ಗುಂಪುಗಾರಿಕೆಯೂ ಇಲ್ಲ, ಬಣವೂ ಇಲ್ಲ: ಮಾತಿನ ವರಸೆ ಬದಲಿಸಿದ ಚನ್ನಗಿರಿ ಕಾಂಗ್ರೆಸ್ ಶಾಸಕ!

SUDDIKSHANA KANNADA NEWS/DAVANAGERE/DATE:28_11_2025

ದಾವಣಗೆರೆ: ನಮ್ಮಲ್ಲಿ ಯಾವುದೇ ಗುಂಪುಗಾರಿಕೆಯಾಗಲೀ, ಬಣವಾಗಲೀ ಇಲ್ಲ. ನಮ್ಮದೇನಿದ್ದರೂ ಕಾಂಗ್ರೆಸ್ ಪಕ್ಷ ಮತ್ತು ಹೈಕಮಾಂಡ್ ಬಣ ಮಾತ್ರ ಇರುವುದು. ನಾವೆಲ್ಲರೂ ಒಗ್ಗಟ್ಟಾಗಿದ್ದೇವೆ ಎಂದು ಡಿಸಿಎಂ ಡಿ. ಕೆ. ಶಿವಕುಮಾರ್ ಆಪ್ತ ಮತ್ತು ಚನ್ನಗಿರಿ ಕಾಂಗ್ರೆಸ್ ಶಾಸಕ ಶಿವಗಂಗಾ ಬಸವರಾಜ್ ವರಸೆ ಬದಲಿಸಿದ್ದಾರೆ.

ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ನಮ್ಮದೇನಿದ್ದರೂ ಕಾಂಗ್ರೆಸ್ ಮತ್ತು ಹೈಕಮಾಂಡ್ ಬಣ ಮಾತ್ರ. ನನ್ನ ಮಕ್ಕಳು ದೆಹಲಿಯಲ್ಲಿ ಓದುತ್ತಿದ್ದಾರೆ. ಹಾಗಾಗಿ ಅಲ್ಲಿಗೆ ಹೋಗಿದ್ದೆ. ಆಕಸ್ಮಿಕವಾಗಿ ಶಾಸಕರು ಹೊಟೇಲ್ ನಲ್ಲಿ ಸಿಕ್ಕ ಕಾರಣ ಒಟ್ಟಿಗೆ ಊಟ ಮಾಡಿದೆವು. ನಾವು ಜೊತೆಗೆ ಕುಳಿತು ಊಟ ಮಾಡಬಾರದಾ ಎಂದು ಮಾಧ್ಯಮದವರನ್ನೇ ಪ್ರಶ್ನಿಸಿದರು.

ಕಾಂಗ್ರೆಸ್ ಶಿಸ್ತಿನ ಪಕ್ಷ. ನಮ್ಮಲ್ಲಿ ಗುಂಪುಗಾರಿಕೆ ಇಲ್ಲವೇ ಇಲ್ಲ. ಬಿಜೆಪಿಯಲ್ಲಿ ಗುಂಪುಗಾರಿಕೆ ಇದೆ. ಬಸನಗೌಡ ಪಾಟೀಲ್, ರಮೇಶ್ ಜಾರಕಿಹೊಳಿ ಸೇರಿದಂತೆ ಒಬ್ಬೊಬ್ಬ ನಾಯಕರು ಒಂದೊಂದು ಹೇಳಿಕೆ ನೀಡುತ್ತಾರೆ. ದಾವಣಗೆರೆಯಲ್ಲಿಯೇ ಎರಡರಿಂದ ಮೂರು ಟೀಂಗಳಿವೆ. ಸಣ್ಣಪುಟ್ಟ ತಪ್ಪುಗಳಿಗೆ ನೊಟೀಸ್ ಕೊಡುತ್ತಾರೆ. ಅದು ನಮ್ಮಲ್ಲಿ ಅಷ್ಟೇ. ಬಿಜೆಪಿಯಲ್ಲಿ ಹೇಳಲಾಗದಷ್ಟು ಗುಂಪುಗಾರಿಕೆ ಆಗುತ್ತಿದೆ. ನಿತ್ಯವೂ ಮಾಧ್ಯಮದಲ್ಲಿ
ಬರುತ್ತಿದೆ ಎಂದು ಹೇಳಿದರು.

ಕೆಲವರು ವೈಯಕ್ತಿಕ ಕೆಲಸದ ಮೇಲೆ ದೆಹಲಿಗೆ ಹೋಗುತ್ತಾರೆ, ಕೆಲವರು ಸಿಎಂ, ಡಿಸಿಎಂ, ಸಚಿವರ ಮನೆಗೆ ಹೋಗುತ್ತಾರೆ. ಅದರಲ್ಲೇನೂ ವಿಶೇಷತೆ ಇಲ್ಲ. ತಿಂಡಿಗೆ ಸಿಎಂ ಸಿದ್ದರಾಮಯ್ಯ ಅವರು ಡಿ. ಕೆ. ಶಿವಕುಮಾರ್ ಅವರನ್ನು ಕರೆದಿದ್ದಾರೆ. ಹಾಗಾಗಿ,ಹೋಗಿದ್ದಾರೆ. ಒಳ್ಳೆಯ ಬೆಳವಣಿಗೆ. ನವೆಂಬರ್ ಮುಗಿದೇ ಹೋಯಿತು. ಪವರ್ ಶೇರಿಂಗ್ ಇಲ್ಲ, ಯಾವುದೂ ಇಲ್ಲ. ಮುಖ್ಯಮಂತ್ರಿ ಮತ್ತು ಉಪಮುಖ್ಯಮಂತ್ರಿ ನಡುವೆ ಗೊಂದಲ ಇದೆ ಎನ್ನುತ್ತಾರೆ. ಹಾಗಾದ್ರೆ ಜೊತೆಗೆ ಟಿಫನ್ ಮಾಡುತ್ತಾರಾ? ಗೊಂದಲದ ಬಗ್ಗೆ ದಾಖಲೆಗಳಿದ್ದರೆ ನೀವೇ ನೀಡಿ ಎಂದು ಹೇಳಿದರು.