“ಒಂದು ದೇಶ, ಒಂದು ಚುನಾವಣೆ”: ಶೇ. 70ರಷ್ಟು ಜನರ ಬೆಂಬಲ, MOTN ಸಮೀಕ್ಷೆಯ ವರದಿ!

ನವದೆಹಲಿ: ದೇಶಾದ್ಯಂತ ಲೋಕಸಭೆ ಹಾಗೂ ರಾಜ್ಯಗಳ ವಿಧಾನಸಭೆಗಳಿಗೆ ಏಕಕಾಲದಲ್ಲಿ ಚುನಾವಣೆ ನಡೆಸುವ “ಒಂದು ದೇಶ, ಒಂದು ಚುನಾವಣೆ” (One Nation, One Election) ಪ್ರಸ್ತಾವನೆಗೆ ಭಾರತದ ಬಹುಸಂಖ್ಯಾತ ಜನರು ಬೆಂಬಲ ಸೂಚಿಸಿದ್ದಾರೆ.

‘ಇಂಡಿಯಾ ಟುಡೇ – ಸಿವೋಟರ್’ ನಡೆಸಿರುವ ಆಗಸ್ಟ್ 2026ರ ‘ಮೂಡ್ ಆಫ್ ದಿ ನೇಷನ್’ (MOTN) ಸಮೀಕ್ಷೆಯ ಪ್ರಕಾರ, ಶೇಕಡಾ 70.4% ಜನರು ಈ ನೂತನ ವ್ಯವಸ್ಥೆಯನ್ನು ಬೆಂಬಲಿಸಿದ್ದಾರೆ.

ಬೆಂಬಲದಲ್ಲಿ ಸಣ್ಣ ಪ್ರಮಾಣದ ಇಳಿಕೆ:

ಕಳೆದ ಜನವರಿ 2026ರಲ್ಲಿ ನಡೆಸಲಾಗಿದ್ದ ಸಮೀಕ್ಷೆಯಲ್ಲಿ ಶೇ. 74ರಷ್ಟು ಜನರು ಏಕಕಾಲದ ಚುನಾವಣೆಗೆ ಬೆಂಬಲ ವ್ಯಕ್ತಪಡಿಸಿದ್ದರು. ಆದರೆ, ಪ್ರಸ್ತುತ ಆಗಸ್ಟ್ ಸಮೀಕ್ಷೆಯಲ್ಲಿ ಬೆಂಬಲವು ಶೇ. 70.4ಕ್ಕೆ ಕುಸಿದಿದೆ. ಇನ್ನು ಪ್ರಸ್ತಾವನೆಯನ್ನು ವಿರೋಧಿಸುವವರ ಸಂಖ್ಯೆ ಶೇ. 20.1ರಿಂದ ಶೇ. 24.1ಕ್ಕೆ ಏರಿಕೆಯಾಗಿದೆ.

2029ಕ್ಕೆ ಜಾರಿ ಸಾಧ್ಯವೇ?

ಜಂಟಿ ಸಂಸದೀಯ ಸಮಿತಿಯ ಅಧ್ಯಕ್ಷ ಪಿ.ಪಿ. ಚೌಧರಿ ಅವರು ನೀಡಿರುವ ಹೇಳಿಕೆ ಪ್ರಕಾರ, 2028ರ ವೇಳೆಗೆ ಸಂಸತ್ತಿನಲ್ಲಿ ಅಗತ್ಯ ಸಂವಿಧಾನ ತಿದ್ದುಪಡಿ ಮಸೂದೆಗಳು (129ನೇ ತಿದ್ದುಪಡಿ ಮಸೂದೆ) ಅಂಗೀಕಾರಗೊಂಡರೆ, 2029ರ ಲೋಕಸಭಾ ಚುನಾವಣೆಯೊಂದಿಗೆ ರಾಜ್ಯಗಳ ವಿಧಾನಸಭೆ ಚುನಾವಣೆಗಳನ್ನು ನಡೆಸುವುದು ಸಾಧ್ಯವಾಗಲಿದೆ.

ವಿಪಕ್ಷಗಳ ತೀವ್ರ ವಿರೋಧ:

ಕಾಂಗ್ರೆಸ್ ಹಿರಿಯ ನಾಯಕ ಪಿ. ಚಿದಂಬರಂ ಈ ಪ್ರಸ್ತಾವನೆಯನ್ನು ತೀವ್ರವಾಗಿ ಖಂಡಿಸಿದ್ದು, ಇದು “ಸಂವಿಧಾನ ವಿರೋಧಿ” ಹಾಗೂ ಪ್ರಜಾಪ್ರಭುತ್ವದ ಆಶಯಕ್ಕೆ ಧಕ್ಕೆ ತರುವ ನಿರ್ಧಾರ ಎಂದು ಬಣ್ಣಿಸಿದ್ದಾರೆ. ಇದರ ವಿರುದ್ಧ ದೇಶಾದ್ಯಂತ ಹೋರಾಟ ರೂಪಿಸುವುದಾಗಿ ಎಚ್ಚರಿಸಿದ್ದಾರೆ.