ಕರೀನಾ ಕಪೂರ್, ಸೈಫ್ ಆಲಿಖಾನ್ ಸೇರಿ ಬಾಲಿವುಡ್ ನಟ-ನಟಿಯರ ಫೇವರಿಟ್ ಮುಂಬೈ ರೆಸ್ಟೋರೆಂಟ್‌ನಲ್ಲಿ ಕ್ರಿಮಿಕೀಟ, ಶೀಲಿಂಧ್ರ ಪತ್ತೆ: ರಾಯಲ್ ಚೀನಾ ಲೈಸೆನ್ಸ್ ರದ್ದು!

ಮುಂಬೈ: ದೇಶದ ಪ್ರಸಿದ್ಧ ಚಲನಚಿತ್ರ ತಾರೆಯರ ನೆಚ್ಚಿನ ತಾಣವಾಗಿರುವ ದಕ್ಷಿಣ ಮುಂಬೈನ ಐಷಾರಾಮಿ ಚೈನೀಸ್ ರೆಸ್ಟೋರೆಂಟ್ ‘ರಾಯಲ್ ಚೀನಾ’ ವಿರುದ್ಧ ಆಹಾರ ಸುರಕ್ಷತಾ ಅಧಿಕಾರಿಗಳು ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದಾರೆ.

ಹೋಟೆಲ್‌ನಲ್ಲಿ ತೀವ್ರ ಪ್ರಮಾಣದ ಅಶುಚಿತ್ವ, ಫಂಗಸ್ (ಶೀಲಿಂದ್ರ) ಬೆಳೆದಿರುವುದು ಹಾಗೂ ಕ್ರಿಮಿಕೀಟಗಳ ಉಪಟಳ ಪತ್ತೆಯಾದ ಹಿನ್ನೆಲೆಯಲ್ಲಿ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ ಮತ್ತು ಮಹಾರಾಷ್ಟ್ರ ಎಫ್‌ಡಿಎ ಈ ರೆಸ್ಟೋರೆಂಟ್‌ನ ಆಹಾರ ಪರವಾನಗಿಯನ್ನು ಅಮಾನತುಗೊಳಿಸಿದೆ.

ಸೆಲೆಬ್ರಿಟಿಗಳ ನೆಚ್ಚಿನ ತಾಣ: ದಕ್ಷಿಣ ಮುಂಬೈನಲ್ಲಿರುವ ‘ರಾಯಲ್ ಚೀನಾ’ ಕ್ಯಾಂಟೋನೀಸ್ ಆಹಾರ ಶೈಲಿಗೆ ಹೆಸರುವಾಸಿಯಾಗಿದೆ. ಬಾಲಿವುಡ್ ನಟಿ ಕರೀನಾ ಕಪೂರ್ ಖಾನ್, ಸೈಫ್ ಅಲಿ ಖಾನ್ ಹಾಗೂ ಅನನ್ಯ ಪಾಂಡೆ ಸೇರಿದಂತೆ ಅನೇಕ ಪ್ರಮುಖ ನಟ-ನಟಿಯರು ನಿಯಮಿತವಾಗಿ ಇಲ್ಲಿಂದ ಆಹಾರ ತರಿಸಿಕೊಳ್ಳುತ್ತಿದ್ದರು ಹಾಗೂ ಭೇಟಿ ನೀಡುತ್ತಿದ್ದರು.

ಫಂಗಸ್ ಮತ್ತು ಶೀಲಿಂದ್ರ: ಆಹಾರ ಪದಾರ್ಥಗಳನ್ನು ಸಂಗ್ರಹಿಸುವ ಸ್ಥಳಗಳಲ್ಲಿ ಹಾಗೂ ಅಡುಗೆಮನೆಯ ಮೇಲ್ಮೈಯಲ್ಲಿ ತೀವ್ರವಾಗಿ ಶೀಲಿಂದ್ರ (ಮೋಲ್ಡ್) ಬೆಳೆದಿರುವುದು ಕಂಡುಬಂದಿದೆ.

ಕ್ರಿಮಿ-ಕೀಟಗಳ ಕಾಟ: ಆಹಾರ ಪದಾರ್ಥಗಳ ಮೇಲೆ ಹಾಗೂ ಪಾತ್ರೆಗಳ ಮೇಲೆ ಕ್ರಿಮಿಕೀಟಗಳ ಓಡಾಟ ಪತ್ತೆಯಾಗಿದೆ.

ಅಸುರಕ್ಷಿತ ಸಂಗ್ರಹಣೆ: ಆಹಾರ ಧಾನ್ಯಗಳು ಹಾಗೂ ತಯಾರಿಸಿದ ಅಡುಗೆಯನ್ನು ಅತ್ಯಂತ ಅಸುರಕ್ಷಿತ ಹಾಗೂ ಅಶುಚಿಯಾದ ವಾತಾವರಣದಲ್ಲಿ ಇಡಲಾಗಿತ್ತು.

ತಕ್ಷಣದಿಂದಲೇ ವ್ಯಾಪಾರ ಬಂದ್: ಅಧಿಕಾರಿಗಳು ಈ ಅಶುಚಿತ್ವದ ವಿಡಿಯೋವನ್ನು ಎಕ್ಸ್ (ಟ್ವಿಟರ್) ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಸಾರ್ವಜನಿಕ ಆರೋಗ್ಯದ ಹಿತದೃಷ್ಟಿಯಿಂದ ರೆಸ್ಟೋರೆಂಟ್‌ನ ಆಹಾರ ಪರವಾನಗಿಯನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಅಮಾನತುಗೊಳಿಸಲಾಗಿದೆ. ಅಲ್ಲದೆ, ಯಾವುದೇ ರೀತಿಯ ಆಹಾರ ಖರೀದಿ, ಮಾರಾಟ ಹಾಗೂ ವಿತರಣೆಯನ್ನು ತಕ್ಷಣವೇ ಸ್ಥಗಿತಗೊಳಿಸುವಂತೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ.