ಒಳಗೆ ಸೇರಿದರೆ ಗುಂಡು ಹುಡುಗಿ ಮಾಡುವಳು ಕಿರಿಕ್: ಕುಡಿದ ಯುವತಿಯಿಂದ ಪ್ರಯಾಣಿಕರ ಮೇಲೆ ಹಲ್ಲೆ ಜೊತೆಗೆ ಮಹಿಳೆಯ ಜುಟ್ಟು ಹಿಡಿದು ಜಗಳ!

ಚೆನ್ನೈ: ತಮಿಳುನಾಡಿನ ರಾಜಧಾನಿ ಚೆನ್ನೈನ ಮಹಾನಗರ ಸಾರಿಗೆ ಸಂಸ್ಥೆ ಬಸ್‌ನಲ್ಲಿ ಮದ್ಯಪಾನ ಮಾಡಿದ ಯುವತಿಯೊಬ್ಬಳು ಪ್ರಯಾಣಿಕರೊಂದಿಗೆ ತಗಾದೆ ತೆಗೆದು ಹಲ್ಲೆ ನಡೆಸಿದ ಆಘಾತಕಾರಿ ಘಟನೆ ನಡೆದಿದೆ. ಕಿಲಾಂಬಾಕ್ಕಂ ಕಡೆಗೆ ಸಾಗುತ್ತಿದ್ದ ಬಸ್‌ನಲ್ಲಿ ಈ ರಂಪಾಟ ಸಂಭವಿಸಿದ್ದು, ಪ್ರಸ್ತುತ ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವೈರಲ್ ಆಗುತ್ತಿದೆ.

ಡ್ಯಾಶ್‌ಬೋರ್ಡ್ ಮೇಲೆ ಕುಳಿತು ಗಲಾಟೆ:

ಘಟನೆಯ ಸಮಯದಲ್ಲಿ ಸದರಿ ಯುವತಿ ಬಸ್‌ನ ಮುಂಭಾಗದ ಡ್ಯಾಶ್‌ಬೋರ್ಡ್ ಏರಿ ಕುಳಿತಿದ್ದಳು. ಪ್ರಯಾಣಿಕರು ಆಕೆಯನ್ನು ಸಮಾಧಾನಪಡಿಸಲು ಮತ್ತು ಆಕೆಯ ಕುಟುಂಬದವರ ಫೋನ್ ನಂಬರ್ ನೀಡುವಂತೆ ಮನವಿ ಮಾಡಿದರೂ ಆಕೆ ನಿರಾಕರಿಸಿದ್ದಾಳೆ.

ಅಷ್ಟೇ ಅಲ್ಲದೆ, “ನಾನು ಸಾಮಾನ್ಯ ಅಪ್ಲಿಕೇಶನ್ ಕ್ಯಾಬ್‌ಗಳಲ್ಲಿ ಪ್ರಯಾಣಿಸುವವಳು, ನಾನು ಯಾಕೆ ಬಸ್‌ನಲ್ಲಿ ಬರಲಿ?” ಎಂದು ಪ್ರಯಾಣಿಕರ ವಿರುದ್ಧ ಉದ್ಧಟತನ ತೋರಿದ್ದಾಳೆ. ಬಸ್ ಟಿಕೆಟ್ ಪಡೆಯಲು ಸಹ ಆಕೆ ನಿರಾಕರಿಸಿದ್ದಳು ಎಂದು ಸಹಪ್ರಯಾಣಿಕರು ಆರೋಪಿಸಿದ್ದಾರೆ.

ಪ್ರಯಾಣಿಕರ ಮೇಲೆ ಹಲ್ಲೆ:

ಬಸ್‌ನಲ್ಲಿದ್ದ ವ್ಯಕ್ತಿಯೊಬ್ಬರು ಆಕೆಯ ವರ್ತನೆಯನ್ನು ಪ್ರಶ್ನಿಸಲು ಯತ್ನಿಸಿದಾಗ, ಯುವತಿ ಆತನ ತಲೆಗೆ ಬಾರಿಸಿದ್ದಾಳೆ. ಇದನ್ನು ಕಂಡು ಸೀರೆ ಧರಿಸಿದ್ದ ಮತ್ತೊಬ್ಬ ಮಹಿಳೆ ಆಕೆಯನ್ನು ತಡೆಯಲು ಬಂದಾಗ, ಯುವತಿಯು ಆ ಮಹಿಳೆಯ ಜುಟ್ಟು ಹಿಡಿದು ತೀವ್ರವಾಗಿ ಎಳೆದು ದೈಹಿಕ ಹಲ್ಲೆ ನಡೆಸಿದ್ದಾಳೆ. ಇದರಿಂದಾಗಿ ಬಸ್‌ನೊಳಗೆ ತೀವ್ರ ಗೊಂದಲದ ವಾತಾವರಣ ನಿರ್ಮಾಣವಾಯಿತು.

ಪೊಲೀಸ್ ತನಿಖೆ ಆರಂಭ:

ಬಸ್ ಚಾಲಕ ಹಾಗೂ ನಿರ್ವಾಹಕ ವಾಹನವನ್ನು ತಕ್ಷಣ ನಿಲ್ಲಿಸಿ ಆ ಯುವತಿಯನ್ನು ಬಸ್‌ನಿಂದ ಕೆಳಗಿಳಿಸಿದ್ದಾರೆ. ಬಳಿಕ ಘಟನೆ ಕುರಿತು ಕುಮಾರನ್ ನಗರ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದಾರೆ. ವೈರಲ್ ವಿಡಿಯೋ ಆಧಾರದ ಮೇಲೆ ಪೊಲೀಸರು ಯುವತಿಯ ಗುರುತು ಪತ್ತೆ ಹಚ್ಚಲು ಮತ್ತು ಘಟನೆಗೆ ಸೂಕ್ತ ಕಾರಣ ತಿಳಿಯಲು ತನಿಖೆ ಚುರುಕುಗೊಳಿಸಿದ್ದಾರೆ.