ಪಾಕಿಸ್ತಾನದ ಖ್ಯಾತ ಟಿಕ್‌ಟಾಕರ್ ಶಂಸು ಬೀಬಿ ಗುಂಡಿಕ್ಕಿ ಹತ್ಯೆ: ಹಣಕಾಸು ವಿವಾದವೇ ಕೊಲೆಗೆ ಕಾರಣವೇ? 5ನೇ ಮಹಿಳಾ ಇನ್‌ಫ್ಲುಯೆನ್ಸರ್ ಬಲಿ ಪಡೆದ ದುಷ್ಕರ್ಮಿಗಳು!

ಇಸ್ಲಾಮಾಬಾದ್/ಟ್ಯಾಕ್ಸಿಲಾ: ಪಾಕಿಸ್ತಾನದ ಅತ್ಯಂತ ಜನಪ್ರಿಯ ಟಿಕ್‌ಟಾಕ್ ಸ್ಟಾರ್‌ಗಳಲ್ಲಿ ಒಬ್ಬರಾದ 28 ವರ್ಷದ ಶಂಸು ಬೀಬಿ (ಅಲಿಯಾಸ್ ಆಯೆಶಾ ಗಿಲಮಾನಾ) ಅವರನ್ನು ಅಪರಿಚಿತ ದುಷ್ಕರ್ಮಿಗಳು ಗುಂಡಿಕ್ಕಿ ಹತ್ಯೆ ಮಾಡಿದ್ದಾರೆ. ದೇಶದ ಸ್ವಾತಂತ್ರ್ಯ ದಿನಾಚರಣೆಯಾದ ಆಗಸ್ಟ್ 14 ರಂದು ಇಸ್ಲಾಮಾಬಾದ್ ಸಮೀಪದ ಟ್ಯಾಕ್ಸಿಲಾ ನಗರದಲ್ಲಿ ಈ ಘಟನೆ ನಡೆದಿದೆ.

ಘಟನೆಯ ವಿವರ:

ಶಂಸು ಬೀಬಿ ಅವರು ತಮ್ಮ 15 ವರ್ಷದ ಸಹೋದರಿ ಅಸೀಮಾ ಮತ್ತು ಸಹೋದರ ನೈಮತುಲ್ಲಾ ಅವರೊಂದಿಗೆ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ, ಬೈಕ್‌ನಲ್ಲಿ ಬಂದ ಇಬ್ಬರು ಅಪರಿಚಿತರು ಗುಂಡಿನ ದಾಳಿ ನಡೆಸಿದ್ದಾರೆ. ಕುತ್ತಿಗೆಗೆ ಗುಂಡು ತಗುಲಿದ ಪರಿಣಾಮ ಶಂಸು ಬೀಬಿ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ನಿಯಂತ್ರಣ ತಪ್ಪಿದ ಕಾರು ಮತ್ತೊಂದು ವಾಹನಕ್ಕೆ ಡಿಕ್ಕ ಹೊಡೆದಿದ್ದರಿಂದ ಅವರ ಸಹೋದರಿ ಅಸೀಮಾ ಗಂಭೀರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಹಣಕಾಸಿನ ವ್ಯವಹಾರದ ಆರೋಪ:

ಕೊಲೆಗೆ ಸಾಮಾಜಿಕ ಜಾಲತಾಣದ ಚಟುವಟಿಕೆಗಳಷ್ಟೇ ಅಲ್ಲದೆ ಹಣಕಾಸಿನ ವಿವಾದವೂ ಕಾರಣವಾಗಿರಬಹುದು ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ. ಶಂಸು ಬೀಬಿ ಅವರ ತಂದೆ ಫಝಲ್ ಸಾಹಿಬ್‌ಝಾದಾ ನೀಡಿದ ದೂರಿನನ್ವಯ, ‘ಕಾಶಿ’ ಎಂಬ ವ್ಯಕ್ತಿ ಕರೆ ಮಾಡಿ ಹೊರಗೆ ಬರಲು ಹೇಳಿದ್ದ. ಅಲ್ಲದೆ, ಕೌಸರ್ ಹಾಗೂ ಜಾವೇದ್ ಎಂಬವರೊಂದಿಗೆ ಶಂಸು ಬೀಬಿ ಹಣಕಾಸಿನ ವ್ಯವಹಾರ ಹೊಂದಿದ್ದು, ಅವರಿಂದ ಕೊಲೆ ಬೆದರಿಕೆ ಬಂದಿತ್ತು ಎಂದು ತಿಳಿದುಬಂದಿದೆ.

ಹೆಚ್ಚುತ್ತಿರುವ ಮಹಿಳಾ ಇನ್‌ಫ್ಲುಯೆನ್ಸರ್‌ಗಳ ಹತ್ಯೆ:

ಟಿಕ್‌ಟಾಕ್‌ನಲ್ಲಿ 1.3 ಮಿಲಿಯನ್‌ಗಿಂತಲೂ ಹೆಚ್ಚು ಫಾಲೋವರ್ಸ್ ಹೊಂದಿದ್ದ ಶಂಸು ಬೀಬಿ ಅವರ ಹತ್ಯೆಯು ಪಾಕಿಸ್ತಾನದಲ್ಲಿ ಸೋಶಿಯಲ್ ಮೀಡಿಯಾ ಮಹಿಳೆಯರ ಮೇಲಿನ ಹಿಂಸಾಚಾರವನ್ನು ಎತ್ತಿ ತೋರಿಸಿದೆ. ಕಳೆದ ಒಂದು ವರ್ಷದಲ್ಲಿ ಪಾಕಿಸ್ತಾನದಲ್ಲಿ ಹತ್ಯೆಗೀಡಾದ 5ನೇ ಮಹಿಳಾ ಇನ್‌ಫ್ಲುಯೆನ್ಸರ್ ಇವರಾಗಿದ್ದಾರೆ.