ಇರಾನ್‌ನ ಸುಪ್ರೀಂ ಲೀಡರ್ ಖಮೇನಿ ಹತ್ಯೆ ವಿಷಯದಲ್ಲಿ ಸರ್ಕಾರದ ಮೌನ ‘ಹೇಡಿತನ’: ಮೋದಿಗೆ ಸೋನಿಯಾ ಗಾಂಧಿ ತರಾಟೆ!

ನವದೆಹಲಿ: ಇರಾನ್‌ನ ಸುಪ್ರೀಂ ಲೀಡರ್ ಆಯತೊಲ್ಲಾ ಅಲಿ ಖಮೇನಿ ಅವರ ಹತ್ಯೆಯ ಕುರಿತು ಕೇಂದ್ರ ಸರ್ಕಾರದ ಮೌನವನ್ನು ಕಾಂಗ್ರೆಸ್ ಸಂಸದೀಯ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ ತೀವ್ರವಾಗಿ ಟೀಕಿಸಿದ್ದಾರೆ. ಈ ಕುರಿತು ಪತ್ರಿಕೆಯೊಂದರಲ್ಲಿ ಲೇಖನ ಬರೆದಿರುವ ಅವರು, ಈ ಮೌನವು ತಟಸ್ಥ ನಿಲುವಲ್ಲ, ಬದಲಿಗೆ ದೇಶದ ವಿದೇಶಾಂಗ ನೀತಿಯ “ಹೇಡಿತನ” (Abdication) ಎಂದು ಕರೆದಿದ್ದಾರೆ.

ಪ್ರಮುಖ ಅಂಶಗಳು:

• ಅಂತರಾಷ್ಟ್ರೀಯ ನಿಯಮಗಳ ಉಲ್ಲಂಘನೆ: ವಿಶ್ವಸಂಸ್ಥೆಯ ಚಾರ್ಟರ್‌ನ ಆರ್ಟಿಕಲ್ 2 (4) ರ ಅಡಿಯಲ್ಲಿ ಯಾವುದೇ ದೇಶದ ಸಾರ್ವಭೌಮತ್ವದ ಮೇಲೆ ದಾಳಿ ಮಾಡುವುದು ಅಪರಾಧ. ಕುಳಿತಲ್ಲೇ ಒಬ್ಬ ರಾಷ್ಟ್ರದ ಮುಖ್ಯಸ್ಥನನ್ನು ಹತ್ಯೆ ಮಾಡುವುದು ಅಂತರಾಷ್ಟ್ರೀಯ ಶಾಂತಿಗೆ ಧಕ್ಕೆ ತರುತ್ತದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

• ವಿದೇಶಾಂಗ ನೀತಿಯ ವೈಫಲ್ಯ: ಭಾರತದ ವಿದೇಶಾಂಗ ನೀತಿಯು ಮೊದಲಿನಿಂದಲೂ ಸಾರ್ವಭೌಮತ್ವ ಮತ್ತು ಶಾಂತಿಯನ್ನು ಎತ್ತಿಹಿಡಿಯುವ ತತ್ವಗಳನ್ನು ಹೊಂದಿತ್ತು. ಆದರೆ ಈಗಿನ ಸರ್ಕಾರದ ನಿಲುವು ಭಾರತದ ವಿಶ್ವಾಸಾರ್ಹತೆಯನ್ನು ಕುಗ್ಗಿಸುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.

• ಸಂಸತ್ತಿನಲ್ಲಿ ಚರ್ಚೆಗೆ ಆಗ್ರಹ: ಬಜೆಟ್ ಅಧಿವೇಶನದ ಎರಡನೇ ಭಾಗದಲ್ಲಿ ಈ ಕುರಿತು ಮತ್ತು ವಿಶ್ವದ ಅಸ್ಥಿರತೆಯ ಬಗ್ಗೆ ಮುಕ್ತವಾಗಿ ಸಂಸತ್ತಿನಲ್ಲಿ ಚರ್ಚೆಯಾಗಬೇಕು ಎಂದು ಸೋನಿಯಾ ಗಾಂಧಿ ಒತ್ತಾಯಿಸಿದ್ದಾರೆ.

• ಭಾರತೀಯರ ಸುರಕ್ಷತೆ: ಕೊಲ್ಲಿ ರಾಷ್ಟ್ರಗಳಲ್ಲಿ ಸುಮಾರು 1 ಕೋಟಿಗೂ ಹೆಚ್ಚು ಭಾರತೀಯರು ವಾಸಿಸುತ್ತಿದ್ದು, ಇಂತಹ ಘಟನೆಗಳ ಬಗ್ಗೆ ಭಾರತ ಸರಿಯಾದ ನಿಲುವು ತಳೆಯದಿದ್ದರೆ ಅವರ ಸುರಕ್ಷತೆಗೆ ಅಪಾಯ ಉಂಟಾಗಬಹುದು ಎಂದು ಎಚ್ಚರಿಸಿದ್ದಾರೆ.