ರಾತ್ರಿ ವೇಳೆ ಪ್ರೇಯಸಿಯನ್ನ ಕರೆದೊಯ್ದ ಪ್ರೇಮಿ.. ಬೆಳಗಾಗುವಷ್ಟರಲ್ಲಿ ಅಸಲಿ ಮುಖ ನೋಡಿ ಶಾಕ್ ಆದ ಯುವಕ!

ಲಕ್ನೋ: ಸಾಮಾಜಿಕ ಜಾಲತಾಣಗಳ (Social Media) ಕಾಲದಲ್ಲಿ ಪ್ರೀತಿ, ಪ್ರೇಮ ಎಂಬುದು ತುಂಬಾ ಸುಲಭವಾಗಿಬಿಟ್ಟಿದೆ. ಆದರೆ ಇಲ್ಲೊಬ್ಬ ಯುವಕನಿಗೆ ಸೋಶಿಯಲ್ ಮೀಡಿಯಾ ಪ್ರೀತಿ ಎಂದಿಗೂ ಮರೆಯಲಾಗದ ಶಾಕ್ ನೀಡಿದೆ.

ಇನ್‌ಸ್ಟಾಗ್ರಾಮ್, ಫೇಸ್‌ಬುಕ್ ಫಿಲ್ಟರ್‌ಗಳ ನಕಲಿ ಮುಖ ನೋಡಿ ನಂಬಿದ ಯುವಕ, ರಾತ್ರೋರಾತ್ರಿ ಪ್ರೇಯಸಿಯನ್ನ ಕರೆದುಕೊಂಡು ಓಡಿಹೋಗಿದ್ದಾನೆ. ಆದರೆ, ಬೆಳಗಿನ ಬೆಳಕಿನಲ್ಲಿ ಆಕೆಯ ಅಸಲಿ ಮುಖ ನೋಡಿ ಪ್ರೇಮಿಯ ಕಾಲ ಕೆಳಗಿನ ಭೂಮಿ ಕುಸಿದಂತಾಗಿದೆ! ತಕ್ಷಣವೇ ಆಕೆಯನ್ನು ಪೊಲೀಸರಿಗೆ ಒಪ್ಪಿಸಿದ ವಿಚಿತ್ರ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಅಸಲಿಗೆ ನಡೆದಿದ್ದೇನು?

ಉತ್ತರ ಪ್ರದೇಶದ ಹಾಥರಸ್ ಜಿಲ್ಲೆಯ ಸಾದಾಬಾದ್ ಮೂಲದ ಯುವತಿಯೊಬ್ಬಳು ಸೋಶಿಯಲ್ ಮೀಡಿಯಾದಲ್ಲಿ ಸುಂದರವಾದ ಫಿಲ್ಟರ್‌ಗಳು ಹಾಗೂ ಬೇರೆಯವರ ಫೋಟೋಗಳನ್ನು ಬಳಸಿ ನಕಲಿ ಖಾತೆಯನ್ನು (Fake Account) ಸೃಷ್ಟಿಸಿದ್ದಳು. ಈ ಖಾತೆಯ ಮೂಲಕ ದೆಹಲಿಯ ಪಟೇಲ್ ನಗರದ ಯುವಕನೊಬ್ಬನ ಪರಿಚಯವಾಗಿದೆ. ದಿನಕಳೆದಂತೆ ಈ ಪರಿಚಯ ಗಾಢವಾದ ಪ್ರೇಮವಾಗಿ ಬದಲಾಗಿದೆ. ಇಬ್ಬರೂ ಜೊತೆಯಾಗಿ ಬದುಕುವ, ಜೊತೆಯಾಗಿ ಸಾಯುವ ಶಪಥಗಳನ್ನೂ ಮಾಡಿಕೊಂಡಿದ್ದರು.

ರಾತ್ರಿ ವೇಳೆ ಎಸ್ಕೇಪ್.. ದಾರಿ ತಪ್ಪಿದ ಜೋಡಿ!

ಪ್ರೇಮದ ಅಮಲಿನಲ್ಲಿದ್ದ ಯುವತಿ, ಯುವಕನೊಂದಿಗೆ ಮನೆ ಬಿಟ್ಟು ಓಡಿಹೋಗಲು ನಿರ್ಧರಿಸಿದ್ದಾಳೆ. ಅದರಂತೆ ಶನಿವಾರ ಯುವಕ ದೆಹಲಿಯಿಂದ ಸಾದಾಬಾದ್‌ಗೆ ಬಂದಿದ್ದಾನೆ. ಸಮಯ ಸಾಧಿಸಿ ಯುವತಿಯೂ ಮನೆ ಬಿಟ್ಟು ಪ್ರೇಮಿಯ ಕೈ ಹಿಡಿದು ಹೊರಟಿದ್ದಾಳೆ. ರಾತ್ರಿಯಿಡೀ ಪ್ರಯಾಣ ಬೆಳೆಸಿದ ಈ ಜೋಡಿ, ದಾರಿ ತಪ್ಪಿ ‘ಮಾಂಟ್’ ಎಂಬ ಪ್ರದೇಶಕ್ಕೆ ತಲುಪಿದೆ. ಅಷ್ಟರಲ್ಲಿ ಜಗತ್ತು ಬೆಳಗಾಗಿದೆ.

ಬೆಳಗಿನ ಬೆಳಕಿನಲ್ಲಿ ಬಯಲಾಯ್ತು ಅಸಲಿಯತ್ತು!

ಬೆಳಗಿನ ಸೂರ್ಯನ ಬೆಳಕಿನಲ್ಲಿ ಯುವಕ ತನ್ನ ಪ್ರೇಯಸಿಯ ಮುಖವನ್ನು ನೇರವಾಗಿ ನೋಡಿದ್ದಾನೆ. ಅಷ್ಟೇ, ಆತನ ಪ್ರೇಮದ ಅಮಲು ಒಂದೇ ಸೆಕೆಂಡಿನಲ್ಲಿ ಇಳಿದುಹೋಗಿದೆ! ಸೋಶಿಯಲ್ ಮೀಡಿಯಾ ಪ್ರೊಫೈಲ್‌ನಲ್ಲಿ ನೋಡಿದ ಮುಖಕ್ಕೂ, ಎದುರಿಗಿರುವ ಯುವತಿಯ ಮುಖಕ್ಕೂ ಯಾವುದೇ ಸಾಮ್ಯತೆಯೇ ಇರಲಿಲ್ಲ. ಇಬ್ಬರೂ ಸಂಪೂರ್ಣ ಭಿನ್ನವಾಗಿದ್ದರು. ಫಿಲ್ಟರ್‌ಗಳ ಹಿಂದೆ ಅಡಗಿದ್ದ ಅಸಲಿ ಮುಖ ನೋಡಿ ಯುವಕನಿಗೆ ತಲೆ ತಿರುಗಿದಂತಾಗಿದೆ.

ನೇರವಾಗಿ ಪೊಲೀಸ್ ಸ್ಟೇಷನ್ ಮೆಟ್ಟಿಲೇರಿದ ಪ್ರೇಮಿ:

ಮೋಸ ಹೋಗಿರುವುದನ್ನು ಅರಿತ ಯುವಕ, ಭಾನುವಾರ ಮಧ್ಯಾಹ್ನ ಯುವತಿಯನ್ನು ಕರೆದುಕೊಂಡು ನೇರವಾಗಿ ‘ಸುರೀರ್ ಕೊತ್ವಾಲಿ’ ಪೊಲೀಸ್ ಸ್ಟೇಷನ್‌ಗೆ ತಲುಪಿದ್ದಾನೆ. ನಡೆದ ವಿಷಯವನ್ನೆಲ್ಲಾ ಪೊಲೀಸರಿಗೆ ವಿವರಿಸಿ, ಈಕೆಯನ್ನು ಸುರಕ್ಷಿತವಾಗಿ ಆಕೆಯ ಮನೆಗೆ ತಲುಪಿಸುವಂತೆ ಕೋರಿದ್ದಾನೆ.ಪೊಲೀಸರ ನಡೆ: ಪೊಲೀಸರ ವಿಚಾರಣೆ ವೇಳೆ, ಯುವಕ ತನ್ನೊಂದಿಗೆ ಯಾವುದೇ ತಪ್ಪಾದ ನಡವಳಿಕೆ ತೋರಿಲ್ಲ ಅಥವಾ ಬಲವಂತ ಮಾಡಿಲ್ಲ ಎಂದು ಯುವತಿ ಒಪ್ಪಿಕೊಂಡಿದ್ದಾಳೆ. ಸದ್ಯ ಸುರೀರ್ ಪೊಲೀಸರು ನೀಡಿದ ಮಾಹಿತಿ ಮೇರೆಗೆ ಸಾದಾಬಾದ್ ಸಬ್ ಇನ್ಸ್‌ಪೆಕ್ಟರ್ ಮಹೇಶ್ ಕುಮಾರ್ ಸ್ಥಳಕ್ಕೆ ಆಗಮಿಸಿ, ಇಬ್ಬರನ್ನೂ ತಮ್ಮ ವಶಕ್ಕೆ ಪಡೆದು ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಗಮನಿಸಿ: ಸೋಶಿಯಲ್ ಮೀಡಿಯಾದಲ್ಲಿ ಕಾಣುವ ಫಿಲ್ಟರ್ ಮುಖಗಳನ್ನು ನೋಡಿ ಕುರುಡು ಪ್ರೀತಿಯಲ್ಲಿ ಬೀಳುವ ಮುನ್ನ ಯೋಚಿಸಿ, ಇಲ್ಲದಿದ್ದರೆ ಈ ಯುವಕನಿಗಾದ ಗತಿಯೇ ನಿಮಗೂ ಆಗಬಹುದು!