ಈಗ್ಲೂ ನಮ್ಮದೇ ಅಧಿಕಾರ, 2028ಕ್ಕೂ ನಾವೇ ಮತ್ತೆ ನಾವೇ ಅಧಿಕಾರಕ್ಕೆ: ಶಿವಗಂಗಾ ಬಸವರಾಜ್ ವಿಶ್ವಾಸ

ದಾವಣಗೆರೆ: ಸಿಎಂ ಸಿದ್ದರಾಮಯ್ಯರ ಪರ, ಡಿ. ಕೆ. ಶಿವಕುಮಾರ್ ಪರ ಎಂದೇನೂ ಇಲ್ಲ. ನಾವೆಲ್ಲ ಕಾಂಗ್ರೆಸ್, ಹೈಕಮಾಂಡ್ ಪರ ಎಂದ ಅವರು, ಜನವರಿ ತಿಂಗಳು ಬರಲು ಇನ್ನೂ ಒಂದು ತಿಂಗಳು ಇದೆ. ಈಗ ಏನು ಮಾತನಾಡಲ್ಲ. ಜನವರಿ ಬರಲಿ ಆಗ ಮಾತನಾಡೋಣ ಎಂದು ಚನ್ನಗಿರಿ ಕಾಂಗ್ರೆಸ್ ಶಾಸಕ ಶಿವಗಂಗಾ ಬಸವರಾಜ್ ಹೇಳಿದ್ದಾರೆ.

ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ರಾಜಕೀಯದಲ್ಲಿ ಯಾವುದೇ ಬ್ರೇಕ್ ಇಲ್ಲ. ಆಗಾಗ್ಗೆ ಚರ್ಚೆಗಳಾಗುತ್ತಿರುತ್ತವೆ. ಸಂದರ್ಭಕ್ಕೆ ಸರಿಯಾಗಿ ಮಾತುಕತೆ ನಡೆಯುತ್ತಿರುತ್ತದೆ. ಈಗ ಕಾಂಗ್ರೆಸ್ ಸರ್ಕಾರ ಬಂದು ಎರಡೂವರೆ ವರ್ಷ
ಆಗಿದೆ. ಇನ್ನೂ ಎರಡೂವರೆ ವರ್ಷ ಕಾಂಗ್ರೆಸ್ ಅಧಿಕಾರದಲ್ಲಿರುತ್ತದೆ. 2028ರ ವಿಧಾನಸಭೆ ಚುನಾವಣೆಯಲ್ಲಿ ಗೆದ್ದು ನಾವೇ ಮತ್ತೆ ಅಧಿಕಾರಕ್ಕೆ ಬರುತ್ತೇವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಮುಖ್ಯಮಂತ್ರಿ ಕುರ್ಚಿ ಖಾಲಿ ಇಲ್ಲ. ಖಾಲಿಯಿದ್ದರೆ ಮಾತನಾಡಬಹುದಿತ್ತು. ಅಧಿಕಾರ ಹಂಚಿಕೆ ಕುರಿತಂತೆ ಈಗ ಮಾತನಾಡುವುದು ಅನಾವಶ್ಯಕ. ಸಂದರ್ಭ ಬಂದಾಗ ಮಾತನಾಡುತ್ತೇನೆ ಎಂದ ಅವರು, ನಾನು ಡಿಸೆಂಬರ್ 2 ಮತ್ತು 3ರಂದು ದೆಹಲಿಯಲ್ಲಿರುತ್ತೇನೆ. ಮಕ್ಕಳು ಅಲ್ಲಿ ಓದುತ್ತಿರುವುದರಿಂದ ಹೋಗುತ್ತಿದ್ದು, ರಾಜಕೀಯ ಉದ್ದೇಶದಿಂದಲ್ಲ. ನಾನು ಹೋಗುತ್ತಿರುವುದಕ್ಕೆ ದಾಖಲೆ ಬೇಕಾದರೆ ನೀಡುತ್ತೇನೆ. ಬೇರೆಯವರು ಯಾವ ಕಾರಣಕ್ಕೆ ದೆಹಲಿಗೆ ಹೋಗುತ್ತಾರೆ ಎಂಬುದು ನನಗೆ ಗೊತ್ತಿಲ್ಲ. ಅವರನ್ನೇ ಕೇಳಬೇಕು. ನಾನು ಒಂದು ಗಂಟೆ ಕೇಳಿದರೂ ನನ್ನ ಬಾಯಿಯಿಂದ ನಿಮಗೆ ಬೇಕಾದದ್ದನ್ನು ಬಿಡಿಸಲು ಆಗದು. ಎಷ್ಟು ಸಾರಿ ಬೇಕಾದರೂ ಬನ್ನಿ, ಮಾತನಾಡುತ್ತೇನೆ ಎಂದು ಶಿವಗಂಗಾ ಬಸವರಾಜ್ ಹೇಳಿದರು.

ಡಿ. ಕೆ. ಶಿವಕುಮಾರ್ ಅವರು ಒಂದು ಪದಕ್ಕೆ ವಿಶ್ವ ಶಕ್ತಿ ಎಂಬ ಪೋಸ್ಟ್ ಕುರಿತಂತೆ ಪ್ರತಿಕ್ರಿಯಿಸಿದ ಅವರು, ನನಗೆ ಇಂಗ್ಲೀಷ್ ಬರಲ್ಲ. ಅದೇನೂ ಹಾಕಿದ್ದಾರೆ ಎಂದು ಹೇಳಿದರು. ನನಗೆ ಓದಲು ಬರಲು ಕಾರಣದ ತಿಳಿದುಕೊಳ್ಳುವ ಗೋಜಿಗೆ ಹೋಗಿಲ್ಲ ಎಂದ ಅವರು, ಕಾಂಗ್ರೆಸ್ ನಲ್ಲಿ ಯಾರೂ ಮಾತು ತಪ್ಪಿಲ್ಲ. ಐದು ಗ್ಯಾರಂಟಿ ಘೋಷಿಸಿದಂತೆ ಜನರಿಗೆ ತಲುಪಿಸುತ್ತಿದ್ದೇವೆ. ಮುಂದಿನ ಎರಡೂವರೆ ವರ್ಷವೂ ಕಾಂಗ್ರೆಸ್ ಮುಖ್ಯಮಂತ್ರಿಯೇ ಇದ್ದರೆ ಆಯಿತು ಎಂದರು.