ಜಿಎಂಯುನಲ್ಲಿ ಉಚಿತ ಕೌಶಲ್ಯಾಭಿವೃದ್ಧಿ ಶಿಬಿರಕ್ಕೆ ಚಾಲನೆ: ಯುವಜನತೆಯ ಉದ್ಯೋಗ ಕನಸಿಗೆ ಹೊಸ ಸ್ಪಂದನೆ!

ಜಿ.ಎಂ. ಪಾಲಿಟೆಕ್ನಿಕ್‌ ಕಾಲೇಜಿನ ಸೆಮಿನಾರ್ ಹಾಲ್ ನಲ್ಲಿ ಈ ಕಾಲೇಜಿನ ಪ್ರಾಂಶುಪಾಲರು ಹಾಗೂ ವೃತ್ತಿಪರ ತರಬೇತಿ ಶಾಲೆಯ ನಿರ್ದೇಶಕರಾದ ಡಾ. ಬಿ.ಆರ್. ಶ್ರೀಧರ್ ಅವರು ಈ ತರಬೇತಿ ಶಿಬಿರಕ್ಕೆ ವಿದ್ಯುಕ್ತವಾಗಿ ಚಾಲನೆ ನೀಡಿದರು.

ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಡಾ. ಬಿ.ಆರ್. ಶ್ರೀಧರ್, “ಇಂದಿನ ಸ್ಪರ್ಧಾತ್ಮಕ ಯುಗದಲ್ಲಿ ಬರಿ ಪದವಿ ಸಾಲದು, ನೈಜ ‘ಕೌಶಲ್ಯ’ ಇದ್ದಾಗ ಮಾತ್ರವೇ ಯಶಸ್ವಿ ಉದ್ಯೋಗ ಕಂಡುಕೊಳ್ಳಲು ಸಾಧ್ಯ. ಯುವಜನತೆಯಲ್ಲಿ ಸ್ವಯಂ ಉದ್ಯೋಗ ಕಂಡುಕೊಳ್ಳುವ ಹುಮ್ಮಸ್ಸು ಮೂಡಿಸಬೇಕೆಂಬ ಉನ್ನತ ಆಶಯ ಜಿಎಂಯು ಕುಲಾಧಿಪತಿಗಳಾದ ಜಿ.ಎಂ. ಲಿಂಗರಾಜು ಹಾಗೂ ಕುಲಪತಿಗಳಾದ ಡಾ. ಎಸ್.ಆರ್. ಶಂಕಪಾಲ್ ಅವರದ್ದಾಗಿದೆ. ಅವರ ದಿವ್ಯ ಮಾರ್ಗದರ್ಶನದಲ್ಲೇ ಈ ಶಿಬಿರ ಮೂಡಿಬಂದಿದೆ” ಎಂದರು.

ಆಗಸ್ಟ್ 15 ರವರೆಗೆ ನಡೆಯಲಿರುವ ಈ ಶಿಬಿರದಲ್ಲಿ ರಾಜ್ಯದ ವಿವಿಧ ಜಿಲ್ಲೆಗಳಿಂದ ಆಗಮಿಸಿರುವ ಸುಮಾರು 40 ಮಂದಿ ಕಲಿಯುತ್ಸಾಹಿ ಯುವಕರು, ಹಿರಿಯ ಶಿಬಿರಾರ್ಥಿಗಳು ಭಾಗವಹಿಸಿದ್ದಾರೆ. ಇವರಿಗೆ ಕೇವಲ ಮಾಹಿತಿಯಷ್ಟೇ ಅಲ್ಲದೆ, ಉದ್ಯೋಗ ಮಾರುಕಟ್ಟೆಯಲ್ಲಿ ಹೆಚ್ಚು ಬೇಡಿಕೆ ಇರುವ: ವೆಲ್ಡಿಂಗ್ ತಂತ್ರಜ್ಞಾನ (Welding Technology), ಮರಗೆಲಸ (Carpentry), ಕಂಪ್ಯೂಟರ್ ಸಹಾಯಕ ವಿನ್ಯಾಸ (CAD), ವಿದ್ಯುತ್ ವೈರಿಂಗ್ (Electrical Wiring) ಈ ನಾಲ್ಕು ವಿಭಾಗಗಳಲ್ಲಿ ಅನುಭವಿ ತಜ್ಞರಿಂದ ಹ್ಯಾಂಡ್ಸ್-ಆನ್ (Hands-on) ಪ್ರಾಯೋಗಿಕ ತರಬೇತಿಯನ್ನು ನೀಡಲಾಗುತ್ತಿದೆ.

ಈ ಕಾರ್ಯಕ್ರಮದಲ್ಲಿ ಕಾರ್ಯಕ್ರಮ ಸಂಯೋಜಕರಾದ ಎಸ್.ಯು. ಸುರೇಶ್ ಬಾಬು, ಮೌನೇಶಪ್ಪ ದೊಡ್ಡಮನಿ ಹಾಗೂ ಎಲೆಕ್ಟ್ರಿಕಲ್ ಮತ್ತು ಎಲೆಕ್ಟ್ರಾನಿಕ್ಸ್ ವಿಭಾಗದ ಪ್ರಾಧ್ಯಾಪಕರಾದ ಜನಾರ್ಧನ ಕೆ.ಬಿ, ರೋಜಾ ಸೇರಿದಂತೆ ಇತರರು ಉಪಸ್ಥಿತರಿದ್ದು ಯುವಕರ ಉತ್ಸಾಹಕ್ಕೆ ಸಾಕ್ಷಿಯಾದರು.

ಈ ವಿಶೇಷ ತರಬೇತಿ ಶಿಬಿರಕ್ಕೆ ಯಾವುದೇ ಶೈಕ್ಷಣಿಕ ಅರ್ಹತೆಯಾಗಲಿ ಅಥವಾ ವಯೋಮಿತಿಯ ಶರತ್ತಾಗಲಿ ಇರುವುದಿಲ್ಲ. ಕಲಿಯುವ ಆಸಕ್ತಿ ಮತ್ತು ಉತ್ಸಾಹವಿರುವ ಪ್ರತಿಯೊಬ್ಬರಿಗೂ ಸಂಪೂರ್ಣ 5 ದಿನಗಳ ಉಚಿತ ಪ್ರಾಯೋಗಿಕ ತರಬೇತಿಯನ್ನು ನೀಡಲಾಗುತ್ತಿರುವುದು ಈ ಶಿಬಿರದ ಮತ್ತೊಂದು ಹೆಗ್ಗಳಿಕೆಯಾಗಿದೆ.