ರೈತರಿಗೆ ಗುಡ್ ನ್ಯೂಸ್: ಕಿಸಾನ್ ಕ್ರೆಡಿಟ್ ಕಾರ್ಡ್ ನಿಯಮಗಳಲ್ಲಿ RBI ಮಹತ್ವದ ಬದಲಾವಣೆ – 6 ವರ್ಷಕ್ಕೆ ಸಾಲದ ಅವಧಿ ವಿಸ್ತರಣೆ!

ನವದೆಹಲಿ: ರೈತರಿಗೆ ಗುಡ್ ನ್ಯೂಸ್. ಕಿಸಾನ್ ಕ್ರೆಡಿಟ್ ಕಾರ್ಡ್ ನಿಯಮಗಳಲ್ಲಿ RBI ಮಹತ್ವದ ಬದಲಾವಣೆ ತರಲು ಮುಂದಾಗಿದೆ. ಆರು ವರ್ಷಗಳ ಕಾಲ ಸಾಲದ ಅವಧಿ ವಿಸ್ತರಣೆ ಮಾಡಲು ಮುಂದಾಗಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ (RBI) ರೈತರಿಗೆ ಕಿಸಾನ್ ಕ್ರೆಡಿಟ್ ಕಾರ್ಡ್ (KCC) ಯೋಜನೆಯಲ್ಲಿ ದೊಡ್ಡ ಮಟ್ಟದ ಬದಲಾವಣೆಗಳನ್ನು ತರಲು ಉದ್ದೇಶಿಸಿದೆ. ರೈತರಿಗೆ ಸಾಲ ಪಡೆಯುವ ಪ್ರಕ್ರಿಯೆಯನ್ನು ಸುಲಭಗೊಳಿಸಲು ಮತ್ತು ಆಧುನಿಕ ಕೃಷಿ ವೆಚ್ಚಗಳನ್ನು ಒಳಗೊಳ್ಳಲು ಈ ಹೊಸ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಲಾಗಿದೆ.

ಏಕರೂಪದ ಚೌಕಟ್ಟು:

ಕೃಷಿ ಮತ್ತು ಅದಕ್ಕೆ ಸಂಬಂಧಿಸಿದ ಚಟುವಟಿಕೆಗಳಿಗೆ ಒಂದೇ ರೀತಿಯ ನಿಯಮಗಳನ್ನು ಜಾರಿಗೆ ತರಲು ಆರ್‌ಬಿಐ ಪ್ರಸ್ತಾಪಿಸಿದೆ. ಇದು ವಾಣಿಜ್ಯ ಬ್ಯಾಂಕ್‌ಗಳು ಮತ್ತು ಸಹಕಾರಿ ಬ್ಯಾಂಕ್‌ಗಳ ನಡುವೆ ಸಾಲ ನೀಡುವ ಪ್ರಕ್ರಿಯೆಯಲ್ಲಿ ಸಮಾನತೆ ತರಲಿದೆ.

ಬೆಳೆ ಹಂಗಾಮುಗಳ ಪ್ರಮಾಣೀಕರಣ:

ಗೊಂದಲ ನಿವಾರಿಸಲು ಅಲ್ಪಾವಧಿ ಬೆಳೆಗಳಿಗೆ 12 ತಿಂಗಳು ಮತ್ತು ದೀರ್ಘಾವಧಿ ಬೆಳೆಗಳಿಗೆ 18 ತಿಂಗಳ ಹಂಗಾಮು ಅವಧಿಯನ್ನು ನಿಗದಿಪಡಿಸಲಾಗಿದೆ.

6 ವರ್ಷಗಳ ಅವಧಿ:

ಕಿಸಾನ್ ಕ್ರೆಡಿಟ್ ಕಾರ್ಡ್ ಸಾಲದ ಅವಧಿಯನ್ನು ಈಗಿನ ಐದು ವರ್ಷಗಳಿಂದ ಆರು ವರ್ಷಗಳಿಗೆ ಹೆಚ್ಚಿಸಲು ನಿರ್ಧರಿಸಲಾಗಿದೆ. ಇದು ದೀರ್ಘಾವಧಿಯ ಬೆಳೆ ಬೆಳೆಯುವ ರೈತರಿಗೆ ಹೆಚ್ಚು ಅನುಕೂಲಕರವಾಗಲಿದೆ.

ನೈಜ ಕೃಷಿ ವೆಚ್ಚಕ್ಕೆ ಸಾಲ:

ಕೇವಲ ಅಂದಾಜಿನ ಮೇಲೆ ಸಾಲ ನೀಡದೆ, ಆಯಾ ಬೆಳೆಗಳಿಗೆ ತಗಲುವ ನೈಜ ವೆಚ್ಚದ ಆಧಾರದ ಮೇಲೆ ಸಾಲದ ಮಿತಿಯನ್ನು ನಿರ್ಧರಿಸಲಾಗುವುದು.

ಆಧುನಿಕ ವೆಚ್ಚಗಳ ಸೇರ್ಪಡೆ:

ಈಗಿನ ಕಾಲದ ಕೃಷಿಗೆ ಅಗತ್ಯವಿರುವ ಮಣ್ಣಿನ ಪರೀಕ್ಷೆ, ಹವಾಮಾನ ಮುನ್ಸೂಚನೆ ಮಾಹಿತಿ ಪಡೆಯುವ ವೆಚ್ಚ ಮತ್ತು ಸಾವಯವ ಕೃಷಿ ಪ್ರಮಾಣೀಕರಣದ ಖರ್ಚುಗಳನ್ನು ಸಹ ಸಾಲದ ವ್ಯಾಪ್ತಿಗೆ ತರಲಾಗಿದೆ.