ಮಹಾರಾಷ್ಟ್ರ ಸರ್ಕಾರದ ಬಿಗ್ ಆಕ್ಷನ್: ಐಸಿಸ್, ಅಲ್-ಖೈದಾ ಲಿಂಕ್ ಹೊಂದಿದ್ದ 114 ಇ-ಬುಕ್, ಪತ್ರಿಕೆಗಳ ಮುಟ್ಟುಗೋಲು!

ಮುಂಬೈ: ರಾಜ್ಯದಲ್ಲಿ ಉಗ್ರಗಾಮಿ ವಿಚಾರಧಾರೆ ಹಾಗೂ ಯುವಕರನ್ನು ಕಡುಪಂಥೀಯರನ್ನಾಗಿ ಪರಿವರ್ತಿಸುವ ಪ್ರಚಾರ ತಡೆಯಲು ಮಹಾರಾಷ್ಟ್ರ ಸರ್ಕಾರ ಬೃಹತ್ ಕಾರ್ಯಾಚರಣೆ ನಡೆಸಿದ್ದು, ನಿಷೇಧಿತ ಭಯೋತ್ಪಾದಕ ಸಂಘಟನೆಗಳಿಗೆ ಸಂಬಂಧಿಸಿದ ೧೧೪ ಪ್ರಕಟಣೆಗಳನ್ನು ಸಂಪೂರ್ಣವಾಗಿ ನಿಷೇಧಿಸಿದೆ.

ಆಗಸ್ಟ್ ೬, ೨೦೨೬ ರಂದು ಗೃಹ ಇಲಾಖೆ ಬಿಡುಗಡೆ ಮಾಡಿರುವ ಗೆಜೆಟ್ ಅಧಿಸೂಚನೆಯಲ್ಲಿ ಈ ನಿರ್ಧಾರವನ್ನು ಪ್ರಕಟಿಸಲಾಗಿದೆ. ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ (BNSS), ೨೦೨೩ ರ ಸೆಕ್ಷನ್ ೯೮(೧) ರ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದ್ದು, ಸಾರ್ವಜನಿಕ ಶಾಂತಿ, ರಾಷ್ಟ್ರೀಯ ಭದ್ರತೆ ಮತ್ತು ದೇಶದ ಸಾರ್ವಭೌಮತ್ವಕ್ಕೆ ಧಕ್ಕೆ ತರುವ ಎಲ್ಲಾ ಪ್ರಕಟಣೆಗಳನ್ನು ಜಪ್ತಿ ಮಾಡಲು ಸರ್ಕಾರ ಆದೇಶಿಸಿದೆ.

ಎಟಿಎಸ್ ಮತ್ತು ಸೈಬರ್ ಗೂಢಚಾರಿಕೆಯಿಂದ ಕೃತ್ಯ ಬೆಳಕಿಗೆ:

ಮಹಾರಾಷ್ಟ್ರ ಭಯೋತ್ಪಾದನಾ ನಿಗ್ರಹ ಪಡೆಯ (ATS) ತನಿಖೆ, ಗುಪ್ತಚರ ಸಂಸ್ಥೆಗಳ ಮಾಹಿತಿ ಹಾಗೂ ಸೈಬರ್ ಕಣ್ಗಾವಲಿನಿಂದ ಪ್ರಮುಖ ಮಾಹಿತಿಗಳು ಲಭ್ಯವಾಗಿದ್ದವು. ಅಸ್ತಿತ್ವದಲ್ಲಿರುವ ನಿರ್ಬಂಧಗಳ ನಡುವೆಯೂ ಭಯೋತ್ಪಾದಕ ಸಂಘಟನೆಗಳ ಡಿಜಿಟಲ್ ಹಾಗೂ ಮುದ್ರಿತ ಪ್ರಚಾರ ಸಾಮಗ್ರಿಗಳು ಚಲಾವಣೆಯಲ್ಲಿದ್ದದ್ದು ಕಂಡುಬಂದಿದೆ. ಇಂತಹ ಸಾಹಿತ್ಯವು ಹಿಂಸಾತ್ಮಕ ಉಗ್ರವಾದವನ್ನು ವೈಭವೀಕರಿಸುವುದು, ಯುವಕರನ್ನು ರ‍್ಯಾಡಿಕಲೈಸ್ ಮಾಡುವುದು ಮತ್ತು ಭಯೋತ್ಪಾದಕ ಪಡೆಗಳಿಗೆ ಭರ್ತಿ ಮಾಡಲು ಪ್ರಚೋದನೆ ನೀಡುತ್ತಿರುವುದು ಕಂಡುಬಂದಿದೆ.

ಯಾವೆಲ್ಲಾ ಸಂಘಟನೆಗಳು, ಪುಸ್ತಕಗಳ ಮೇಲೆ ನಿಷೇಧ?

ಸರ್ಕಾರಿ ಅಧಿಸೂಚನೆಯ ಪ್ರಕಾರ, ಇಸ್ಲಾಮಿಕ್ ಸ್ಟೇಟ್ (ISIS), ಐಎಸ್‌ಕೆಪಿ (ISKP), ಅಲ್-ಖೈದಾ (AQIS) ಮತ್ತು ಹಿಜ್ಬುಲ್ ಮುಜಾಹಿದೀನ್‌ನ ಪೀರ್ ಪಂಜಾಲ್ ರೆಜಿಮೆಂಟ್ ಸೇರಿದಂತೆ ಹಲವು ನಿಷೇಧಿತ ಸಂಘಟನೆಗಳ ಪ್ರಕಟಣೆಗಳನ್ನು ಗುರಿಯಾಗಿಸಲಾಗಿದೆ.

ನಿಷೇಧಿತ ಪ್ರಕಟಣೆಗಳಲ್ಲಿ ವಾಯ್ಸ್ ಆಫ್ ಖುರಾಸಾನ್ ಮ್ಯಾಗಜಿನ್ (Voice of Khurasan Magazine), ದಿ ರೆವಲ್ಯೂಷನರಿ ರಿಸರ್ಜೆನ್ಸ್ (The Revolutionary Resurgence), ಕಾಶ್ಮೀರ್ ಕಿಫಾ (Kashmir Kifah), ದಿ ಸೋಲ್ ಆಫ್ ರೆಸಿಸ್ಟೆನ್ಸ್ (The Soul of Resistance) ಹಾಗೂ ನವಾಯ್ ಗಜ್ವಾ-ಎ-ಹಿಂದ್ (Nawai Gazwa-e-Hind) ನಂತಹ ಪ್ರಮುಖ ಪುಸ್ತಕಗಳು ಮತ್ತು ಇ-ಪತ್ರಿಕೆಗಳು ಸೇರಿವೆ.

ಈ ಆದೇಶದ ಮೇರೆಗೆ ಈ ಎಲ್ಲಾ ೧೧೪ ಪ್ರಕಟಣೆಗಳ ಮುದ್ರಣ, ಪ್ರಕಟಣೆ, ವಿತರಣೆ, ಮಾರಾಟ, ಪ್ರದರ್ಶನ ಹಾಗೂ ಡಿಜಿಟಲ್/ಭೌತಿಕ ದಾಸ್ತಾನು ಮಾಡುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದ್ದು, ಎಲ್ಲವನ್ನೂ ಮುಟ್ಟುಗೋಲು ಹಾಕಿಕೊಳ್ಳಲು ಸೂಚಿಸಲಾಗಿದೆ.