ಮಲಯಾಳಂ ಹೊಸ ವರ್ಷದ ಪ್ರಯುಕ್ತ ಶಬರಿಮಲೆ ಶ್ರೀ ಅಯ್ಯಪ್ಪ ದೇವಸ್ಥಾನದ ಬಾಗಿಲು ಓಪನ್: ದರ್ಶನಕ್ಕೆ ಹರಿದುಬಂತು ಭಕ್ತಸಾಗರ!

ಶಬರಿಮಲೆ: ಮಲಯಾಳಂ ಹೊಸ ವರ್ಷ ಹಾಗೂ ಚಿಂಗಂ ಮಾಸದ ಶುಭಾರಂಭದ ಹಿನ್ನೆಲೆಯಲ್ಲಿ ಕೇರಳದ ಪ್ರಸಿದ್ಧ ಶಬರಿಮಲೆ ಶ್ರೀ ಅಯ್ಯಪ್ಪ ದೇವಸ್ಥಾನದ ಬಾಗಿಲನ್ನು ಸೋಮವಾರ ಬೆಳಿಗ್ಗೆ 5 ಗಂಟೆಗೆ ಭಕ್ತರ ದರ್ಶನಕ್ಕಾಗಿ ಮುಕ್ತಗೊಳಿಸಲಾಗಿದೆ. ಭಾನುವಾರ ಸಂಜೆಯಿಂದಲೇ ಸಾವಿರಾರು ಭಕ್ತರು ಸ್ವಾಮಿಯ ದರ್ಶನಕ್ಕಾಗಿ ಸನ್ನಿಧಾನಕ್ಕೆ ಆಗಮಿಸಿದ್ದಾರೆ.

ಕರ್ಕಿಡಕಂ ಮಾಸದ ಕೊನೆಯ ದಿನವಾದ ಭಾನುವಾರ ಸಂಜೆ, ತಂತ್ರಿ ಕಂದರಾರು ಬ್ರಹ್ಮದತ್ತನ್ ಅವರ ಸಮ್ಮುಖದಲ್ಲಿ ಪ್ರಧಾನ ಅರ್ಚಕ (ಮೇಲ್ಶಾಂತಿ) ಪ್ರಸಾದ್ ಇ.ಡಿ. ಅವರು ಪೂಜಾ ವಿಧಿವಿಧಾನಗಳನ್ನು ನೆರವೇರಿಸಿ ದೀಪ ಬೆಳಗಿಸಿದರು. ಬಳಿಕ 18 ಪವಿತ್ರ ಮೆಟ್ಟಿಲುಗಳ (ಪಥಿನೆಟ್ಟಾಂ ಪಡಿ) ಕೆಳಗಿರುವ ‘ಆಝಿ’ ಎಂಬ ಪವಿತ್ರ ಅಗ್ನಿಕುಂಡದಲ್ಲಿ ಅಗ್ನಿಯನ್ನು ಪ್ರಜ್ವಲಿಸಲಾಯಿತು.

ಮುಖ್ಯ ಮಾಹಿತಿ ಹಾಗೂ ವೇಳಾಪಟ್ಟಿ:

ಆಗಸ್ಟ್ 17 – 21: ಚಿಂಗಂ ಮಾಸದ ಪೂಜಾ ಕಾರ್ಯಕ್ರಮಗಳು ಜರುಗಲಿದ್ದು, ಆಗಸ್ಟ್ 21ರ ರಾತ್ರಿ 10 ಗಂಟೆಗೆ ದೇವಸ್ಥಾನದ ಬಾಗಿಲು ಮುಚ್ಚಲ್ಪಡಲಿದೆ.

ಆಗಸ್ಟ್ 24 – 28: ಓಣಂ ಹಬ್ಬದ ವಿಶೇಷ ಪೂಜೆಗಳಿಗಾಗಿ ಆಗಸ್ಟ್ 24ರಂದು ದೇವಸ್ಥಾನ ಮತ್ತೆ ತೆರೆಯಲಿದ್ದು, ಆಗಸ್ಟ್ 26ರಂದು ಪ್ರಮುಖ ದಿನವಾದ ‘ತಿರುವೋಣಂ’ ಆಚರಿಸಲಾಗುವುದು.

ಸಾರಿಗೆ ಹಾಗೂ ಆನ್‌ಲೈನ್ ಬುಕಿಂಗ್: ಭಕ್ತಾದಿಗಳಿಗೆ ದರ್ಶನಕ್ಕೆ ಅನುಕೂಲವಾಗುವಂತೆ ಆನ್‌ಲೈನ್ ‘ವರ್ಚುವಲ್ ಕ್ಯೂ’ ವ್ಯವಸ್ಥೆಯನ್ನು ಕಲ್ಪಿಸಲಾಗಿದ್ದು, ಪ್ರಯಾಣಿಕರ ಸೌಕರ್ಯಕ್ಕಾಗಿ ಕೇರಳ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ (KSRTC) ಆಗಸ್ಟ್ 28ರವರೆಗೆ ಹೆಚ್ಚುವರಿ ಬಸ್ ಸೇವೆಗಳನ್ನು ಆರಂಭಿಸಿದೆ.