ಕಸಬ್ ‘ನಾನು 17 ವರ್ಷದವನು’ ಎಂದಿದ್ದ ಸುಳ್ಳನ್ನು ಉಜ್ವಲ್ ನಿಕಮ್ ಬಯಲುಗೊಳಿಸಿದ್ದು ಹೇಗೆ? ‘ಪ್ರಹಾರ್’ ಚಿತ್ರದಲ್ಲಿದೆ ರೋಚಕ ಕಥೆ!

ನವದೆಹಲಿ: 26/11 ಮುಂಬೈ ಭಯೋತ್ಪಾದನಾ ದಾಳಿಯ ವಿಚಾರಣೆ ವೇಳೆ ಜೀವಂತವಾಗಿ ಸಿಕ್ಕಿಬಿದ್ದ ಏಕೈಕ ಉಗ್ರ ಅಜ್ಮಲ್ ಕಸಬ್, “ನನಗೆ 17 ವರ್ಷ ವಯಸ್ಸು, ನಾನು ಅಪ್ರಾಪ್ತ” ಎಂದು ನ್ಯಾಯಾಲಯದಲ್ಲಿ ವಾದಿಸಿ ಗಲ್ಲು ಶಿಕ್ಷೆಯಿಂದ ತಪ್ಪಿಸಿಕೊಳ್ಳಲು ಯತ್ನಿಸಿದ್ದನು. ಆದರೆ, ವಿಶೇಷ ಸರ್ಕಾರಿ ಅಭಿಯೋಜಕರಾಗಿದ್ದ ಉಜ್ವಲ್ ನಿಕಮ್ ಅವರು ವೈಜ್ಞಾನಿಕ ಹಾಗೂ ವೈದ್ಯಕೀಯ ಪುರಾವೆಗಳ ಮೂಲಕ ಆತನ ಸುಳ್ಳನ್ನು ಬಯಲಿಗೆಳೆದಿದ್ದರು. ಈ ರೋಚಕ ಕಾನೂನು ಸಮರವು ಶೀಘ್ರದಲ್ಲೇ ತೆರೆಕಾಣಲಿರುವ ರಾಜಕುಮಾರ್ ರಾವ್ ನಟನೆಯ ‘ಪ್ರಹಾರ್ ದಿ ಅನ್‌ಟೋಲ್ಡ್ ಸ್ಟೋರಿ ಆಫ್ ಉಜ್ವಲ್ ನಿಕಮ್’  ಸಿನಿಮಾದಲ್ಲೂ ಪ್ರಮುಖವಾಗಿ ಬಿಂಬಿತವಾಗಿದೆ.

ಕಸಬ್ ಈ ವಾದ ಮಂಡಿಸಿದ್ದು ಏಕೆ?

ನ್ಯಾಯಾಲಯದಲ್ಲಿ ಆತ ಅಪ್ರಾಪ್ತ ಎಂದು ಸಾಬೀತಾಗಿದ್ದರೆ, ಕಸಬ್‌ನನ್ನು ‘ಬಾಲಾಪರಾಧಿ ನ್ಯಾಯ ಮಂಡಳಿ’ಗೆ (Juvenile Justice Court) ವರ್ಗಾಯಿಸಬೇಕಾಗುತ್ತಿತ್ತು. ಇದರಿಂದ ಆತನಿಗೆ ಗಲ್ಲು ಶಿಕ್ಷೆ ತಪ್ಪಿ, ಗರಿಷ್ಠ 3 ವರ್ಷಗಳ ಕಾಲ ಬಾಲಾಪರಾಧಿ ಸುಧಾರಣಾಗೃಹದಲ್ಲಿ ಶಿಕ್ಷೆ ಅನುಭವಿಸಿ ಹೊರಬರಲು ಅವಕಾಶ ಸಿಗುತ್ತಿತ್ತು.

ವೈದ್ಯಕೀಯ ಹಾಗೂ ಮೂಳೆ ಪರೀಕ್ಷೆ 

ಉಜ್ವಲ್ ನಿಕಮ್ ಅವರ ಮನವಿ ಮೇರೆಗೆ ಸರ್ ಜೆ.ಜೆ. ಆಸ್ಪತ್ರೆಯ ವೈದ್ಯಕೀಯ ಮಂಡಳಿಯು ಕಸಬ್‌ನ ಎಕ್ಸ್-ರೇ, ಹಲ್ಲಿನ ಬೆಳವಣಿಗೆ ಹಾಗೂ ಮೂಳೆ ಬೆಸುಗೆಯ ಪರೀಕ್ಷೆ ನಡೆಸಿತು. ಈ ವರದಿಯಲ್ಲಿ ದಾಳಿ ನಡೆದ ಸಮಯದಲ್ಲಿ ಕಸಬ್‌ಗೆ ಕನಿಷ್ಠ 19.5 ವರ್ಷದಿಂದ 21 ವರ್ಷ ವಯಸ್ಸಾಗಿತ್ತು ಎಂಬುದು ಸ್ಪಷ್ಟವಾಯಿತು.

ಆಸ್ಪತ್ರೆ ಹಾಗೂ ಜೈಲಿನ ದಾಖಲೆಗಳು:

ದಾಳಿಯ ನಂತರ ಚಿಕಿತ್ಸೆಗಾಗಿ ನಾಯರ್ ಆಸ್ಪತ್ರೆಗೆ ದಾಖಲಾದಾಗ ಮತ್ತು ಆರ್ಥರ್ ರೋಡ್ ಸೆಂಟ್ರಲ್ ಜೈಲಿಗೆ ಸೇರಿಸಿದಾಗ ಕಸಬ್ ಸ್ವತಃ ತನ್ನ ವಯಸ್ಸನ್ನು 21 ವರ್ಷ ಎಂದು ನಮೂದಿಸಿದ್ದ ದಾಖಲೆಗಳನ್ನು ನಿಕಮ್ ಕೋರ್ಟ್‌ಗೆ ಸಲ್ಲಿಸಿದರು.

ಸ್ವತಃ ನೀಡಿದ್ದ ನ್ಯಾಯಾಂಗ ಒಪ್ಪಿಗೆ ನೀಡಿಕೆ 

ಮ್ಯಾಜಿಸ್ಟ್ರೇಟ್ ಎದುರು ಸಿಆರ್‌ಪಿಸಿ ಸೆಕ್ಷನ್ 164 ರ ಅಡಿಯಲ್ಲಿ ಕಸಬ್ ನೀಡಿದ್ದ ಹೇಳಿಕೆಯಲ್ಲೂ ತನ್ನ ವಯಸ್ಸು 21 ವರ್ಷ ಎಂದು ಒಪ್ಪಿಕೊಂಡಿದ್ದನು.

ಸುಪ್ರೀಂ ಕೋರ್ಟ್ ಆದೇಶ:

ವಿಶೇಷ ನ್ಯಾಯಾಲಯವು ಕಸಬ್ ವಕೀಲರ ಅರ್ಜಿಯನ್ನು ವಜಾಗೊಳಿಸಿತು. ನಂತರ ಆಗಸ್ಟ್ 2012 ರಲ್ಲಿ ಸುಪ್ರೀಂ ಕೋರ್ಟ್ ಕೂಡ ಉಜ್ವಲ್ ನಿಕಮ್ ಅವರು ಮಂಡಿಸಿದ ಮೂಳೆ ಪರೀಕ್ಷೆಯ ವರದಿಯನ್ನು ಪುರಸ್ಕರಿಸಿ, ಕಸಬ್‌ಗೆ ವಿಧಿಸಲಾಗಿದ್ದ ಮರಣದಂಡನೆ ಶಿಕ್ಷೆಯನ್ನು ಎತ್ತಿಹಿಡಿಯಿತು.

ಅವಿನಾಶ್ ಅರುಣ್ ನಿರ್ದೇಶನದ ‘ಪ್ರಹಾರ್’ ಚಲನಚಿತ್ರವು ಅಕ್ಟೋಬರ್ 16 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.