ದಾವಣಗೆರೆ 24*7 ನೀರು ಪೂರೈಕೆಯಲ್ಲಿ ರಾಜ್ಯಕ್ಕೆ ಮೊದಲು, ದೇಶಕ್ಕೆ ಮಾದರಿ: ಸಿಇಓ ಗಿತ್ತೆ ಮಾಧವ ವಿಠ್ಠಲರಾವ್

ದಾವಣಗೆರೆ: ನವದೆಹಲಿಯ ಭಾರತ ಮಂದಿರದಲ್ಲಿ ಕೇಂದ್ರ ಜಲಶಕ್ತಿ ಸಚಿವರ ಅಧ್ಯಕ್ಷತೆಯಲ್ಲಿ ನಡೆದ ಸುಜಲಾಂ ಸಮ್ಮಿತ್ ನಲ್ಲಿ ದಾವಣಗೆರೆ ಜಿಲ್ಲೆಯ ಹಿರೇಮಳಲಿ ಗ್ರಾಮ ಪಂಚಾಯಿತಿಯ ಪಿಡಿಓ ರಶ್ಮಿ ಎನ್. ಹಾಗೂ ವಿಡಬ್ಲ್ಯೂಎಸ್‍ಸಿ ಅಧ್ಯಕ್ಷ ವಿಜಯನಾಯಕ್ ಭಾಗವಹಿಸಿ ಯಶಸ್ವಿ ಅನುಷ್ಠಾನದ ಕುರಿತು ಪ್ರಸ್ತುತಪಡಿಸಿದರು.

ದಾವಣಗೆರೆ ಜಿಲ್ಲೆಯಲ್ಲಿ 45 ಕಂದಾಯ ಗ್ರಾಮ, 12 ಜನ ವಸತಿ ಕೇಂದ್ರ ಒಟ್ಟು 57 ಗ್ರಾಮಗಳಲ್ಲಿ 24*7 ನೀರು ಸರಬರಾಜು ಮಾದರಿಯನ್ನು ರಾಷ್ಟ್ರೀಯ ವೇದಿಕೆಯಲ್ಲಿ ಯಶಸ್ವಿಯಾಗಿ ಪ್ರಸ್ತುತಪಡಿಸಿದ್ದಾರೆ. ರಾಜ್ಯದಲ್ಲಿ ಮೊದಲ ಜಿಲ್ಲೆ ದಾವಣಗೆರೆ ಮಾತ್ರ ಈ ಗೌರವಕ್ಕೆ ಆಯ್ಕೆಯಾಗಿದೆ.

ತಂಡದ ಶ್ರಮ ಮತ್ತು ನವೀನತೆಗೆ ದೊರೆತ ಸನ್ಮಾನ. ಮುಂದಿನ ಕೆಲವೇ ತಿಂಗಳಲ್ಲಿ ನೂರು ಗ್ರಾಮಗಳಲ್ಲಿ ಸುಸ್ಥಿರ ಕುಡಿಯುವ ನೀರು ಪೂರೈಕೆ ಮಾಡುವ ಮೂಲಕ ಯಶಸ್ವಿ ಅನುಷ್ಠಾನ ಜಿಲ್ಲೆ ಎಂದು ದೇಶದಲ್ಲಿ ಗುರುತಿಸುವ ಕಾರ್ಯದ ಗುರಿ ಹೊಂದಲಾಗಿದೆ ಎಂದು ಜಿಲ್ಲಾ ಪಂಚಾಯತ್, ಮುಖ್ಯಕಾರ್ಯನಿರ್ವಾಹಕ ಅಧಿಕಾರಿ ಗಿತ್ತೆ ಮಾಧವ ವಿಠ್ಠಲರಾವ್ ಸಂತಸ ವ್ಯಕ್ತಪಡಿಸಿದ್ದಾರೆ.