ಇರಾನ್ ಸರ್ವೋಚ್ಚ ನಾಯಕ ಅಲಿ ಖಮೇನಿ ಹತ್ಯೆ: ಖಮೇನಿ ಫೋಟೋ ಬಳಸಿ ಸಿಗರೇಟ್ ಹಚ್ಚಿ ಯುವತಿ ಸಂಭ್ರಮಾಚರಣೆ!

ತೆಹ್ರಾನ್/ಟೊರಾಂಟೋ: ಇರಾನ್‌ನ ದೀರ್ಘಕಾಲದ ಸರ್ವೋಚ್ಚ ನಾಯಕ 86 ವರ್ಷದ ಅಯತೊಲ್ಲಾ ಅಲಿ ಖಮೇನಿ ಅವರು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ವೈಮಾನಿಕ ದಾಳಿಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಇರಾನ್ ಸರ್ಕಾರ ಅಧಿಕೃತವಾಗಿ ದೃಢಪಡಿಸಿದೆ. ಈ ಘಟನೆಯು ಇಡೀ ವಿಶ್ವದ ರಾಜಕೀಯ ಸಮೀಕರಣಗಳನ್ನು ಬದಲಿಸಿದ್ದು, ಇರಾನ್‌ನಲ್ಲಿ 40 ದಿನಗಳ ಕಾಲ ಶೋಕಾಚರಣೆ ಘೋಷಿಸಲಾಗಿದೆ.

ಈ ನಡುವೆ, ಇರಾನ್ ಸರ್ಕಾರಕ್ಕೆ ಕಡು ವೈರಿಯಾಗಿದ್ದ ಮತ್ತು ಜನವರಿ ತಿಂಗಳಲ್ಲಿ ಖಮೇನಿಯವರ ಭಾವಚಿತ್ರವನ್ನು ಸುಟ್ಟು ಅದರಿಂದ ಸಿಗರೇಟ್ ಹಚ್ಚುವ ಮೂಲಕ ವಿಶ್ವದಾದ್ಯಂತ ಸಂಚಲನ ಮೂಡಿಸಿದ್ದ ಯುವತಿ ‘ಮೊರ್ಟಿಶಿಯಾ ಆಡಮ್ಸ್’ (Morticia Addams) ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಖಮೇನಿ ಸಾವನ್ನು ಸಂಭ್ರಮಿಸಿದ್ದಾರೆ.

ಮುಖ್ಯಾಂಶಗಳು:

ಜಂಟಿ ದಾಳಿ:

ಇಸ್ರೇಲ್‌ನ 200ಕ್ಕೂ ಹೆಚ್ಚು ಯುದ್ಧ ವಿಮಾನಗಳು ಮತ್ತು ಅಮೆರಿಕದ ಪಡೆಗಳು ಇರಾನ್‌ನ 500ಕ್ಕೂ ಹೆಚ್ಚು ಗುರಿಗಳ ಮೇಲೆ ದಾಳಿ ನಡೆಸಿದ್ದು, ಖಮೇನಿಯವರ ನಿವಾಸವನ್ನೂ ಧ್ವಂಸಗೊಳಿಸಿವೆ.

ಮೊರ್ಟಿಶಿಯಾ ಆಡಮ್ಸ್ ಪ್ರತಿಕ್ರಿಯೆ:

ಕೆನಡಾದ ಟೊರಾಂಟೋದಲ್ಲಿ ನೆಲೆಸಿರುವ ಇರಾನ್ ನಿರಾಶ್ರಿತೆ ‘ಮೊರ್ಟಿಶಿಯಾ’, “ನಿಮ್ಮ ಸಮಾಧಿಯ ಮೇಲೆ ನಾನು ನರ್ತಿಸುತ್ತೇನೆ ಎಂದು ಹೇಳಿರಲಿಲ್ಲವೇ?” ಎಂದು ಎಕ್ಸ್ (X) ನಲ್ಲಿ ಬರೆದುಕೊಂಡಿದ್ದಾರೆ.

ಪ್ರತಿಕಾರ:

ಖಮೇನಿ ಸಾವಿನ ಬೆನ್ನಲ್ಲೇ ಇರಾನ್ ಸೈನ್ಯವು ಇಸ್ರೇಲ್ ಮತ್ತು ಗಲ್ಫ್ ರಾಷ್ಟ್ರಗಳಲ್ಲಿದ್ದ ಅಮೆರಿಕದ ಸೈನಿಕ ತಾಣಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಿದ್ದು, ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಭೀತಿ ಆವರಿಸಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು “ಖಮೇನಿ ಒಬ್ಬ ಇಲಿ ಸತ್ತಂತೆ ಸತ್ತಿದ್ದಾರೆ” ಎಂದು ಟೀಕಿಸಿದ್ದು, ಇರಾನ್‌ನ ಜನತೆಗೆ ಇದು ತಮ್ಮ ದೇಶವನ್ನು ಮರಳಿ ಪಡೆಯಲು ಸಿಕ್ಕ ದೊಡ್ಡ ಅವಕಾಶ ಎಂದು ಕರೆ ನೀಡಿದ್ದಾರೆ.