ಬಿಸಿಲಿನ ತಾಪ ಮತ್ತು ಕಂಠದ ಆರೋಗ್ಯ: ಹೈಡ್ರೇಷನ್ ಏಕೆ ಮುಖ್ಯ?

ಬೆಂಗಳೂರು: ಬೆಂಗಳೂರಿನಲ್ಲಿ ಬೇಸಿಗೆ ಉಷ್ಣತೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಡಿಹೈಡ್ರೇಷನ್ ಸಮಸ್ಯೆಗಳು ಹೆಚ್ಚುತ್ತಿವೆ. ಬಿಸಿಲಿನ ತಾಪಕ್ಕೆ ಜನರು ಹೈರಣಾಗುತ್ತಾರೆ. ದೇಹದಲ್ಲಿ ನೀರಿನ ಕೊರತೆ ಉಂಟಾದಾಗ ಕೇವಲ ದೌರ್ಬಲ್ಯ ಅಥವಾ ತಲೆನೋವು ಮಾತ್ರವಲ್ಲದೆ ಕಂಠ ಮತ್ತು ಧ್ವನಿಯ ಮೇಲೂ ಪರಿಣಾಮ ಬೀರುತ್ತದೆ . ಆದರೆ ENT ತಜ್ಞರ ಪ್ರಕಾರ ಬೇಸಿಗೆಯಲ್ಲಿ ಗಂಟಲು ಒಣಗುವುದು, ಧ್ವನಿ ಗರಗರಿಸುವುದು ಮತ್ತು ಮಾತನಾಡುವಾಗ ದಣಿವು ಕಾಣಿಸಿಕೊಳ್ಳುವ ಪ್ರಕರಣಗಳು ಹೆಚ್ಚಾಗುತ್ತಿವೆ.

ಹೈಡ್ರೇಷನ್ ಮತ್ತು ಕಂಠದ ಸಂಬಂಧ

ನಮ್ಮ ಸ್ವರತಂತುಗಳು (Vocal Cords) ಸುಗಮವಾಗಿ ಕೆಲಸ ಮಾಡಲು ಲೋಳೆಯಂತಹ (Mucus) ಪದರದ ಅಗತ್ಯವಿರುತ್ತದೆ. ದೇಹದಲ್ಲಿ ನೀರಿನಂಶ ಕಡಿಮೆಯಾದಾಗ ಈ ಪದರ ಒಣಗುತ್ತದೆ, ಇದರಿಂದ:

• ಧ್ವನಿ ಕುಸಿತ: ಮಾತನಾಡುವಾಗ ಧ್ವನಿ ಕಿೋಗುವುದು ಅಥವಾ ಗಂಟಲು ಕಟ್ಟುವುದು.

• ಕಿರಿಕಿರಿ: ಗಂಟಲಿನಲ್ಲಿ ಏನೋ ಸಿಲುಕಿಕೊಂಡಂತ ಅನುಭವ ಅಥವಾ ಪದೇ ಪದೇ ಕೆಮ್ಮುವ ಇಚ್ಛೆ.

• ಸೋಂಕಿನ ಭೀತಿ: ಒಣಗಿದ ಗಂಟಲು ಬ್ಯಾಕ್ಟೀರಿಯಾ ಮತ್ತು ವೈರಸ್‌ಗಳಿಗೆ ಸುಲಭವಾಗಿ ತುತ್ತಾಗಬಹುದು.

ಬೆಂಗಳೂರಿನಲ್ಲಿ ಬೇಸಿಗೆಯಲ್ಲಿ ಡಿಹೈಡ್ರೇಷನ್ ಸಂಬಂಧಿತ ಸಮಸ್ಯೆಗಳಿಗಾಗಿ ಆಸ್ಪತ್ರೆಗಳಿಗೆ ಬರುವವರ ಸಂಖ್ಯೆ ಹೆಚ್ಚಾಗುತ್ತದೆ. ಉಷ್ಣತೆಯ ಅವಧಿಯಲ್ಲಿ ORS ಬಳಕೆ ಸುಮಾರು 60% ಹೆಚ್ಚಾಗುತ್ತದೆ ಎಂದು ವರದಿಗಳು ಸೂಚಿಸುತ್ತವೆ. ಅದೇ ರೀತಿ, ಬಿಸಿಲಿನ ಸಮಯದಲ್ಲಿ ಡಿಹೈಡ್ರೇಷನ್, ಜ್ವರ ಮತ್ತು ದೌರ್ಬಲ್ಯ ಸಮಸ್ಯೆಗಳಿಗಾಗಿ OPD ಭೇಟಿಗಳು ಸುಮಾರು 20% ಹೆಚ್ಚಾಗುತ್ತವೆ.

ಮೆಡಿಕವರ್ ಆಸ್ಪತ್ರೆಯ ಕನ್ಸಲ್ಟಂಟ್ ENT ಸರ್ಜನ್ ಡಾ. ಪ್ರೇರಿತ್ ರಾವ್ ಅವರ ಪ್ರಕಾರ, “ದೇಹದಲ್ಲಿ ನೀರಿನ ಕೊರತೆ ಉಂಟಾದಾಗ ಕಂಠ ಒಣಗುತ್ತದೆ ಮತ್ತು ವೋಕಲ್ ಕಾರ್ಡ್‌ಗಳಿಗೆ ಅಗತ್ಯವಾದ ತೇವಾಂಶ ಕಡಿಮೆಯಾಗುತ್ತದೆ. ಇದರಿಂದ ಧ್ವನಿ ಗರಗರಿಸುವುದು, ಗಂಟಲು ಉರಿ ಮತ್ತು ಮಾತನಾಡುವಾಗ ದಣಿವು ಕಾಣಿಸಿಕೊಳ್ಳುತ್ತದೆ.”

ಡಿಹೈಡ್ರೇಷನ್‌ನಿಂದ ಗಂಟಲು ಒಣಗುವುದು, ಪದೇಪದೇ ಗಂಟಲು ಸ್ವಚ್ಛಗೊಳಿಸುವ ಅಭ್ಯಾಸ, ಧ್ವನಿ ಕಡಿಮೆಯಾಗುವುದು ಮತ್ತು ನೋವು ಕಾಣಿಸಬಹುದು. ಇದು ಮುಂದುವರಿದರೆ ವೋಕಲ್ ಕಾರ್ಡ್ ಉರಿಯೂತಕ್ಕೂ ಕಾರಣವಾಗಬಹುದು. ಶಿಕ್ಷಕರು, ಗಾಯಕರು, ಕಾಲ್ ಸೆಂಟರ್ ಉದ್ಯೋಗಿಗಳು ಮತ್ತು ಹೆಚ್ಚು ಮಾತನಾಡುವವರು ಹೆಚ್ಚು ತೊಂದರೆ ಅನುಭವಿಸುತ್ತಾರೆ. ಮಕ್ಕಳು ಮತ್ತು ವೃದ್ಧರು ಕೂಡ ಬೇಗನೆ ಡಿಹೈಡ್ರೇಷನ್‌ಗೆ ಒಳಗಾಗುತ್ತಾರೆ.

ಕಂಠವನ್ನು ತಂಪಾಗಿರಿಸಲು ಸಲಹೆಗಳು

• ಸಿಪ್ ಬೈ ಸಿಪ್ ನೀರು: ದಿನವಿಡೀ ಒಮ್ಮೆಲೇ ಹೆಚ್ಚು ನೀರು ಕುಡಿಯುವ ಬದಲು, ಆಗಾಗ ಸ್ವಲ್ಪ ಸ್ವಲ್ಪವೇ ನೀರು ಕುಡಿಯುವುದರಿಂದ ಗಂಟಲು ಸದಾ ತೇವವಾಗಿರುತ್ತದೆ.

• ಉಗುರು ಬೆಚ್ಚಗಿನ ನೀರು: ಅತಿಯಾದ ಐಸ್ ನೀರು ಅಥವಾ ತಂಪು ಪಾನೀಯಗಳು ಗಂಟಲಿನ ಸ್ನಾಯುಗಳನ್ನು ಸಂಕುಚಿತಗೊಳಿಸಬಹುದು. ಆದ್ದರಿಂದ ಸಾಮಾನ್ಯ ತಾಪಮಾನದ ನೀರು ಅಥವಾ ಸಾಧಾರಣ ತಂಪು ನೀರು ಉತ್ತಮ.

• ನೈಸರ್ಗಿಕ ಪಾನೀಯಗಳು: ಎಳನೀರು, ಮಜ್ಜಿಗೆ ಮತ್ತು ತಾಜಾ ಹಣ್ಣಿನ ರಸಗಳು ದೇಹಕ್ಕೆ ಎಲೆಕ್ಟ್ರೋಲೈಟ್ಸ್‌ಗಳನ್ನು ಒದಗಿಸಿ ಹೈಡ್ರೇಷನ್ ಕಾಪಾಡುತ್ತವೆ.

ಹೆಚ್ಚಿನ ಸಮಯ AC ಕೊಠಡಿಯಲ್ಲಿ ಇರುವವರಲ್ಲಿ ಗಂಟಲು ಒಣಗುವ ಸಮಸ್ಯೆ ಹೆಚ್ಚಾಗುತ್ತದೆ. AC ತೇವಾಂಶವನ್ನು ಕಡಿಮೆ ಮಾಡುತ್ತಿದ್ದು, ಕಂಠವನ್ನು ಇನ್ನಷ್ಟು ಒಣಗಿಸುತ್ತದೆ.

ಈ ಸಮಸ್ಯೆಗಳನ್ನು ತಪ್ಪಿಸಲು ದಿನಕ್ಕೆ ಕನಿಷ್ಠ 2.5–3 ಲೀಟರ್ ನೀರು ಕುಡಿಯಬೇಕು. ಹೆಚ್ಚು ಬೆವರುತ್ತಿದ್ದರೆ ORS ಅಥವಾ ಎಲೆಕ್ಟ್ರೋಲೈಟ್ ಪಾನೀಯಗಳನ್ನು ಸೇವಿಸಬೇಕು. ಹೆಚ್ಚು ಕಾಫಿ, ಟೀ ಮತ್ತು ತಂಪು ಪಾನೀಯಗಳನ್ನು ಕಡಿಮೆ ಮಾಡಬೇಕು. AC ಕೊಠಡಿಯಲ್ಲಿ ತೇವಾಂಶ ಕಾಪಾಡಲು ನೀರಿನ ಪಾತ್ರೆ ಇಡುವುದು ಸಹಾಯಕ. ನೀರಿನಾಂಶ ಹೆಚ್ಚಿರುವ ಹಣ್ಣುಗಳನ್ನು ಸೇವಿಸುವುದು ಮತ್ತು ಧ್ವನಿಗೆ ವಿಶ್ರಾಂತಿ ನೀಡುವುದು ಮುಖ್ಯ.

ಏನು ಮಾಡಬಾರದು?

• ಕೆಫೀನ್ ಮತ್ತು ಆಲ್ಕೋಹಾಲ್: ಕಾಫಿ, ಟೀ ಮತ್ತು ಆಲ್ಕೋಹಾಲ್ ದೇಹವನ್ನು ಮತ್ತಷ್ಟು ನಿರ್ಜಲೀಕರಣಗೊಳಿಸುತ್ತವೆ. ಬಿಸಿಲಿನಲ್ಲಿ ಇವುಗಳ ಸೇವನೆ ಸೀಮಿತವಾಗಿರಲಿ.

• ಮಸಾಲೆಯುಕ್ತ ಆಹಾರ: ಅತಿಯಾದ ಖಾರ ಮತ್ತು ಎಣ್ಣೆಯುಕ್ತ ಆಹಾರವು ಎದೆಯುರಿ (Acid Reflux) ಉಂಟುಮಾಡಿ ಗಂಟಲಿಗೆ ಹಾನಿ ಮಾಡಬಹುದು.

ಬೆಂಗಳೂರಿನಲ್ಲಿ ಹೆಚ್ಚುತ್ತಿರುವ ಬೇಸಿಗೆ ಉಷ್ಣತೆ ನಡುವೆ ಡಿಹೈಡ್ರೇಷನ್ ಕಂಠ ಮತ್ತು ಧ್ವನಿಯ ಸಮಸ್ಯೆಗಳಿಗೆ ಪ್ರಮುಖ ಕಾರಣವಾಗುತ್ತಿದೆ. ಸರಿಯಾದ ಹೈಡ್ರೇಷನ್ ಕಾಪಾಡಿಕೊಂಡರೆ ಬೇಸಿಗೆಯಲ್ಲಿ ಕಂಠ ಮತ್ತು ಧ್ವನಿಯನ್ನು ಆರೋಗ್ಯಕರವಾಗಿ ಉಳಿಸಿಕೊಳ್ಳಬಹುದು.