ಮೈನರ್ ಬಾಲಕಿಗೆ ಪೀಡೆ, ಕೈ ಹಿಡಿದು ಎಳೆದ ನೆರೆಮನೆಯ ಬಾಲಕ: ಎರಡು ಕುಟುಂಬಗಳ ನಡುವೆ ಭೀಕರ ಗಲಾಟೆ, ಆರೋಪಿ ಬಂಧನ!

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ವಾಯುವ್ಯ ಭಾಗದ ರೋಹಿಣಿಯ ಪ್ರಶಾಂತ್ ವಿಹಾರ್ ಪ್ರದೇಶದಲ್ಲಿ ಅಪ್ರಾಪ್ತ ಬಾಲಕಿಗೆ ಕಿರುಕುಳ ನೀಡಿದ ವಿಚಾರಕ್ಕೆ ಸಂಬಂಧಿಸಿದಂತೆ ಎರಡು ಕುಟುಂಬಗಳ ನಡುವೆ ಭೀಕರ ಗಲಾಟೆ ನಡೆದಿದ್ದು, ಘಟನೆಗೆ ಸಂಬಂಧಿಸಿದಂತೆ ಆರೋಪಿ ಬಾಲಕನನ್ನು ಪೊಲೀಸರು ಬಂಧಿಸಿದ್ದಾರೆ.

ಘಟನೆಯ ವಿವರ:

ಅಪ್ರಾಪ್ತ ಬಾಲಕಿಯ ದೂರಿನ ಪ್ರಕಾರ, ನೆರೆಮನೆಯಲ್ಲೇ ವಾಸಿಸುತ್ತಿರುವ ಬಾಲಕನೋರ್ವ ಕಳೆದ ಕೆಲವು ದಿನಗಳಿಂದ ಆಕೆಯನ್ನು ಹಿಂಬಾಲಿಸುತ್ತಾ ಪೀಡಿಸುತ್ತಿದ್ದ. ಬುಧವಾರ ಸಂಜೆ ಸುಮಾರು 8 ಗಂಟೆಗೆ ಬಾಲಕಿ ಮಾರುಕಟ್ಟೆಗೆ ತೆರಳುತ್ತಿದ್ದಾಗ, ಆಕೆಯನ್ನು ಹಿಂಬಾಲಿಸಿದ ಆರೋಪಿ ಬಾಲಕ, ಆಕೆಯ ಕೈ ಹಿಡಿದು ಎಳೆದು ಅಸಭ್ಯ ಭಾಷೆಯಲ್ಲಿ ಮಾತನಾಡಿದ್ದಾನೆ. ಈ ವೇಳೆ ಬಾಲಕಿ ಜೋರಾಗಿ ಕಿರುಚಾಡಿದ್ದು, ಆಕೆಯ ಸಹೋದರ ಬಂದು ಬಾಲಕನನ್ನು ಗದರಿಸಿದ್ದಾನೆ.

ಕುಟುಂಬಗಳ ನಡುವೆ ಹೊಡೆದಾಟ:

ಈ ಘಟನೆಯ ಬೆನ್ನಲ್ಲೇ ಆಕ್ರೋಶಗೊಂಡ ಆರೋಪಿ ಬಾಲಕನ ಕುಟುಂಬಸ್ಥರು ಬಾಲಕಿಯ ಮನೆಗೆ ತೆರಳಿ ದಾಳಿ ನಡೆಸಿದ್ದಾರೆ. ಈ ವೇಳೆ ನಡೆದ ನೂಕಾಟ-ತೂಕಾಟದಲ್ಲಿ ಬಾಲಕಿಯ ತಾಯಿಗೆ ತೀವ್ರ ಗಾಯಗಳಾಗಿವೆ. ಮತ್ತೊಂದೆಡೆ, ಬಾಲಕಿಯ ತಾಯಿ ಮತ್ತು ಅಜ್ಜಿ ಆರೋಪಿ ಬಾಲಕನ ತಲೆಗೆ ಹೊಡೆದಿದ್ದು, ಆತನಿಗೂ ಗಾಯವಾಗಿದೆ ಎನ್ನಲಾಗಿದೆ.

ಪೊಲೀಸ್ ತನಿಖೆ ಚುರುಕು:

ಘಟನೆಯ ನಂತರ ಗಾಯಗೊಂಡ ಇಬ್ಬರೂ ಕುಟುಂಬದ ಸದಸ್ಯರಿಗೆ ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗಿದೆ. ಬಾಲಕಿ ನೀಡಿದ ದೂರಿನ ಆಧಾರದ ಮೇಲೆ ಪ್ರಶಾಂತ್ ವಿಹಾರ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಆರೋಪಿ ಬಾಲಕನನ್ನು ಬಂಧಿಸಿದ್ದಾರೆ. ಎರಡೂ ಕಡೆಯ ಆರೋಪಗಳನ್ನು ಪರಿಶೀಲಿಸುತ್ತಿರುವ ಪೊಲೀಸರು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.