ಮುಸ್ಲಿಂ ಜನಸಂಖ್ಯೆ ಶೇ.50 ಮೀರಿದರೆ ಉಳಿದ ಸಮುದಾಯಗಳ ನಾಶ: ಅಸ್ಸಾಂ ಸಿಎಂ ಹಿಮಂತ ಶರ್ಮಾ ಎಚ್ಚರಿಕೆ!

ನವದೆಹಲಿ: ಮುಸ್ಲಿಂ ಜನಸಂಖ್ಯೆ ಶೇಕಡಾ 50 ಮೀರಿದರೆ ಉಳಿದ ಸಮುದಾಯಗಳ ನಾಶಗೊಳಿಸಬಹುದು ಎಂದು ಅಸ್ಸಾಂ ಸಿಎಂ ಹಿಮಂತ ಶರ್ಮಾ ಎಚ್ಚರಿಕೆ ನೀಡಿದ್ದಾರೆ.

ಆಜ್ ತಕ್ ನ್ಯೂಸ್ ಚಾನಲ್ ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಈ ಕಳವಳ ವ್ಯಕ್ತಪಡಿಸಿರುವ ಅವರು, ಅಸ್ಸಾಂನಲ್ಲಿ “ಜನಸಂಖ್ಯಾ ಆಕ್ರಮಣ” ಕಳವಳಕಾರಿ ಎಂದರು.

ದಶಕಗಳ ಅನಿಯಂತ್ರಿತ ವಲಸೆಯಿಂದಾಗಿ ಸ್ಥಳೀಯ ಅಸ್ಸಾಮಿ ಜನಸಂಖ್ಯೆಯು ಅಸ್ತಿತ್ವದ ಬಿಕ್ಕಟ್ಟನ್ನು ಎದುರಿಸುತ್ತಿದೆ ಎಂದು ಅವರು ಹೇಳಿದರು. ಅಂಕಿಅಂಶಗಳ ಸಮೇತ ಮಾತನಾಡಿದ ಅವರು, 2021ರಲ್ಲಿ ಸುಮಾರು ಶೇಕಡಾ 38 ರಷ್ಟು ಎಂದು ಅಂದಾಜಿಸಲಾದ ಅಸ್ಸಾಂನ ಮುಸ್ಲಿಂ ಜನಸಂಖ್ಯೆಯು 2027 ರ ವೇಳೆಗೆ ಶೇಕಡಾ 40 ಕ್ಕೆ ಏರಬಹುದು ಎಂದು ಅವರು ತಿಳಿಸಿದರು. 1961ರಲ್ಲಿ ಕಡಿಮೆ ಇದ್ದ ಮುಸ್ಲಿಂ ಜನಸಂಖ್ಯೆ
ಇಂದು ಹೆಚ್ಚಾಗಿದೆ ಎಂದು ತಿಳಿಸಿದರು.

ಮುಸ್ಲಿಂ ಜನಸಂಖ್ಯೆಯು ಶೇಕಡಾ 50 ದಾಟಿದರೆ, ಇತರ ಸಮುದಾಯಗಳು ಬದುಕುಳಿಯುವುದಿಲ್ಲ ಎಂದು ಎಚ್ಚರಿಸಿದರು. ತಮ್ಮ ಬಲವಾದ ಹೇಳಿಕೆಗಳ ಹೊರತಾಗಿಯೂ, ಶರ್ಮಾ ಅವರು “ರಾಜ್ಯದ ಮಿಯಾ ಮುಸ್ಲಿಮರು ಮತ್ತು ಮಹಿಳೆಯರೊಂದಿಗೆ ಉತ್ತಮ ಸಂಬಂಧವನ್ನು” ಉಳಿಸಿಕೊಂಡಿರುವುದಾಗಿ ಹೇಳಿದರು. ಮುಸ್ಲಿಂ ಮತದಾರರು ಕಾಂಗ್ರೆಸ್ ಅನ್ನು ಬೆಂಬಲಿಸಿದರೂ ಸರ್ಕಾರ ಮಾತ್ರ ನಮ್ಮದೇ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಆದಾಗ್ಯೂ, “ಅಸ್ಸಾಮಿಗಳಲ್ಲದವರು ಮತ್ತು ಭಾರತೀಯರಲ್ಲದವರು” “ತನ್ನ ಜನರಲ್ಲ” ಎಂದು ಅವರು ಪ್ರತಿಪಾದಿಸಿದರು.