‘ಜನರು ಬರ್ತಾರೆ, ಹೋಗ್ತಾರೆ…’: ಡೊನಾಲ್ಡ್ ಟ್ರಂಪ್ ಕಾಲೆಳೆದ ಜಾರ್ಜಿಯಾ ಮೆಲೋನಿ, ಇಟಲಿಸಚಿವರು!

ಟರ್ಕಿ (ಅಂಕಾರಾ): ಟರ್ಕಿಯಲ್ಲಿ ನಡೆಯಲಿರುವ ಪ್ರತಿಷ್ಠಿತ ನ್ಯಾಟೋ (NATO) ಶೃಂಗಸಭೆಗೆ ಕೆಲವೇ ದಿನಗಳು ಬಾಕಿ ಇರುವಾಗ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ನಡುವಿನ ಸಾಮಾಜಿಕ ಜಾಲತಾಣದ ಜಟಾಪಟಿ ಮತ್ತೆ ಮುನ್ನೆಲೆಗೆ ಬಂದಿದೆ. ಆದರೆ, ಟ್ರಂಪ್ ಅವರ ಈ ಇತ್ತೀಚಿನ ಲೇವಡಿಯನ್ನು ಇಟಲಿ ಸಚಿವರು ರಾಜತಾಂತ್ರಿಕವಾಗಿ ತಳ್ಳಿಹಾಕಿದ್ದಾರೆ.

ಟ್ರೂತ್ ಸೋಷಿಯಲ್‌ನಲ್ಲಿ ಟ್ರಂಪ್ ಪೋಸ್ಟ್:

ಡೊನಾಲ್ಡ್ ಟ್ರಂಪ್ ತಮ್ಮ ‘ಟ್ರೂತ್ ಸೋಷಿಯಲ್’ ಖಾತೆಯಲ್ಲಿ ಜಾರ್ಜಿಯಾ ಮೆಲೋನಿ ಅವರು ತಮ್ಮನ್ನು ನೋಡುತ್ತಿರುವಂತೆ ಇರುವ ಎಡಿಟ್ ಮಾಡಿದ (Doctored) ಫೋಟೋವೊಂದನ್ನು ಹಂಚಿಕೊಂಡಿದ್ದಾರೆ. ಅದಕ್ಕೆ “ರೆಸ್ಟ್ರೇನಿಂಗ್ ಆರ್ಡರ್ ಅಗತ್ಯವಿದೆ” (Restraining Order Needed) ಎಂಬ ಅಡಿಬರಹ ನೀಡಿ ವ್ಯಂಗ್ಯವಾಡಿದ್ದಾರೆ. ಕಳೆದ ತಿಂಗಳು ಜಿ7 ಶೃಂಗಸಭೆಯಲ್ಲೂ ಮೆಲೋನಿ ಅವರು ತಮ್ಮೊಂದಿಗೆ ಫೋಟೋ ತೆಗೆಸಿಕೊಳ್ಳಲು ಗೋಗರೆದಿದ್ದರು ಎಂದು ಟ್ರಂಪ್ ಹೇಳಿಕೊಂಡಿದ್ದರು.

ಇಟಲಿ ಸಚಿವರ ತಿರುಗೇಟು:

ಟ್ರಂಪ್ ಅವರ ಈ ಪೋಸ್ಟ್‌ಗೆ ಖುದ್ದಾಗಿ ಮೆಲೋನಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಆದರೆ ಇಟಲಿಯ ರಕ್ಷಣಾ ಸಚಿವ ಗೈಡೋ ಕ್ರೊಸೆಟ್ಟೊ ಪ್ರತಿಕ್ರಿಯಿಸಿ, “ರಾಜಕಾರಣದಲ್ಲಿ ಜನರು ಬರುತ್ತಾರೆ, ಹೋಗುತ್ತಾರೆ. ಆದರೆ ದೇಶಗಳ ನಡುವಿನ ಸಂಬಂಧಗಳು ಶಾಶ್ವತವಾಗಿ ಉಳಿಯಬೇಕು” ಎಂದು ತಿರುಗೇಟು ನೀಡಿದ್ದಾರೆ. ಇಟಲಿ ವಿದೇಶಾಂಗ ಸಚಿವ ಆಂಟೋನಿಯೊ ತಾಜಾನಿ ಮಾತನಾಡಿ, ಇಟಲಿ ಮತ್ತು ಅಮೆರಿಕ ನಡುವಿನ ದ್ವಿಪಕ್ಷೀಯ ಸಂಬಂಧ ಕೇವಲ ವೈಯಕ್ತಿಕ ಹೇಳಿಕೆಗಳನ್ನು ಮೀರಿ ಬೆಳೆದಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಬದಲಾಗುತ್ತಿರುವ ರಾಜತಾಂತ್ರಿಕತೆ:

ಒಂದೊಮ್ಮೆ ಡೊನಾಲ್ಡ್ ಟ್ರಂಪ್ ಅವರ ತೀವ್ರ ಬೆಂಬಲಿಗರಾಗಿದ್ದ ಜಾರ್ಜಿಯಾ ಮೆಲೋನಿ, 2025 ರ ಟ್ರಂಪ್ ಪದಗ್ರಹಣ ಸಮಾರಂಭದಲ್ಲಿ ಭಾಗವಹಿಸಿದ ಏಕೈಕ ಪ್ರಮುಖ ಯುರೋಪಿಯನ್ ನಾಯಕಿಯಾಗಿದ್ದರು. ಆದರೆ ಇತ್ತೀಚಿನ ತಿಂಗಳುಗಳಲ್ಲಿ ಅಮೆರಿಕದ ಕೆಲವು ನಿರ್ಧಾರಗಳನ್ನು ಮೆಲೋನಿ ಬಹಿರಂಗವಾಗಿ ಟೀಕಿಸುತ್ತಿರುವುದು ಇಬ್ಬರ ನಡುವಿನ ಅಂತರಕ್ಕೆ ಕಾರಣ ಎನ್ನಲಾಗಿದೆ.

ಪ್ರಸ್ತುತ ಅಂಕಾರಾದಲ್ಲಿ ನ್ಯಾಟೋ ನಾಯಕರು ರಕ್ಷಣಾ ವೆಚ್ಚವನ್ನು ಶೇಕಡಾ 5 ಕ್ಕೆ ಹೆಚ್ಚಿಸುವ ಹಾಗೂ ಇರಾನ್ ಪರಿಸ್ಥಿತಿಯ ಕುರಿತು ಚರ್ಚಿಸಲು ಸಜ್ಜಾಗುತ್ತಿದ್ದು, ಈ ನಡುವೆ ಟ್ರಂಪ್ ಅವರ ಈ ಪೋಸ್ಟ್ ಜಾಗತಿಕ ರಾಜಕಾರಣದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.