ಇರಾನ್‌ನಲ್ಲಿ ಧರ್ಮನಿಂದನೆ ಆರೋಪ: 23 ವರ್ಷದ ವಿದ್ಯಾರ್ಥಿನಿಗೆ ಗಲ್ಲು ಶಿಕ್ಷೆ, ಜೈಲಿನಿಂದಲೇ ಮಾಡಿರುವ ಮನವಿ ಏನು?

ಇರಾನ್: ಸಾಮಾಜಿಕ ಜಾಲತಾಣದಲ್ಲಿ ಧರ್ಮನಿಂದನೆ (ದೇವರ ನಿಂದನೆ) ಆರೋಪ ಹೊರಿಸಿ 23 ವರ್ಷದ ಯುವತಿ ನಜ್ಮೆಹ್ ಅಮಿನಿ ಅವರಿಗೆ ಇರಾನ್ ನ್ಯಾಯಾಲಯವು ಮರಣದಂಡನೆ ಶಿಕ್ಷೆ ವಿಧಿಸಿದೆ.

ಈ ತೀರ್ಪಿನ ವಿರುದ್ಧ ಅಂತಾರಾಷ್ಟ್ರೀಯ ಮಾನವ ಹಕ್ಕುಗಳ ಸಂಘಟನೆಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಜೈಲಿನಿಂದಲೇ ಆಡಿಯೋ ಸಂದೇಶ ರವಾನಿಸಿರುವ ಯುವತಿ ತನಗೆ ನ್ಯಾಯ ಒದಗಿಸುವಂತೆ ಜಗತ್ತಿಗೆ ಮನವಿ ಮಾಡಿದ್ದಾರೆ.

ಇರಾನ್‌ನ ಮಶಾದ್ ನಗರದ ಲೆಕ್ಕಪರಿಶೋಧನೆ ವಿದ್ಯಾರ್ಥಿನಿಯಾಗಿರುವ ಅಮಿನಿ ಅವರನ್ನು ಈ ವರ್ಷದ ಜನವರಿ 31 ರಂದು ಸರ್ಕಾರ ವಿರೋಧಿ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದ ವೇಳೆ ಬಂಧಿಸಲಾಗಿತ್ತು. ಸುಮಾರು 8 ತಿಂಗಳುಗಳ ಕಾಲ ಕಾನೂನು ನೆರವಿನಿಂದ ವಂಚಿತರನ್ನಾಗಿ ಮಾಡಿ, ತನಿಖೆಯ ನೆಪದಲ್ಲಿ ವಾಕಿಲಾಬಾದ್ ಜೈಲಿನಲ್ಲಿ ಇರಿಸಲಾಗಿತ್ತು. ಆಗಸ್ಟ್‌ನಲ್ಲಿ ವಿಚಾರಣೆ ನಡೆಸಿದ ನ್ಯಾಯಾಲಯವು ಸೆಪ್ಟೆಂಬರ್ 16 ರಂದು ಈ ಕಠಿಣ ಶಿಕ್ಷೆಯನ್ನು ಪ್ರಕಟಿಸಿದೆ.

ಗಂಭೀರ ಆರೋಪಗಳು: ಇಸ್ಲಾಮಿಕ್ ಕಾನೂನಿನಡಿ ಕಠಿಣ ಶಿಕ್ಷೆಗೆ ಗುರಿಯಾಗುವ ‘ಮೊಹರೆಬೆಹ್’ (ದೇವರ ವಿರುದ್ಧದ ಶತ್ರುತ್ವ) ಮತ್ತು ‘ಸಬ್ ಅಲ್-ನಬಿ’ (ಪ್ರವಾದಿ ನಿಂದನೆ) ಸೇರಿದಂತೆ ಹಲವು ವಿಭಾಗಗಳಡಿ ಪ್ರಕರಣ ದಾಖಲಿಸಲಾಗಿದೆ.

ಆರೋಪಿಯ ಸಮರ್ಥನೆ: ಗಿಡಮೂಲಿಕೆಯಿಂದ ತಯಾರಿಸಿದ ಮಾದಕ ವಸ್ತು (Psychedelic Mushrooms) ಸೇವಿಸಿದ ನಂತರದ ಭ್ರಮಾಧೀನ ಸ್ಥಿತಿಯಲ್ಲಿ ಈ ಪೋಸ್ಟ್ ಹಾಕಿದ್ದಾಗಿ ಅಮಿನಿ ತಿಳಿಸಿದ್ದು, ನ್ಯಾಯಾಧೀಶರು ಈ ವಾದವನ್ನು ತಿರಸ್ಕರಿಸಿದ್ದಾರೆ.

ಆಡಿಯೋ ಮೆಸೇಜ್ ಮನವಿ: ಜೈಲಿನಿಂದ ಹೊರಬಿದ್ದಿರುವ ಆಡಿಯೋದಲ್ಲಿ “ನನ್ನ ಹೆಸರನ್ನು ನೆನಪಿನಲ್ಲಿಡಿ, ಮರಣದ ಹಗ್ಗ ನನ್ನ ಕುತ್ತಿಗೆಗೆ ಬೀಳುವ ಮುನ್ನ ಮುಕ್ತ ಮತ್ತು ಸಮೃದ್ಧ ಇರಾನ್ ನೋಡುವ ಆಸೆ ನನಗಿದೆ” ಎಂದು ಭಾವನಾತ್ಮಕವಾಗಿ ನುಡಿದಿದ್ದಾರೆ.

ಪ್ರಸ್ತುತ ಈ ತೀರ್ಪನ್ನು ಇರಾನ್‌ನ ಸುಪ್ರೀಂ ಕೋರ್ಟ್‌ನಲ್ಲಿ ಪ್ರಶ್ನಿಸಲು ಅವಕಾಶವಿದ್ದು, ಮಾನವ ಹಕ್ಕುಗಳ ಸಂಸ್ಥೆಗಳು ತಕ್ಷಣವೇ ಅಂತಾರಾಷ್ಟ್ರೀಯ ಹಸ್ತಕ್ಷೇಪಕ್ಕೆ ಆಗ್ರಹಿಸಿವೆ. ಈ ವರ್ಷವೊಂದರಲ್ಲೇ ಇರಾನ್‌ನಲ್ಲಿ 600ಕ್ಕೂ ಹೆಚ್ಚು ಜನರಿಗೆ ಗಲ್ಲಿಗೇರಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ.