ಐಟಿ ರಂಗದಲ್ಲಿ ಮುಂದುವರಿದ ವಜಾ ಪರ್ವ: 2,600 ಸಿಬ್ಬಂದಿ ಮನೆಗೆ ಕಳುಹಿಸಿದ ವೀಸಾ, ಹಿರಿಯ ಅಧಿಕಾರಿಗಳಿಗೂ ತಟ್ಟಿದ ಬಿಸಿ!

ನವದೆಹಲಿ: ಜಾಗತಿಕ ಡಿಜಿಟಲ್ ಪಾವತಿ ದೈತ್ಯ ‘ವೀಸಾ’ (Visa) ತನ್ನ ಒಟ್ಟು ಸಿಬ್ಬಂದಿ ಪಡೆಯಲ್ಲಿ ಶೇಕಡಾ 7 ರಷ್ಟು ಅಂದರೆ ಸುಮಾರು 2,600 ಉದ್ಯೋಗಿಗಳನ್ನು ವಜಾಗೊಳಿಸುವುದಾಗಿ ಘೋಷಿಸಿದೆ. ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಅಳವಡಿಕೆ ಮತ್ತು ಸಂಸ್ಥೆಯ ಮರುಸಂಘಟನೆ (Restructuring) ಪ್ರಕ್ರಿಯೆಯ ಭಾಗವಾಗಿ ಈ ನಿರ್ಧಾರ ತಳೆಯಲಾಗಿದೆ.

ಪ್ರಮುಖ ವಿಭಾಗಗಳ ಮೇಲೆಯೇ ಬೀಳಲಿದೆ ಪೆಟ್ಟು

ಈ ವಜಾ ಪ್ರಕ್ರಿಯೆಯಿಂದಾಗಿ ವೀಸಾ ಸಂಸ್ಥೆಯ ಟೆಕ್ನಾಲಜಿ (Tech) ಮತ್ತು ಪ್ರಾಡಕ್ಟ್ (Product) ವಿಭಾಗದ ಉದ್ಯೋಗಿಗಳು ಹೆಚ್ಚು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಕಂಪನಿಯ ಹಿರಿಯ ನಿರ್ದೇಶಕರು ಮತ್ತು ಟೆಕ್ ನಾಯಕರು ಸೇರಿದಂತೆ ಪ್ರಮುಖ ಹುದ್ದೆಯಲ್ಲಿದ್ದವರನ್ನೂ ಈ ವಜಾ ಪಟ್ಟಿಗೆ ಸೇರಿಸಲಾಗಿದೆ. ಉದಾಹರಣೆಗೆ, ಸಂಸ್ಥೆಯಲ್ಲಿ 7 ವರ್ಷ ಸೇವೆ ಸಲ್ಲಿಸಿದ್ದ ಸೆಕ್ಯುರಿಟಿ ಇಂಜಿನಿಯರಿಂಗ್ ಡೈರೆಕ್ಟರ್ ಜಿನಾಲ್ ಜೋಶಿ ಸೇರಿದಂತೆ ಹಲವು ಪ್ರಮುಖ ಅಧಿಕಾರಿಗಳು ಹುದ್ದೆ ಕಳೆದುಕೊಂಡಿದ್ದಾರೆ.

ಸಿಇಒ ನೀಡಿದ ಸ್ಪಷ್ಟನೆ ಏನು?

ಈ ಕುರಿತು ಉದ್ಯೋಗಿಗಳಿಗೆ ಇಮೇಲ್ ಮೆಮೊ ರವಾನಿಸಿರುವ ವೀಸಾ ಸಿಇಒ ರಯಾನ್ ಮೆಕ್‌ಇನರ್ನಿ (Ryan McInerney), “ಕಂಪನಿಯ ದೀರ್ಘಕಾಲೀನ ಬೆಳವಣಿಗೆ ಮತ್ತು ಹೂಡಿಕೆಗಳಿಗೆ ಹೆಚ್ಚಿನ ಆದ್ಯತೆ ನೀಡಲು ಈ ಕಠಿಣ ನಿರ್ಧಾರ ಅನಿವಾರ್ಯವಾಗಿದೆ. ಕಾರ್ಯಾಚರಣೆಯ ದಕ್ಷತೆಯನ್ನು ಹೆಚ್ಚಿಸಲು ಮತ್ತು ಭವಿಷ್ಯದ ಅವಕಾಶಗಳ ಮೇಲೆ ಮರುಹೂಡಿಕೆ ಮಾಡಲು ಇದು ಸರಿಯಾದ ಹಾದಿಯಾಗಿದೆ” ಎಂದು ಸಮರ್ಥಿಸಿಕೊಂಡಿದ್ದಾರೆ.

H-1B ವೀಸಾದಾರರಿಗೆ 60 ದಿನಗಳ ಗಡುವು

ಅಮೆರಿಕದಲ್ಲಿ H-1B ವೀಸಾ ಅಡಿಯಲ್ಲಿ ಕೆಲಸ ಮಾಡುತ್ತಿದ್ದ ಭಾರತೀಯ ಮೂಲದ ಉದ್ಯೋಗಿಗಳಿಗೆ ಈ ನಿರ್ಧಾರ ಭಾರಿ ಹಿನ್ನಡೆಯಾಗಿದೆ. ಅಮೆರಿಕದ ವೀಸಾ ನಿಯಮಾವಳಿಗಳ ಪ್ರಕಾರ, ಕೆಲಸ ಕಳೆದುಕೊಂಡ 60 ದಿನಗಳ ಒಳಗಾಗಿ ಹೊಸ ಉದ್ಯೋಗ ಕಂಡುಕೊಳ್ಳದಿದ್ದರೆ ಅವರು ದೇಶ ತೊರೆಯಬೇಕಾಗುತ್ತದೆ.

ಐಟಿ ರಂಗದಲ್ಲಿ ಮುಂದುವರಿದ ವಜಾ ಪರ್ವ

ಈ ವರ್ಷದಲ್ಲಿ ಮಾಸ್ಟರ್‌ಕಾರ್ಡ್ (Mastercard) 4% ಹಾಗೂ ಬ್ಲಾಕ್ (Block) ಸಂಸ್ಥೆ ಸುಮಾರು 4,000 ಉದ್ಯೋಗಿಗಳನ್ನು ವಜಾಗೊಳಿಸಿತ್ತು. ‘Layoffs.fyi’ ವರದಿಯ ಪ್ರಕಾರ, ಪ್ರಸಕ್ತ ವರ್ಷದಲ್ಲಿ ಜಾಗತಿಕವಾಗಿ 250ಕ್ಕೂ ಹೆಚ್ಚು ತಂತ್ರಜ್ಞಾನ ಕಂಪನಿಗಳಿಂದ 1.24 ಲಕ್ಷಕ್ಕೂ ಹೆಚ್ಚು ಐಟಿ ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ.