ತಿದ್ದಂತೆ, ಮಗುವನ್ನು ಬಂಧಿಸಲಾಗಿದೆ ಎಂಬ ವದಂತಿಗಳು ಹರಡಿದ್ದವು. ಆದರೆ, ಈ ಪ್ರತಿಪಾದನೆಯನ್ನು ಬಿಹಾರ ಪೊಲೀಸರು ತಳ್ಳಿಹಾಕಿದ್ದಾರೆ. ಬಾಲಕನ ಸುರಕ್ಷತೆಯ ದೃಷ್ಟಿಯಿಂದ ಆತನನ್ನು ತಾತ್ಕಾಲಿಕವಾಗಿ ಪೊಲೀಸ್ ಠಾಣೆಯಲ್ಲಿ ಇರಿಸಿಕೊಂಡು, ಬಳಿಕ ಆತನ ತಾಯಿಗೆ ಹಸ್ತಾಂತರಿಸಲಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಅಲ್ಲದೆ, “ಪ್ರತಿಭಟನೆ ಮತ್ತು ಗಲಭೆ ನಡೆಯುವ ಸೂಕ್ಷ್ಮ ಪ್ರದೇಶಗಳಿಗೆ ಮಗುವನ್ನು ಕರೆತರದಂತೆ ಮತ್ತು ಆತನ ಬಗ್ಗೆ ಹೆಚ್ಚಿನ ನಿಗಾ ವಹಿಸುವಂತೆ” ಕೂಲಿ ಕಾರ್ಮಿಕರಾಗಿರುವ ಬಾಲಕನ ಪೋಷಕರಿಗೆ ಪೊಲೀಸರು ಸೂಚಿಸಿದ್ದಾರೆ.