175 ಅರ್ಜಿಗಳು, 55 ಸಂದರ್ಶನ ಎದುರಿಸಿದರೂ ಸಿಗದ ಉದ್ಯೋಗ: ನಿರುದ್ಯೋಗಿ ಯುವಕನ ಕಣ್ಣೀರ ಕಥೆ!

ನವದೆಹಲಿ: ಇಂದಿನ ಕಠಿಣ ಉದ್ಯೋಗ ಮಾರುಕಟ್ಟೆಯ ನೈಜ ಸ್ಥಿತಿಯನ್ನು ಬಿಚ್ಚಿಟ್ಟಿರುವ ಉದ್ಯೋಗಾಂಕ್ಷಿಯೊಬ್ಬರ ಅಳಲು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಕೆಲಸ ಕಳೆದುಕೊಂಡಿರುವ ಉದ್ಯೋಗಿಯೊಬ್ಬರು ಕಳೆದ ಏಳು ತಿಂಗಳಲ್ಲಿ ಬರೋಬ್ಬರಿ 175 ಹುದ್ದೆಗಳಿಗೆ ಅರ್ಜಿ ಸಲ್ಲಿಸಿದ್ದು, 55 ಸಂದರ್ಶನಗಳನ್ನು ಎದುರಿಸಿದ್ದಾರೆ. ಇದರಲ್ಲಿ ಬರೋಬ್ಬರಿ 25 ಬಾರಿ ಅಂತಿಮ ಸುತ್ತಿಗೆ ತಲುಪಿದರೂ ಸಹ ಅವರಿಗೆ ಯಾವುದೇ ಕಂಪನಿಯಿಂದ ಉದ್ಯೋಗದ ಆಫರ್ ಸಿಕ್ಕಿಲ್ಲ.

ನಿರುದ್ಯೋಗ ಭತ್ಯೆಯೂ ಸಂಪೂರ್ಣ ಖಾಲಿಯಾಗಿರುವ ಈ ಸಂದರ್ಭದಲ್ಲಿ ಪ್ರಸ್ತುತ ಉದ್ಯೋಗ ಮಾರುಕಟ್ಟೆಯು ಅತ್ಯಂತ ಕ್ರೂರವಾಗಿದೆ ಎಂದು ಅವರು ಅಳಲು ತೋಡಿಕೊಂಡಿದ್ದಾರೆ.

ಉದ್ಯೋಗ ಹುಡುಕಾಟಕ್ಕಾಗಿ ಕೃತಕ ಬುದ್ಧಿಮತ್ತೆ (AI) ಏಜೆಂಟ್ ಅನ್ನು ಸೃಷ್ಟಿಸಿಕೊಂಡು ಪ್ರಯತ್ನಿಸಿದರೂ ಯಶಸ್ಸು ಸಿಕ್ಕಿಲ್ಲ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

ತಮಗೆ ತಕ್ಕುದಾದ ಉದ್ಯೋಗಗಳಿಗಾಗಿ ಹಗಲಿರುಳು ಶ್ರಮಿಸುತ್ತಿದ್ದರೂ, ಅಂತಿಮ ಹಂತದಲ್ಲಿ ಕೈತಪ್ಪಿ ಹೋಗುತ್ತಿರುವುದು ಮಾನಸಿಕವಾಗಿ ಕುಗ್ಗಿಸಿದೆ ಎಂದು ತಿಳಿಸಿದ್ದಾರೆ. ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟಿಗರು ಆತನಿಗೆ ಸಾಂತ್ವನ ಹೇಳಿದ್ದು, 25 ಅಂತಿಮ ಸುತ್ತುಗಳನ್ನು ತಲುಪಿದ್ದೀರಿ ಎಂದರ್ಥ ನಿಮ್ಮ ರೆಸ್ಯೂಮ್ ಮತ್ತು ಸಂದರ್ಶನ ಕೌಶಲ್ಯ ಚೆನ್ನಾಗಿದೆ ಎಂದರ್ಥ, ಧೃತಿಗೆಡದೆ ಪ್ರಯತ್ನಿಸಿ ಎಂದು ಬೆಂಬಲ ಸೂಚಿಸಿದ್ದಾರೆ.

ಘಟನೆಯ ಹಿನ್ನೆಲೆ: ಉದ್ಯೋಗಿಯೊಬ್ಬರು ತನ್ನ 7 ತಿಂಗಳ ಕಠಿಣ ಉದ್ಯೋಗ ಹುಡುಕಾಟದ ಕಥೆಯನ್ನು ಹಂಚಿಕೊಂಡಿದ್ದು, ಮಾರುಕಟ್ಟೆಯ ದಯನೀಯ ಸ್ಥಿತಿ ಜಗಜ್ಜಾಹೀರಾಗಿದೆ.

ಆಘಾತಕಾರಿ ಅಂಕಿಅಂಶಗಳು: 175 ಹುದ್ದೆಗಳಿಗೆ ಅರ್ಜಿ, 55 ಸಂದರ್ಶನಗಳು, 25 ಅಂತಿಮ ಸುತ್ತುಗಳು – ಆದರೆ ಕೊನೆಗೆ ಸಿಕ್ಕಿದ ಉದ್ಯೋಗ ಕೊಡುಗೆಗಳು ‘ಶೂನ್ಯ’.

AI ಬಳಕೆ: ತನ್ನ ರೆಸ್ಯೂಮ್‌ಗೆ ತಕ್ಕ ಉತ್ತಮ ಉದ್ಯೋಗಗಳನ್ನು ಹುಡುಕಲು ಸ್ವತಃ AI ಏಜೆಂಟ್ ಒಂದನ್ನು ರೂಪಿಸಿಕೊಂಡರೂ ನಿರಾಶೆಯಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಸ್ಪಂದನೆ: ನೂರಾರು ಬಳಕೆದಾರರು ಆತನ ಪರವಾಗಿ ನಿಂತು, ಧೈರ್ಯವಾಗಿರಿ ಎಂದು ಧೈರ್ಯ ತುಂಬಿದ್ದಾರೆ.