ಎಮರ್ಜೆನ್ಸಿ ಫಂಡ್ ಅಥವಾ SIP? ₹5,000 ಹೂಡಿಕೆ ಮಾಡುವ ಮುನ್ನ ಈ ಲೇಖನ ಓದಿ!

ನವದೆಹಲಿ: ಹೆಚ್ಚಿನವರು ಕೆಲಸಕ್ಕೆ ಸೇರಿದ ಕೂಡಲೇ ಅಥವಾ ಕೈಯಲ್ಲಿ ಸ್ವಲ್ಪ ಹಣ ಬಂದ ತಕ್ಷಣ ಮಾಡುವ ಮೊದಲ ಯೋಚನೆ ‘ಮ್ಯೂಚುವಲ್ ಫಂಡ್ ಎಸ್‌ಐಪಿ’ (SIP). ಆದರೆ, ಹಣಕಾಸು ತಜ್ಞರ ಪ್ರಕಾರ, ನಿಮ್ಮ ಹೂಡಿಕೆಯ ಪಯಣದಲ್ಲಿ SIP ಗಿಂತಲೂ ಮೊದಲು ‘ತುರ್ತು ನಿಧಿ’ ( ಎಮರ್ಜೆನ್ಸಿ ಫಂಡ್) ಇರುವುದು ಬಹಳ ಮುಖ್ಯ.

SIP ಗಿಂತ ತುರ್ತು ನಿಧಿಯೇ ಏಕೆ ಮೊದಲು?

ನಾವು ಉತ್ಸಾಹದಿಂದ ಹೂಡಿಕೆ ಆರಂಭಿಸುತ್ತೇವೆ, ಆದರೆ ಜೀವನದಲ್ಲಿ ಅನಿರೀಕ್ಷಿತ ಘಟನೆಗಳು—ಆರೋಗ್ಯ ಸಮಸ್ಯೆ, ಉದ್ಯೋಗ ನಷ್ಟ ಅಥವಾ ಅಪಘಾತಗಳು—ಸಂಭವಿಸಿದಾಗ ಕೈಯಲ್ಲಿ ಹಣವಿಲ್ಲದಿದ್ದರೆ ಏನು ಮಾಡುವುದು? ಅಂತಹ ಸಮಯದಲ್ಲಿ ನಾವು ಅರ್ಧಕ್ಕೆ SIP ನಿಲ್ಲಿಸುತ್ತೇವೆ ಅಥವಾ ನಷ್ಟದಲ್ಲಿದ್ದರೂ ಹೂಡಿಕೆಯನ್ನು ಹಿಂಪಡೆಯುತ್ತೇವೆ.

ತಜ್ಞರ ಪ್ರಕಾರ, ತುರ್ತು ನಿಧಿ ಇಲ್ಲದೆ SIP ಆರಂಭಿಸುವ ಶೇ. 70ರಷ್ಟು ಜನರು 2 ವರ್ಷಗಳ ಒಳಗಾಗಿ ತಮ್ಮ ಹೂಡಿಕೆಯನ್ನು ಹಿಂಪಡೆಯುತ್ತಾರೆ. ಅದೇ ಸುರಕ್ಷತಾ ನಿಧಿ ಇರುವವರು ಶೇ. 85ರಷ್ಟು ದೀರ್ಘಕಾಲ ಹೂಡಿಕೆಯಲ್ಲಿ ಮುಂದುವರಿಯುತ್ತಾರೆ.

ಎಷ್ಟು ಹಣ ಇರಬೇಕು?

ನಿಮ್ಮ ತಿಂಗಳ ಅಗತ್ಯ ಖರ್ಚುಗಳ ಕನಿಷ್ಠ 6 ರಿಂದ 12 ತಿಂಗಳಷ್ಟು ಹಣವನ್ನು ತುರ್ತು ನಿಧಿಯಾಗಿ ಮೀಸಲಿಡಬೇಕು.

ಈ ಹಣವನ್ನು ಸುಲಭವಾಗಿ ಹಿಂಪಡೆಯಬಹುದಾದ (Liquidity) ಉಳಿತಾಯ ಖಾತೆ ಅಥವಾ ಲಿಕ್ವಿಡ್ ಫಂಡ್‌ಗಳಲ್ಲಿ (Liquid Funds) ಇಡುವುದು ಸೂಕ್ತ.

ಹಂತ-ಹಂತದ ಹೂಡಿಕೆ ಕ್ರಮ:

ಮೊದಲ ಹಂತ:

ಮೊದಲು ಸಣ್ಣ ಪ್ರಮಾಣದ ತುರ್ತು ನಿಧಿ ಸ್ಥಾಪಿಸಿ.

ಎರಡನೇ ಹಂತ:

ತುರ್ತು ನಿಧಿ ಬೆಳೆಯುತ್ತಿರುವಂತೆಯೇ ಸಣ್ಣ ಮೊತ್ತದ SIP ಆರಂಭಿಸಿ.

ಮೂರನೇ ಹಂತ:

ಪೂರ್ಣ ಪ್ರಮಾಣದ ಸುರಕ್ಷತಾ ಕವಚ ಸಿದ್ಧವಾದ ಮೇಲೆ ಹೆಚ್ಚಿನ ಅಪಾಯವಿರುವ (High Risk) ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿ.