SUDDIKSHANA KANNADA NEWS/ DAVANAGERE/ DATE:22-07-2024
ದಾವಣಗೆರೆ: ಜೋಳಕ್ಕೆ ಇಡುವ ವಿಷದ ಗುಳಿಗೆ ನಂಬಿ ದಂಪತಿ ಆತ್ಮಹತ್ಯೆಗೆ ಶರಣಾದ ಘಟನೆ ದಾವಣಗೆರೆ ಜಿಲ್ಲೆಯ ಹೊನ್ನಾಳಿ – ನ್ಯಾಮತಿ ತಾಲೂಕಿನ ಮಲ್ಲಿಗೇನಹಳ್ಳಿಯಲ್ಲಿ ನಡೆದಿದೆ.
ಮಲ್ಲಿಗೇನಹಳ್ಳಿ ಗ್ರಾಮದ ಕೂಲಿಕಾರ್ಮಿಕರಾಗಿದ್ದ ಭಟ್ಟೋಳ್ ಷಣ್ಮುಖಪ್ಪ (62) ಹಾಗೂ ಪತ್ನಿ ಇಂದ್ರಮ್ಮ ಷಣ್ಮುಖಪ್ಪ (50) ಸಾವಿಗೆ ಶರಣಾದ ದಂಪತಿ. ಮಕ್ಕಳಾಗಲಿಲ್ಲ ಎಂಬ ಕೊರಗು ದಂಪತಿ ಕಾಡುತಿತ್ತು. ಇದರಿಂದ ತೀವ್ರ ಮನನೊಂದಿದ್ದರು. ಇಬ್ಬರು ಭಾನುವಾರ ರಾತ್ರಿ ಜೋಳಕ್ಕೆ ಇಡುವ ವಿಷದ ಗುಳಿಗೆ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಭಟ್ಟೋಳ್ ಷಣ್ಮುಖಪ್ಪ (62) ಹಾಗೂ ಪತ್ನಿ ಇಂದ್ರಮ್ಮ ಷಣ್ಮುಖಪ್ಪ (50) ಮದುವೆಯಾಗಿ 30 ವರ್ಷ ಕಳೆದಿತ್ತು. ಮಕ್ಕಳಾಗಿಲ್ಲವೆಂದು ಮಾನಸಿಕವಾಗಿ ನೊಂದಿದ್ದರು. ಅಲ್ಲದೆ ಭಟ್ಟೋಳ್ ಷಣ್ಮುಖಪ್ಪನವರಿಗೆ ಇತ್ತೀಚಿಗೆ ಪಾರ್ಶ್ವವಾಯು ಹೊಡೆದು ನಿತ್ರಾಣರಾಗಿದ್ದರು. ಮಾತ್ರವಲ್ಲ, ಪತ್ನಿ ಇಂದ್ರಮ್ಮ ಷಣ್ಮುಖಪ್ಪ ಅವರು ಅತಿಯಾದ ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿದ್ದರು. ಇಬ್ಬರು ಅನಾರೋಗ್ಯದಿಂದ ಬೇಸರಗೊಂಡಿದ್ದು ಮಕ್ಕಳಿಲ್ಲದೆ ಇರುವುದರಿಂದ ಇನ್ನು ಮುಂದೆ ನಮ್ಮನ್ನು ನೋಡಿಕೊಳ್ಳಲು ಯಾರೂ ಇಲ್ಲವೆಂದು ಚಿಂತೆ ಮಾಡುತ್ತಿದ್ದರು.
ಇದರಿಂದ ಮಾನಸಿಕವಾಗಿ ನೊಂದಿದ್ದ ಕುಟುಂಬವೂ ಭಾನುವಾರ ರಾತ್ರಿ ತಮ್ಮ ಮನೆಯಲ್ಲಿ ಜೋಳಕ್ಕೆ ಇಡುವ ವಿಷದ ಗುಳಿಗೆಯನ್ನು ಸೇವಿಸಿದ್ದು, ನೋವು ತಡೆಯಲಾರದೇ ಜೋರಾಗಿ ಕೂಗಿದ್ದಾರೆ. ಪಕ್ಕದ ಮನೆಯ ಸಂಬಂಧಿಕರು ನೋಡಿ ನ್ಯಾಮತಿ ಸರಕಾರಿ ಆಸ್ಪತ್ರೆಗೆ ಹೆಚ್ಚಿನ ಚಿಕಿತ್ಸೆಗೆ ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ಮಾರ್ಗ ಮಧ್ಯೆ ಭಟ್ಟೋಳ್ ಷಣ್ಮುಖಪ್ಪನವರು ಮೃತಪಟ್ಟರೆ, ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಯಲ್ಲಿ ಭಾನುವಾರ ರಾತ್ರಿ ದಾಖಲಾಗಿದ್ದ ಇಂದ್ರಮ್ಮ ಷಣ್ಮುಖಪ್ಪ ಅವರು ಸೋಮವಾರ ಚಿಕಿತ್ಸೆ ಫಲಿಸದೇ ಸಾವು ಕಂಡಿದ್ದಾರೆ ಎಂದು ನ್ಯಾಮತಿ ಪೊಲೀಸ್ ಠಾಣೆಯಲ್ಲಿ ನೀಡಿರುವ ದೂರಿನಲ್ಲಿ ಮೃತರ ಸಂಬಂಧಿಕ ಉಮೇಶ್ ಭಟ್ಟೋಳ್ ತಿಳಿಸಿದ್ದಾರೆ.