ಐಐಎಂ ಬೆಂಗಳೂರು ಆವರಣದಲ್ಲಿ ಭೀಕರ ಘಟನೆ: ಆರು ವರ್ಷಗಳ ಕಾಲ ದಂಪತಿಯಿಂದ ಕಿರುಕುಳ, ಹಲ್ಲೆಗೊಳಗಾದ ಮಣಿಪುರದ ಯುವತಿ!

ಬೆಂಗಳೂರು: ಪ್ರತಿಷ್ಠಿತ ಐಐಎಂ ಬೆಂಗಳೂರು (IIM-B) ಕ್ಯಾಂಪಸ್ ಒಳಗಿರುವ ದಂಪತಿಯ ಮನೆಯಲ್ಲಿ ಕೆಲಸ ಮಾಡುತ್ತಿದ್ದ ಮಣಿಪುರದ 23 ವರ್ಷದ ಯುವತಿಯ ಮೇಲೆ ಕಳೆದ ಆರು ವರ್ಷಗಳಿಂದ ನಿರಂತರ ದೌರ್ಜನ್ಯ ನಡೆದಿದೆ ಎಂಬ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.

ಘಟನೆಯ ವಿವರ:

ಮಣಿಪುರ ಮೂಲದ ಈ ಯುವತಿ 2021 ರಿಂದ ಅಮರ್ ಮತ್ತು ಅಂಶು ಎಂಬುವವರ ಮನೆಯಲ್ಲಿ ಕೆಲಸಕ್ಕಿದ್ದರು. ಈ ಅವಧಿಯಲ್ಲಿ ಆಕೆಗೆ ಸರಿಯಾಗಿ ಆಹಾರ ನೀಡದೆ, ಮೊಬೈಲ್ ಕಿತ್ತುಕೊಂಡು ಹೊರಜಗತ್ತಿನೊಂದಿಗೆ ಸಂಪರ್ಕವಿಲ್ಲದಂತೆ ಕೂಡಿಹಾಕಲಾಗಿತ್ತು ಎಂದು ಸಂತ್ರಸ್ತೆ ಪೊಲೀಸ್ ದೂರಿನಲ್ಲಿ ತಿಳಿಸಿದ್ದಾರೆ. ಸಣ್ಣ ಪುಟ್ಟ ವಿಚಾರಗಳಿಗೂ ದೈಹಿಕವಾಗಿ ಹಲ್ಲೆ ನಡೆಸಲಾಗುತ್ತಿತ್ತು ಎಂದು ಅವರು ಆರೋಪಿಸಿದ್ದಾರೆ.

ಏಪ್ರಿಲ್ 15ರ ಘಟನೆ:

ಏಪ್ರಿಲ್ 15 ರಂದು ನಸುಕಿನ ಜಾವ 2:30 ರ ಸುಮಾರಿಗೆ ದಂಪತಿಗಳು ಯುವತಿಯ ಕೂದಲು ಹಿಡಿದು ಎಳೆದಾಡಿ, ತೀವ್ರವಾಗಿ ಹಲ್ಲೆ ನಡೆಸಿದ್ದಾರೆ. ಈ ಘಟನೆಯ ನಂತರ ಆಕೆಯನ್ನು ಮನೆಯಿಂದ ಹೊರಹೋಗದಂತೆ ಕಟ್ಟುನಿಟ್ಟಿನ ನಿಗಾದಲ್ಲಿ ಇರಿಸಲಾಗಿತ್ತು.

ಬೆಳಕಿಗೆ ಬಂದಿದ್ದು ಹೇಗೆ?

ಮೇ 4 ರಂದು ಮತ್ತೆ ಹಸಿವಿನಿಂದ ಬಳಲುತ್ತಿದ್ದ ಯುವತಿ ಹೇಗೋ ತಪ್ಪಿಸಿಕೊಂಡು ನೆರೆಮನೆಯವರ ಸಹಾಯ ಕೋರಿದ್ದಾರೆ. ನೆರೆಮನೆಯವರು ಆಕೆಗೆ ಆಹಾರ ನೀಡಿ, ತಮ್ಮ ಫೋನ್ ಬಳಸಲು ಅವಕಾಶ ಮಾಡಿಕೊಟ್ಟಿದ್ದಾರೆ. ಈ ಮೂಲಕ ಯುವತಿ ತನ್ನ ಚಿಕ್ಕಮ್ಮ ಮತ್ತು ಕುಕಿ ಸ್ಟೂಡೆಂಟ್ಸ್ ಆರ್ಗನೈಸೇಶನ್ (KSOB) ಅಧ್ಯಕ್ಷರನ್ನು ಸಂಪರ್ಕಿಸಿದ್ದು, ಪ್ರಕರಣ ಪೊಲೀಸರ ಮೆಟ್ಟಿಲೇರಿದೆ