ಬಾಲಿವುಡ್ ಸ್ಟಾರ್ ನಟನ ಮೇಲೆ ಗುಂಡಿನ ದಾಳಿಗೆ ಬಿಷ್ಣೋಯ್ ಗ್ಯಾಂಗ್ ಸಂಚು ವಿಫಲ: ಇಬ್ಬರು ಕುಖ್ಯಾತ ಶೂಟರ್‌ಗಳನ್ನು ಹೆಡೆಮುರಿ ಕಟ್ಟಿದ ದೆಹಲಿ ಪೊಲೀಸರು!

ನವದೆಹಲಿ: ಸಂಘಟಿತ ಅಪರಾಧ ಮತ್ತು ಗ್ಯಾಂಗ್‌ಸ್ಟರ್ ಜಾಲಗಳ ವಿರುದ್ಧ ದೆಹಲಿ ಪೊಲೀಸ್ ವಿಶೇಷ ಘಟಕ ಭರ್ಜರಿ ಕಾರ್ಯಾಚರಣೆ ನಡೆಸಿದ್ದು, ಕುಖ್ಯಾತ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ಗೆ ಸೇರಿದ ಇಬ್ಬರು ಶೂಟರ್‌ಗಳನ್ನು ಬಂಧಿಸಿದೆ.

ಈ ಮೂಲಕ ದೆಹಲಿಯ ಉದ್ಯಮಿಯೊಬ್ಬರ ಮೇಲೆ ಹಾಗೂ ಮುಂಬೈನ ಖ್ಯಾತ ಬಾಲಿವುಡ್ ನಟರೊಬ್ಬರ ನಿವಾಸದ ಮೇಲೆ ಗುಂಡಿನ ದಾಳಿ ನಡೆಸಲು ರೂಪಿಸಲಾಗಿದ್ದ ಭೀಕರ ಸಂಚನ್ನು ಪೊಲೀಸರು ವಿಫಲಗೊಳಿಸಿದ್ದಾರೆ. ಬಂಧಿತರನ್ನು ಪಂಜಾಬ್‌ನ ಜಲಂಧರ್ ಮೂಲದ ವಿಕಾಸ್ ಠಾಕೂರ್ ಅಲಿಯಾಸ್ ವಿಕ್ಕಿ ಮತ್ತು ತರ್ನ್ ತರಣ್ ಜಿಲ್ಲೆಯ ದೀಪ್ ಅಲಿಯಾಸ್ ದೀಪಕ್ ಸಿಂಗ್ ಎಂದು ಗುರುತಿಸಲಾಗಿದೆ.

ಅಕ್ಟೋಬರ್ 3 ರಂದು ಪಂಜಾಬ್‌ನ ಅಮೃತಸರದಲ್ಲಿ ನಡೆದಿದ್ದ ಜನಪ್ರಿಯ ಇನ್‌ಸ್ಟಾಗ್ರಾಮ್ ಇನ್‌ಫ್ಲುಯೆನ್ಸರ್ ಮ್ಯಾಡ್ ಸಂಧು  ಅವರ ಗುಂಡಿನ ಹತ್ಯೆ ಪ್ರಕರಣದಲ್ಲಿ ದೀಪಕ್ ಸಿಂಗ್ ಪ್ರಮುಖ ಆರೋಪಿಯಾಗಿದ್ದನು. ಕೃತ್ಯದ ನಂತರ ಅಮೃತಸರದಿಂದ ಪರಾರಿಯಾಗಿದ್ದ ದೀಪ್, ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ ಸೂಚನೆಯಂತೆ ಮುಂಬೈನ ಮಲಾಡ್‌ನಲ್ಲಿ ಬಾಡಿಗೆ ಮನೆಯಲ್ಲಿ ತಲೆಮರೆಸಿಕೊಂಡಿದ್ದನು. ಖಚಿತ ಮಾಹಿತಿ ಮೇರೆಗೆ ದೆಹಲಿ ಪೊಲೀಸರು ಮೊದಲು ದೆಹಲಿಯಲ್ಲಿ ವಿಕಾಸ್ ಠಾಕೂರ್‌ನನ್ನು ಬಂಧಿಸಿ, ಆತನ ನೀಡಿದ ಮಾಹಿತಿಯ ಆಧಾರದ ಮೇಲೆ ಮುಂಬೈನಲ್ಲಿ ದೀಪಕ್ ಸಿಂಗ್‌ನನ್ನು ಹೆಡೆಮುರಿ ಕಟ್ಟಿದ್ದಾರೆ.

ಬಾಲಿವುಡ್ ನಟನ ಹತ್ಯೆ/ದಾಳಿ ಸಂಚು: ಮುಂಬೈನಲ್ಲಿ ತಲೆಮರೆಸಿಕೊಂಡಿದ್ದ ದೀಪ್‌ಗೆ ಜನಪ್ರಿಯ ಬಾಲಿವುಡ್ ನಟರೊಬ್ಬರ ಮನೆಯ ರೆಕ್ಕಿ ನಡೆಸಿ, ಸೆಮಿ-ಆಟೋಮ್ಯಾಟಿಕ್ ಪಿಸ್ತೂಲ್ ಬಳಸಿ ಗುಂಡಿನ ದಾಳಿ ನಡೆಸಲು ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್ ಸುಪಾರಿ ನೀಡಿತ್ತು. (ಈ ಹಿಂದೆ ನಟ ಟೈಗರ್ ಶ್ರಾಫ್ ಗುರಿಯಾಗಿಸಿ ನಡೆದ ಘಟನೆಯ ಶೂಟರ್‌ಗಳೇ ಈ ನಟನ ಮನೆಯ ರೆಕ್ಕಿ ನಡೆಸಿದ್ದರು ಎನ್ನಲಾಗಿದೆ).

ಮ್ಯಾಡ್ ಸಂಧು ಹತ್ಯೆ ಪ್ರಕರಣ: ಅಕ್ಟೋಬರ್ 3 ರಂದು ಅಮೃತಸರದಲ್ಲಿ ಇನ್‌ಫ್ಲುಯೆನ್ಸರ್ ಮ್ಯಾಡ್ ಸಂಧು ಅವರನ್ನು ಗುಂಡಿಕ್ಕಿ ಕೊಂದ ಪ್ರಕರಣದಲ್ಲಿ ದೀಪ್ ಬೇಕಾಗಿದ್ದನು; ಆತನ ಸಹಚರ ಪಲ್ವಿಂದರ್‌ನನ್ನು ಪಂಜಾಬ್ ಪೊಲೀಸರು ಈಗಾಗಲೇ ಬಂಧಿಸಿದ್ದರು.

ದೆಹಲಿ ಉದ್ಯಮಿಗೆ ಬೆದರಿಕೆ ಹಾಗೂ ಸುಲಿಗೆ: ಹಣ ಸುಲಿಗೆ ಮಾಡುವ ಉದ್ದೇಶದಿಂದ ದೆಹಲಿಯ ಉದ್ಯಮಿಯೊಬ್ಬರ ಮೇಲೆ ಗುಂಡಿನ ದಾಳಿ ನಡೆಸಲು ವಿಕಾಸ್ ಠಾಕೂರ್ ಮುಂಬೈನಿಂದ ದೆಹಲಿಗೆ ಬಂದಿದ್ದನು. ಈ ದಾಳಿಗೆ ದೀಪ್ ಕೂಡ ಕೈಜೋಡಿಸಬೇಕಿತ್ತು.

ಶಸ್ತ್ರಾಸ್ತ್ರ ಕಾಯ್ದೆಯಡಿ ಪ್ರಕರಣ: ವಿದೇಶದಲ್ಲಿ ಕುಳಿತಿರುವ ಗ್ಯಾಂಗ್‌ಸ್ಟರ್‌ಗಳ ನಿರ್ದೇಶನದಂತೆ ಕಾರ್ಯನಿರ್ವಹಿಸುತ್ತಿದ್ದ ಈ ಜಾಲದ ವಿರುದ್ಧ ಶಸ್ತ್ರಾಸ್ತ್ರ ಕಾಯ್ದೆಯ ಸೆಕ್ಷನ್ 25ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ತೀವ್ರ ವಿಚಾರಣೆ ನಡೆಸಲಾಗುತ್ತಿದೆ.