ಖಾಸಗಿ ಶಾಲೆಗಳತ್ತ ಪೋಷಕರ ದಂಡು: 2 ವರ್ಷಗಳಲ್ಲಿ ಸರ್ಕಾರಿ ಶಾಲೆಯ 86 ಲಕ್ಷ ವಿದ್ಯಾರ್ಥಿಗಳ ಕಡಿತ; ಕೇಂದ್ರದ ಯುಡೈಸ್ ವರದಿ ಪ್ರಕಟ!

ನವದೆಹಲಿ: ದೇಶದ ಶೈಕ್ಷಣಿಕ ವಲಯದಲ್ಲಿ ದೊಡ್ಡ ಮಟ್ಟದ ಬದಲಾವಣೆಯೊಂದು ದಾಖಲಾಗಿದ್ದು, ಪೋಷಕರು ಸರ್ಕಾರಿ ಶಾಲೆಗಳಿಗಿಂತ ಖಾಸಗಿ ಅನುದಾನರಹಿತ ಶಾಲೆಗಳತ್ತ ತೀವ್ರ ಆಸಕ್ತಿ ತೋರುತ್ತಿರುವುದು ಬೆಳಕಿಗೆ ಬಂದಿದೆ. ಕೇಂದ್ರ ಶಿಕ್ಷಣ ಸಚಿವಾಲಯ ಬಿಡುಗಡೆ ಮಾಡಿರುವ ‘ಯುಡೈಸ್ ಪ್ಲಸ್ 2025-26’ (UDISE 2025-26) ಇತ್ತೀಚಿನ ವರದಿಯ ಪ್ರಕಾರ, ಕಳೆದ ಎರಡು ವರ್ಷಗಳಲ್ಲಿ ಸರ್ಕಾರಿ ಶಾಲೆಗಳಲ್ಲಿ ದಾಖಲಾಗುವ ಮಕ್ಕಳ ಸಂಖ್ಯೆಯಲ್ಲಿ ಬರೋಬ್ಬರಿ 86 ಲಕ್ಷ ಕುಸಿತ ಕಂಡುಬಂದಿದೆ.

ಇದೇ ಅವಧಿಯಲ್ಲಿ ಖಾಸಗಿ ಅನುದಾನರಹಿತ ಶಾಲೆಗಳು ಬರೋಬ್ಬರಿ 88 ಲಕ್ಷಕ್ಕೂ ಹೆಚ್ಚು ಹೊಸ ವಿದ್ಯಾರ್ಥಿಗಳನ್ನು ಸೆಳೆದುಕೊಳ್ಳುವಲ್ಲಿ ಯಶಸ್ವಿಯಾಗಿವೆ. ಶಿಕ್ಷಣ ಸಚಿವಾಲಯದ ಅಧಿಕೃತ ಡಿಜಿಟಲ್ ಡೇಟಾಬೇಸ್ ವರದಿ ಇದೀಗ ಸಾರ್ವಜನಿಕವಾಗಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ವರದಿಯ ಪ್ರಮುಖ ಮುಖ್ಯಾಂಶಗಳು:

ದಾಖಲಾತಿ ಪ್ರಮಾಣ: ದೇಶಾದ್ಯಂತ ಒಟ್ಟಾರೆ ಶಾಲಾ ದಾಖಲಾತಿ ಸಂಖ್ಯೆ (Foundational to Secondary) 2023-24ರಲ್ಲಿ 24.80 ಕೋಟಿ ಇದ್ದದ್ದು, 2025-26ರ ವೇಳೆಗೆ 24.72 ಕೋಟಿಗೆ ಇಳಿಕೆಯಾಗಿದೆ. ಅಂದರೆ ಸುಮಾರು 8.26 ಲಕ್ಷ ಒಟ್ಟು ದಾಖಲಾತಿ ಕಡಿಮೆಯಾಗಿದೆ.

ಸರ್ಕಾರಿ vs ಖಾಸಗಿ: ಸರ್ಕಾರಿ ಶಾಲೆಗಳಲ್ಲಿನ ದಾಖಲಾತಿಯು 12.75 ಕೋಟಿಯಿಂದ 11.89 ಕೋಟಿಗೆ ಕುಸಿದಿದೆ. ಅದೇ ಸಮಯದಲ್ಲಿ, ಮಾನ್ಯತೆ ಪಡೆದ ಖಾಸಗಿ ಅನುದಾನರಹಿತ ಶಾಲೆಗಳ ದಾಖಲಾತಿ 9 ಕೋಟಿಯಿಂದ 9.89 ಕೋಟಿಗೆ ಏರಿಕೆಯಾಗಿದೆ.

ಶಿಕ್ಷಕರ ಸಂಖ್ಯೆಯಲ್ಲಿ ಹೆಚ್ಚಳ: ಸಮಾಧಾನಕರ ಸಂಗತಿಯೆಂದರೆ ದೇಶದಲ್ಲಿ ಒಟ್ಟು ಶಿಕ್ಷಕರ ಸಂಖ್ಯೆ 98.08 ಲಕ್ಷದಿಂದ 1.03 ಕೋಟಿಗೆ ಏರಿಕೆಯಾಗಿದೆ. ಇದರಿಂದಾಗಿ ವಿದ್ಯಾರ್ಥಿ-ಶಿಕ್ಷಕರ ಅನುಪಾತ (PTR) 25 ರಿಂದ 24 ಕ್ಕೆ ಸುಧಾರಿಸಿದೆ.

ಏಕ-ಶಿಕ್ಷಕ ಶಾಲೆಗಳ ಇಳಿಕೆ: ದೇಶದಲ್ಲಿ ‘ಶೂನ್ಯ ದಾಖಲಾತಿ’ ಹೊಂದಿದ್ದ ಶಾಲೆಗಳ ಸಂಖ್ಯೆ 12,954 ರಿಂದ 5,663 ಕ್ಕೆ ಇಳಿದಿದೆ. ಹಾಗೆಯೇ ಕೇವಲ ಒಬ್ಬರೇ ಶಿಕ್ಷಕರಿದ್ದ ಶಾಲೆಗಳ ಸಂಖ್ಯೆ 1.11 ಲಕ್ಷದಿಂದ 1.01 ಲಕ್ಷಕ್ಕೆ ಕುಸಿದಿದೆ.

ಡ್ರಾಪ್‌ಔಟ್ ಪ್ರಮಾಣದಲ್ಲಿ ಭಾರಿ ಸುಧಾರಣೆ:

ದಾಖಲಾತಿಗಳು ಖಾಸಗಿ ವಲಯದತ್ತ ವಾಲುತ್ತಿದ್ದರೂ, ಶಾಲೆ ಬಿಡುವ ಮಕ್ಕಳ (Dropout Rate) ಪ್ರಮಾಣದಲ್ಲಿ ಗಣನೀಯ ಸುಧಾರಣೆ ಕಂಡುಬಂದಿದೆ. ಪ್ರೌಢಶಾಲಾ (Secondary) ಹಂತದಲ್ಲಿ ಡ್ರಾಪ್‌ಔಟ್ ಪ್ರಮಾಣವು ಶೇ. 8.2 ರಿಂದ ಶೇ. 7.0 ಕ್ಕೆ ಇಳಿಕೆಯಾಗಿದೆ. ಜೊತೆಗೆ ಪ್ರೌಢಶಾಲಾ ಹಂತದಲ್ಲಿ ವಿದ್ಯಾರ್ಥಿಗಳನ್ನು ಶಾಲೆಯಲ್ಲೇ ಉಳಿಸಿಕೊಳ್ಳುವ ಪ್ರಮಾಣ (Retention Rate) ಶೇ. 47.2 ರಿಂದ ಶೇ. 51.9 ಕ್ಕೆ ಏರಿಕೆಯಾಗಿರುವುದು ಉತ್ತಮ ಬೆಳವಣಿಗೆಯಾಗಿದೆ. ಆದಾಗ್ಯೂ, ಪ್ರಾಥಮಿಕ ಹಂತದಲ್ಲಿ ಮಕ್ಕಳನ್ನು ಉಳಿಸಿಕೊಳ್ಳುವಲ್ಲಿ ಅಲ್ಪ ಹಿನ್ನಡೆಯಾಗಿದೆ ಎಂದು ವರದಿ ಉಲ್ಲೇಖಿಸಿದೆ.