ಮಧುಮೇಹಿಗಳ ಗಾಯ ಮತ್ತು ಶ್ವಾಸಕೋಶದ ಸೋಂಕು ಗುಣಪಡಿಸುವಂಥ ಮಹತ್ವದ ಸಂಶೋಧನೆ: ಅಪಾಯಕಾರಿ ಬ್ಯಾಕ್ಟೀರಿಯಾ ವಿರುದ್ಧ ಹಸುವಿನ ಜೀರ್ಣಾಂಗದ ಎಂಜೈಮ್ ಯಶಸ್ವಿ!

ಬೆಂಗಳೂರು: ಜಗತ್ತಿನಾದ್ಯಂತ ಆಸ್ಪತ್ರೆಗಳಲ್ಲಿ ಬಹುದೊಡ್ಡ ಸವಾಲಾಗಿರುವ ‘ಸೂಪರ್‌ಬಗ್’ (Superbug) ಬ್ಯಾಕ್ಟೀರಿಯಾಗಳನ್ನು ನಿಯಂತ್ರಿಸಲು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ (IISc) ಸಂಶೋಧಕರು ಮಹತ್ವದ ಹೆಜ್ಜೆ ಇಟ್ಟಿದ್ದಾರೆ.

ಹಸುವಿನ ಜೀರ್ಣಾಂಗದ ಮೊದಲ ಭಾಗದಲ್ಲಿರುವ (Rumen) ಸೂಕ್ಷ್ಮಾಣುಜೀವಿಗಳಿಂದ ಪಡೆಯಲಾದ ‘CRhAB’ ಎಂಬ ವಿಶೇಷ ಎಂಜೈಮ್, ಆಂಟಿಬಯೋಟಿಕ್-ನಿರೋಧಕ ಬ್ಯಾಕ್ಟೀರಿಯಾಗಳ ರಕ್ಷಣಾ ಕವಚವನ್ನು ಮುರಿಯಬಲ್ಲದು ಎಂಬುದನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ.

ಈ ಎಂಜೈಮ್ ನೇರವಾಗಿ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವುದಿಲ್ಲ, ಬದಲಾಗಿ ಅವುಗಳ ಸುತ್ತಲಿರುವ ‘ಬಯೋಫಿಲ್ಮ್’ (Biofilm) ಎಂಬ ಜಿಗುಟಾದ ರಕ್ಷಣಾ ಗೋಡೆಯನ್ನು ನಾಶಪಡಿಸುತ್ತದೆ.

ಇದು ಅಸಿನೆಟೊಬ್ಯಾಕ್ಟರ್ ಬೌಮನ್ನಿ (Acinetobacter baumannii) ಮತ್ತು ಕ್ಲೆಬ್ಸಿಯೆಲ್ಲಾ ನ್ಯುಮೋನಿಯಾ (Klebsiella pneumoniae) ದಂತಹ ಅಪಾಯಕಾರಿ ಬ್ಯಾಕ್ಟೀರಿಯಾಗಳ ವಿರುದ್ಧ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ. ರಕ್ಷಣಾ ಕವಚ ಇಲ್ಲದಾಗ, ಸಾಮಾನ್ಯ ಆಂಟಿಬಯೋಟಿಕ್ ಮದ್ದುಗಳು ಈ ಬ್ಯಾಕ್ಟೀರಿಯಾಗಳ ಮೇಲೆ ಮತ್ತೆ ಸುಲಭವಾಗಿ ಕೆಲಸ ಮಾಡಬಲ್ಲವು.

ವಿಜ್ಞಾನಿಗಳು ಈ ಎಂಜೈಮ್ ಲೇಪಿತ ವೈದ್ಯಕೀಯ ಬ್ಯಾಂಡೇಜ್ ಅನ್ನು ಗಾಯಗೊಂಡ ಇಲಿಗಳ ಮೇಲೆ ಪ್ರಯೋಗಿಸಿ ಯಶಸ್ವಿಯಾಗಿದ್ದು, ಭವಿಷ್ಯದಲ್ಲಿ ಮಧುಮೇಹಿಗಳ ಗಾಯಗಳನ್ನು ಮತ್ತು ಶ್ವಾಸಕೋಶದ ಸೋಂಕುಗಳನ್ನು ಗುಣಪಡಿಸಲು ಇದು ಹೆಚ್ಚು ನೆರವಾಗುವ ನಿರೀಕ್ಷೆಯಿದೆ.