ನಟಿ ಐಶ್ವರ್ಯ ರೈಗೆ ‘ಪ್ಲಾಸ್ಟಿಕ್’ ಎಂದಿದ್ದಕ್ಕೆ ಪಶ್ಚಾತ್ತಾಪ: ನೇರವಾಗಿ ಕ್ಷಮೆ ಕೇಳಲು ಸಿದ್ಧ ಕಿಸ್ಸಿಂಗ್ ಸ್ಟಾರ್ ಇಮ್ರಾನ್ ಹಶ್ಮಿ!

ಮುಂಬೈ: ಬಾಲಿವುಡ್ ನಟ ಇಮ್ರಾನ್ ಹಶ್ಮಿ ಅವರು ನಟಿ ಐಶ್ವರ್ಯ ರೈ ಬಚ್ಚನ್ ಅವರನ್ನು ‘ಪ್ಲಾಸ್ಟಿಕ್’ ಎಂದು ಕರೆದಿದ್ದ ತಮ್ಮ ಹಳೆಯ ವಿವಾದಾತ್ಮಕ ಹೇಳಿಕೆಯ ಕುರಿತು ಮಾತನಾಡಿ, ಅದಕ್ಕಾಗಿ ಬಹಿರಂಗವಾಗಿ ಪಶ್ಚಾತ್ತಾಪ ವ್ಯಕ್ತಪಡಿಸಿದ್ದಾರೆ.

ವಿವಾದ ಹಿನ್ನೆಲೆ:

2014ರಲ್ಲಿ ‘ಕಾಫಿ ವಿತ್ ಕರಣ್’ ಶೋನಲ್ಲಿ ಭಾಗವಹಿಸಿದ್ದಾಗ, ರ್ಯಾಪಿಡ್-ಫೈರ್ ರೌಂಡ್‌ನಲ್ಲಿ ‘ಪ್ಲಾಸ್ಟಿಕ್’ ಪದ ಕೇಳಿದ ತಕ್ಷಣ ಇಮ್ರಾನ್ ಹಶ್ಮಿ ಅವರು ಐಶ್ವರ್ಯ ರೈ ಅವರ ಹೆಸರನ್ನು ಹೇಳಿದ್ದರು. ಕೇವಲ ಗಿಫ್ಟ್ ಹ್ಯಾಂಪರ್ ಗೆಲ್ಲುವ ಆತುರದಲ್ಲಿ ತಮಾಷೆಯಾಗಿ ಹೇಳಿದ ಈ ಮಾತು ದೊಡ್ಡ ಮಟ್ಟದ ವಿವಾದ ಸೃಷ್ಟಿಸಿತ್ತು ಹಾಗೂ ಇದರಿಂದ ಅವರು ಸಾಕಷ್ಟು ಟೀಕೆಗಳನ್ನು ಎದುರಿಸಬೇಕಾಯಿತು.

ಇಮ್ರಾನ್ ಹಶ್ಮಿ ಪಶ್ಚಾತ್ತಾಪ:

ಇತ್ತೀಚಿನ ಸಂದರ್ಶನವೊಂದರಲ್ಲಿ ಈ ಕುರಿತು ಮಾತನಾಡಿದ ಇಮ್ರಾನ್, “ಆ ಸಂದರ್ಭದಲ್ಲಿ ಹೇಳಿದ ಮಾತು ತಪ್ಪು ಮತ್ತು ಅಸಹ್ಯಕರವಾಗಿತ್ತು, ಅದಕ್ಕಾಗಿ ನನಗೆ ವಿಷಾದವಿದೆ. ಕರಣ್ ಶೋನಲ್ಲಿ ತಮಾಷೆಗಾಗಿ ಹಾಗೆ ಹೇಳಿದ್ದೆ. ಐಶ್ವರ್ಯಾ ಅವರ ಬಗ್ಗೆ ನನಗೆ ಅಪಾರ ಗೌರವವಿದೆ” ಎಂದಿದ್ದಾರೆ. ಅಲ್ಲದೆ, ತಾನು ‘ಹಮ್ ದಿಲ್ ದೇ ಚುಕೇ ಸನಮ್’ ಚಿತ್ರದ ಸಮಯದಿಂದಲೂ ಅವರ ದೊಡ್ಡ ಅಭಿಮಾನಿಯಾಗಿದ್ದು, ಅವರನ್ನು ಭೇಟಿಯಾಗಿ ನೇರವಾಗಿ ಕ್ಷಮೆಯಾಚಿಸಲು ಬಯಸುವುದಾಗಿ ತಿಳಿಸಿದ್ದಾರೆ.

ಐಶ್ವರ್ಯ ರೈ ಪ್ರತಿಕ್ರಿಯೆ:

ಐಶ್ವರ್ಯ ರೈ ಅವರು ಈ ಹೇಳಿಕೆಗೆ ನೇರವಾಗಿ ಎಂದೂ ಪ್ರತಿಕ್ರಿಯಿಸಿಲ್ಲವಾದರೂ, 2019ರ ಸಂದರ್ಶನವೊಂದರಲ್ಲಿ ‘ಫೇಕ್ ಮತ್ತು ಪ್ಲಾಸ್ಟಿಕ್’ ಎಂದು ಕರೆದಿದ್ದು ತಮಗೆ ಸಿಕ್ಕ ಅತ್ಯಂತ ಕೆಟ್ಟ ಕಮೆಂಟ್ ಎಂದು ಹೇಳಿಕೊಂಡಿದ್ದರು.