ಸಿಬಿಎಸ್‌ಇ 12ನೇ ತರಗತಿ ಫಲಿತಾಂಶ ಗೊಂದಲ: ವಿದ್ಯಾರ್ಥಿಗಳನ್ನು ‘ಸೋರೋಸ್ ಏಜೆಂಟ್ಸ್’ ಎಂದಿದ್ದಕ್ಕೆ ರಾಹುಲ್ ಗಾಂಧಿ ಕಿಡಿ!

ನವದೆಹಲಿ: ಸಿಬಿಎಸ್‌ಇ (CBSE) 12ನೇ ತರಗತಿಯ ಫಲಿತಾಂಶ ಹಾಗೂ ಮರುಮೌಲ್ಯಮಾಪನ ಪ್ರಕ್ರಿಯೆಯಲ್ಲಿ ಭಾರಿ ಅಕ್ರಮ ಮತ್ತು ಗೊಂದಲಗಳು ನಡೆದಿವೆ ಎಂದು ಆರೋಪಿಸಿ ವಿದ್ಯಾರ್ಥಿಗಳು ಧ್ವನಿ ಎತ್ತಿದ್ದಾರೆ. ಇದರ ಬೆನ್ನಲ್ಲೇ, ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ನೊಂದ ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಿರುವ ವಿಡಿಯೋ ಒಂದನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

ಹಸ್ತಾಕ್ಷರ ಬದಲಾವಣೆ, ಒನ್‌-ಸ್ಕ್ರೀನ್‌ ಮಾರ್ಕಿಂಗ್ ಲೋಪ:

ಮರುಮೌಲ್ಯಮಾಪನದ ಭಾಗವಾಗಿ ಉತ್ತರ ಪತ್ರಿಕೆಗಳ ನಕಲು ಪ್ರತಿಯನ್ನು (Photocopy) ಪಡೆದ ವಿದ್ಯಾರ್ಥಿಗಳು ಆಘಾತಕಾರಿ ವಿಷಯಗಳನ್ನು ಹೊರಹಾಕಿದ್ದಾರೆ. ವೇದಾಂತ್ ಎಂಬ ವಿದ್ಯಾರ್ಥಿ ಮಾತನಾಡಿ, “ಉತ್ತರ ಪತ್ರಿಕೆಯ ಮುಖಪುಟ (Cover Sheet) ನನ್ನದೇ ಆಗಿದೆ, ಆದರೆ ಒಳಗಿನ ಪುಟಗಳಲ್ಲಿರುವ ಹಸ್ತಾಕ್ಷರ (Handwriting) ಬೇರೆಯವರದ್ದಾಗಿದೆ. ಸರಿಯಾಗಿ ಬರೆದ ಉತ್ತರಗಳಿಗೂ ಅಂಕ ನೀಡಿಲ್ಲ” ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಸಿಬಿಎಸ್‌ಇ ಜಾರಿಗೆ ತಂದಿರುವ ಡಿಜಿಟಲ್ ಮೌಲ್ಯಮಾಪನ ವ್ಯವಸ್ಥೆಯಾದ ‘ಆನ್‌-ಸ್ಕ್ರೀನ್ ಮಾರ್ಕಿಂಗ್’ (OSM) ನಲ್ಲಿನ ತಾಂತ್ರಿಕ ಲೋಪಗಳೇ ಇದಕ್ಕೆ ಕಾರಣ ಎಂದು ಪೋಷಕರು ಮತ್ತು ವಿದ್ಯಾರ್ಥಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ವಿದ್ಯಾರ್ಥಿಗಳಿಗೆ ‘ಸೋರೋಸ್ ಏಜೆಂಟ್’ ಪಟ್ಟ! ರಾಹುಲ್ ಆಕ್ರೋಶ:

ತಮ್ಮ ಅಂಕಗಳ ಬಗ್ಗೆ ಸಾಮಾಜಿಕ ಜಾಲತಾಣ ‘X’ ನಲ್ಲಿ ಪ್ರಶ್ನೆ ಮಾಡಿದ ವಿದ್ಯಾರ್ಥಿಗಳಿಗೆ ಆನ್‌ಲೈನ್‌ನಲ್ಲಿ ತೀವ್ರ ನಿಂದನೆ ಮಾಡಲಾಗಿದ್ದು, ಅವರನ್ನು ‘ದೇಶದ್ರೋಹಿಗಳು’ ಹಾಗೂ ‘ಸೋರೋಸ್ ಏಜೆಂಟ್ಸ್’ (Soros Agents) ಎಂದು ಕರೆಯಲಾಗಿದೆ. ಈ ಕುರಿತು ಟ್ವೀಟ್ ಮಾಡಿರುವ ರಾಹುಲ್ ಗಾಂಧಿ, “ನನ್ನ ಸಹವರ್ತಿ ‘ದೇಶವಿರೋಧಿ ಸೋರೋಸ್ ಏಜೆಂಟ್ಸ್’ ಜೊತೆಗಿನ ಮಾತುಕತೆ ಇದು. ವೇದಾಂತ್ ಮತ್ತು ಆತನ ಸ್ನೇಹಿತರು ಅತ್ಯಂತ ಪ್ರತಿಭಾವಂತ ಮತ್ತು ಧೈರ್ಯಶಾಲಿ ಯುವ ಭಾರತೀಯರು. ಅವರು ಸಿಬಿಎಸ್‌ಇ ಮತ್ತು ಮೋದಿ ಸರ್ಕಾರವನ್ನು ಸರಳ ಪ್ರಶ್ನೆ ಕೇಳಿದ್ದಕ್ಕೆ ಉತ್ತರ ನೀಡುವ ಬದಲು ಅವಮಾನ ಮಾಡಲಾಗಿದೆ. ಸಮಸ್ಯೆಯನ್ನು ಒಪ್ಪಿಕೊಳ್ಳುವ ಬದಲು ಮಕ್ಕಳನ್ನೇ ದೂಷಿಸಲಾಗುತ್ತಿದೆ” ಎಂದು ಕಿಡಿಕಾರಿದ್ದಾರೆ.

ಜವಾಬ್ದಾರಿ ಹೊತ್ತ ಕೇಂದ್ರ ಸಚಿವ; ಜೂನ್ 1ಕ್ಕೆ ಮರುಮೌಲ್ಯಮಾಪನ ಮುಂದೂಡಿಕೆ:

ಈ ವಿವಾದ ದೇಶಾದ್ಯಂತ ಸದ್ದು ಮಾಡುತ್ತಿದ್ದಂತೆ ಎಚ್ಚೆತ್ತ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ಈ ಲೋಪದ ಹೊಣೆಯನ್ನು ಹೊತ್ತುಕೊಂಡಿದ್ದಾರೆ. “ಈ ಸಮಸ್ಯೆಯನ್ನು ಬಗೆಹರಿಸಲಾಗುವುದು. ಮೌಲ್ಯಮಾಪನದಲ್ಲಿ ಯಾವುದೇ ತಪ್ಪುಗಳು ಅಥವಾ ಅಕ್ರಮಗಳು ಕಂಡುಬಂದಲ್ಲಿ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಮತ್ತು ಯಾರನ್ನೂ ಸುಮ್ಮನೆ ಬಿಡುವುದಿಲ್ಲ” ಎಂದು ಭರವಸೆ ನೀಡಿದ್ದಾರೆ.

ಮತ್ತೊಂದೆಡೆ, ತಾಂತ್ರಿಕ ದೋಷಗಳನ್ನು ಸರಿಪಡಿಸಲು ಮತ್ತು ಪಾರದರ್ಶಕತೆ ಕಾಯ್ದುಕೊಳ್ಳಲು ಮೇ 29 ರಂದು ಆರಂಭವಾಗಬೇಕಿದ್ದ ಮರುಮೌಲ್ಯಮಾಪನ ಮತ್ತು ಪರಿಶೀಲನಾ ಪ್ರಕ್ರಿಯೆಯನ್ನು ಸಿಬಿಎಸ್‌ಇ ಮಂಡಳಿಯು ಜೂನ್ 1 ಕ್ಕೆ ಮುಂದೂಡಿದೆ.