ತ್ರಿಕೋನ ಪ್ರೇಮ: 19 ವರ್ಷದ ಯುವತಿ ಗುಂಡಿಕ್ಕಿ ಕೊಂದ ಸಹೋದರ, ಪ್ರಿಯಕರ ಸೇರಿ ನಾಲ್ವರ ಬಂಧನ!

ಮುಂಬೈ: ಪ್ರೇಮ ತ್ರಿಕೋನ ಮತ್ತು ವೈಯಕ್ತಿಕ ದ್ವೇಷದ ಹಿನ್ನೆಲೆಯಲ್ಲಿ 19 ವರ್ಷದ ಯುವತಿಯೊಬ್ಬಳನ್ನು ಗುಂಡಿಕ್ಕಿ ಕೊಂದಿರುವ ಘಟನೆ ಮುಂಬೈನ ಶಿವಾಜಿ ನಗರ ಪ್ರದೇಶದಲ್ಲಿ ನಡೆದಿದೆ.

ಘಟನೆಯ ವಿವರ: ಮೃತ ಯುವತಿಯನ್ನು ಶಿಫಾ ಶೇಖ್ ಎಂದು ಗುರುತಿಸಲಾಗಿದೆ. ಮಂಗಳವಾರ ಮಧ್ಯಾಹ್ನ ಶಿಫಾ ತನ್ನ ಮನೆಯಿಂದ ಹೊರಬಂದಿದ್ದಾಗ ಈ ದಾಳಿ ನಡೆದಿದೆ. ಆರೋಪಿಗಳು ಅತ್ಯಂತ ಸಮೀಪದಿಂದ ಆಕೆಯ ಮುಖಕ್ಕೆ ಗುಂಡು ಹಾರಿಸಿದ್ದು, ಆಸ್ಪತ್ರೆಗೆ ಕರೆದೊಯ್ಯುವಷ್ಟರಲ್ಲಿ ಆಕೆ ಮೃತಪಟ್ಟಿದ್ದಾಳೆ.

ಆರೋಪಿಗಳ ಬಂಧನ:

ಘಟನೆ ನಡೆದ 12 ಗಂಟೆಗಳ ಒಳಗಾಗಿ ಶಿವಾಜಿ ನಗರ ಪೊಲೀಸರು ಕ್ಷಿಪ್ರ ಕಾರ್ಯಾಚರಣೆ ನಡೆಸಿ ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಬಂಧಿತರಲ್ಲಿ ಮುಖ್ಯ ಆರೋಪಿ ತಬಸ್ಸುಮ್ ಶೇಖ್ (25) ಮತ್ತು ಆಕೆಯ ಸಹೋದರ ಸಾಜಿದ್, ಹಾಗೂ ರಿಜ್ವಾನ್ ಮತ್ತು ಕಲಾಂ ಚೌಧರಿ ಸೇರಿದ್ದಾರೆ.

ಕೊಲೆಗೆ ಕಾರಣ:

ಪೊಲೀಸರ ಪ್ರಾಥಮಿಕ ತನಿಖೆಯ ಪ್ರಕಾರ, ಇದು ‘ಲವ್ ಟ್ರಯಾಂಗಲ್’ನಿಂದ ನಡೆದ ಕೃತ್ಯವಾಗಿದೆ. ರಿಜ್ವಾನ್ ಎಂಬ ಯುವಕನೊಂದಿಗೆ ಶಿಫಾ ಸ್ನೇಹ ಹೊಂದಿದ್ದಳು. ಆದರೆ ರಿಜ್ವಾನ್ ಕಳೆದ ಏಳು ವರ್ಷಗಳಿಂದ ತಬಸ್ಸುಮ್ ಜೊತೆ ಪ್ರೇಮ ಸಂಬಂಧದಲ್ಲಿದ್ದನು. ಇದರಿಂದ ಕೆರಳಿದ ತಬಸ್ಸುಮ್, ಶಿಫಾಳನ್ನು ಹತ್ಯೆ ಮಾಡಲು ಸಂಚು ರೂಪಿಸಿದ್ದ ಎಂದು ತಿಳಿದುಬಂದಿದೆ.